Logo YouVersion
Îcone de recherche

Awayango-sandaga 23

23
Amatanga ti kodro ti Israel: lango ti wungo tere
1KOTA GBIA atene na Moïse: 2Tene na azo ti Israel, mo tene:
“Akota matanga so ala yeke sara ndali ti mbi KOTA GBIA ayeke amatanga so ala yeke bongbi ti voro mbi. Alango ti amatanga ni ayeke tongaso:
3 “Na ya ti yenga oko, ala yeke sara kua na ya ti lango omene; me lango mbarambara ni ayeke *lango ti wungo tere; na lango ni so, ala yeke sara kua oko pepe, lango so ala yeke bongbi ti voro mbi. So ayeke lango ti wungo tere: na ndo so kue ala yeke duti daa, ala bata lango ni so ndali ti mbi KOTA GBIA.
4“Ambeni kota matanga so ala yeke bongbi ti voro mbi KOTA GBIA fade ala yeke sara ni alingbi na alango so a diko awe:
Matanga ti Pake na matanga ti Mapa so a sara na mama ni pepe
5“Na lango baleoko na osio ti kozo nze ni, na lakui, fade ala yeke sara *matanga ti Pake ndali ti mbi KOTA GBIA.
6“Na lango baleoko na oku ti oko nze ni, ala yeke sara matanga ti Mapa so a sara na mama ni pepe ndali ti mbi KOTA GBIA. Na ya ti lango mbarambara, ala yeke te mapa so a sara na mama ni pepe. 7Na kozo lango ti yenga ni, ala yeke bongbi ti voro mbi; kua so ala yeke sara lakue, ala sara ni pepe. 8 Na lango oko oko ti yenga ni, ala yeke ya na mbi KOTA GBIA *sandaga so a yeke gbi ni kue na wâ. Na lango mbarambara ni, ala yeke bongbi ti voro mbi; kua so ala yeke sara lakue, ala sara ni pepe.”
Matanga ti kozo le ti kobe
9KOTA GBIA atene na Moïse, atene: 10Mo tene na azo ti Israel, mo tene:
“Tongana ala si ande na ya ti kodro so mbi yeke mu na ala si ala yeke fâ ale ti kobe ti ala, fade ala yeke mu akozo gba ti le ti kobe ni, ala ga na ni na wayango-sandaga. 11Wayango-sandaga ayeke ya ni na mbi KOTA GBIA lango oko na peko ti matanga ti wungo tere, tongaso, mbi yeke yeda na ala. 12Gi na oko lango so ala yeke ya na mbi gba ti le ti kobe ni, ala yeke ya nga na mbi *sandaga so a yeke gbi ni kue na wâ mbeni molenge ti taba ti ngu oko, lo so mbeni mbage ti tere ti lo abuba pepe. 13Ala yeke mu nga kilo omene ti farini so ala gbu ya ni na mafuta si ala mu na sandaga so a yeke zö ni kue na wâ titene fion ni anzere na mbi KOTA GBIA. Ala yeke mu nga litere oko na ndambo ti vin. 14Kozo titene lango so ala yeke ga na kozo gba ti le ti kobe na mbi alingbi, ataa mapa, ataa ale ti kobe so ayoro ni yorongo, ataa fini le ti kobe, ala yeke te ni pepe. So ayeke mbeni ndia so ayeke ngba ngu na ngu ndali ti ala na *ahale ti ala ti angoi kue na ndo so kue ala yeke duti daa.”
Matanga ti ale ti kobe
15“Lango oko na peko ti *lango ti wungo tere, so ti tene ngbene ye na lango so ala mu gba ti le ti kobe titene a ya na nduzu ti fa atene, a mu na mbi, fade ala yeke diko yenga kue mbarambara. 16Ti londo na lango ni so, ala yeke diko lango baleoku ngbii asi na ndade ti lango ti wungo tere, ala yeke ya na mbi, KOTA GBIA *sandaga ti fini ale ti kobe. 17Fade ala yeke mu mapa use na da ti ala, ala ga na ni, ala yeke ya na nduzu ti fa atene ala mu na mbi. Ala yeke mu kilo ota ti farini, ala zia mama ti mapa daa si ala sara na mapa ni. So ayeke akozo le ti kobe so ala yeke ya na mbi KOTA GBIA. 18Na tere ti mapa ni, ala yeke mu nga amolenge ti taba mbarambara ti ngu oko so mbeni mbage ti tere ti ala abuba pepe, koli-bagara oko na akoli-taba use. Ala yeke bongbi anyama ni na sandaga ti ale ti kobe nga na ti vin si ala yeke mu na mbi na sandaga so a yeke gbi ni kue na wâ. So ayeke sandaga so fion ni ayeke nzere na mbi KOTA GBIA. 19Ala yeke mu nga koli-ngasa oko na sandaga ndali ti siokpari ti ala; ala yeke mu amolenge ti taba use ti ngu oko na sandaga ti beoko. 20Wayango-sandaga ayeke mu mapa ni nga na anyama ni, lo yeke ya ni na nduzu ti fa atene, a mu na Nzapa. So ayeke sandaga so a zia nde ndali ti mbi KOTA GBIA si aga ye ti awayango-sandaga. 21 Gi na oko lango ni so, ala yeke iri azo ti kodro titene ala bongbi ti voro mbi. Kua so ala yeke sara lakue, ala sara ni pepe. So ayeke mbeni ndia so ayeke ngba ngu na ngu ndali ti ala na *ahale ti ala na ndo so kue ala yeke duti daa.
22 “Tongana ala yeke fâ ale ti kobe ti yaka ti ala, fade ala yeke fâ ale ti kobe so ayeke na yanga ti yaka ni pepe. Ala yeke kiri ti fâ ale ti kobe so angba so pepe. Ala yeke zia ni na awayere nga na awande. Mbi laa mbi yeke KOTA GBIA, Nzapa ti ala.”
Lango ti dango be na ti dekongo na ngia
23KOTA GBIA atene na Moïse 24ti tene na azo ti Israel, atene:
“Kozo lango ti nze mbarambara ni ayeke *lango ti wungo tere, lango ti dango be na ti dekongo na ngia. Ala yeke bongbi ti voro mbi. 25 Kua so ala yeke sara lakue, ala sara ni pepe; ala yeke mu *sandaga so a yeke zö ni kue na wâ na mbi KOTA GBIA.”
Kota lango ti zingo siokpari na li ti azo
26KOTA GBIA atene na Moïse:
27“Na lango baleoko ti nze mbarambara ni, fade a yeke duti kota lango ti zingo siokpari na li ti azo. Ala yeke bongbi ti voro mbi, ala yeke ke kobe si ala yeke ya na mbi asandaga so a yeke zö ni kue na wâ. 28Na lango ni so, fade ala yeke sara kua oko pepe, ngbanga ti so ayeke kota lango ti zingo siokpari na li ti azo, lango so a yeke sara na ndö ti ala mbeni ye so afa atene, mbi KOTA GBIA Nzapa ti ala, mbi zi siokpari na li ti ala awe. 29Zo so ake kobe na lango ni so pepe, fade a yeke tumba lo na popo ti bongbi ti azo ti Israel. 30Zo so asara kua na lango ni so, fade mbi yeke zi lo na popo ti azo. 31Ala yeke sara kua oko pepe. So ayeke mbeni ndia so ayeke ngba ngu na ngu ndali ti ala na *ahale ti ala ti angoi kue, na ndo so kue ala yeke duti daa. 32 Fade lango ni so ayeke duti *lango ti wungo tere ndali ti ala, ala yeke ke kobe. Na lango gumbaya ti nze ni na lakui, ngbii asi kekereke na lakui, ala yeke bata lango ti wungo tere ni.”
Matanga ti Akpangba
33KOTA GBIA atene na Moïse: 34Tene na azo ti Israel, mo tene:
“Na lango baleoko na oku ti nze mbarambara ni, matanga ti Akpangba ayeke duti daa. Ala yeke sara matanga ni na ya ti lango mbarambara ndali ti mbi KOTA GBIA. 35Na kozo lango ni, ala yeke bongbi ti voro mbi; kua so ala yeke sara lakue, ala sara ni pepe. 36Na ya ti lango oko oko ti yenga ni, ala yeke ya na mbi KOTA GBIA *sandaga so a yeke zö ni kue na wâ. Na lango miombe ni, ala yeke bongbi ti voro mbi si ala yeke ya na mbi sandaga so a yeke zö ni kue na wâ. So ndangba lango ti matanga ni laa; kua so ala yeke sara lakue, ala yeke sara ni pepe.
37“So ayeke akota matanga ndali ti mbi KOTA GBIA laa; ala yeke bongbi ti voro mbi, ti ya na mbi asandaga so a yeke zö ni kue na wâ, asandaga so a yeke gbi ni kue na wâ wala asandaga ti ale ti kobe, sandaga ti beoko wala sandaga ti samba, alingbi na ndia ti matanga oko oko. 38Ala yeke zia asandaga so na ndö ti asandaga so ala yeke mu ka na mbi na *lango ti wungo tere. Ala yeke zia nga ni na ndö ti aye so ala yeke mu nga na ndö ti asandaga so ala mu na be ti ala wani wala ti so ala mu zendo ndali ni.
39“Na lango baleoko na oku ti nze mbarambara ni, na peko ti so ala fâ ale ti kobe ti yaka ti ala awe, fade ala yeke sara matanga na ya ti lango mbarambara ndali ti mbi KOTA GBIA. Kozo lango ni na lango miombe ni ayeke duti alango ti wungo tere. 40 Na kozo lango ni, fade ala yeke mu anzoni le ti keke, amaboko ti mburu, amaboko ti keke so akugbe ayeke daa mingi na amaboko ti keke so ayeke na ya ti ngu; ala yeke sara ngia na ya ti lango mbarambara na dawa ti mbi KOTA GBIA, Nzapa ti ala. 41Na ya ti ngu oko oko, na nze mbarambara ni, fade ala yeke sara matanga so na ya ti lango mbarambara ndali ti mbi. So ayeke mbeni ndia so ayeke ngba ngu na ngu ndali ti ala na *ahale ti ala ti angoi kue. 42Na ya ti lango mbarambara so, ala azo ti Israel, alingbi ala lango na gbe ti akpangba. 43 Tongaso si ahale ti ala kue ahinga atene, na ngoi so mbi mu akotara ti ala na sese ti Ezipte mbi sigigi na ala, ala lango ando na gbe ti akpangba. Mbi laa mbi yeke KOTA GBIA, Nzapa ti ala.”
44Lege so Moïse afa na azo ti Israel ti sara akota matanga ndali ti KOTA GBIA laa.

Sélection en cours:

Awayango-sandaga 23: MNF2010

Surbrillance

Partager

Copier

None

Tu souhaites voir tes moments forts enregistrés sur tous tes appareils? Inscris-toi ou connecte-toi

YouVersion utilise des cookies pour personnaliser votre expérience. En utilisant notre site Web, vous acceptez l'utilisation des cookies comme décrit dans notre Politique de confidentialité