YouVersion Logo
Search Icon

Matayo 4

4
Catan obito Yecu
(Mar 1.12-13; Luka 4.1-13)
1 # Ibru 2.18; 4.15 Cutcut Cwiny Maleŋ otero Yecu wa i tim wek Catan obite. 2Ci Yecu ori kec nino pyeraŋwen dyeceŋ ki dyewor, ka lacen kec ocako neke. 3Labit dano obino ci owacce ni, “Ka in i Wod pa Lubaŋa, wac ki godi magi gulokke gudok kwon.” 4#Nwo 8.3 Ento Yecu odok iye ni, “Yam gicoyo ni,
‘Dano pe bibedo kwo ki kwon keken,
ento bedo kwo ki lok ducu ma a ki
i dog Lubaŋa.’ ”
5Catan dok otere i gaŋ maleŋ, ci ocibe ocuŋ i wi labila ot pa Lubaŋa, 6#Jab 91.11, 12 ci owacce ni, “Ka in i Wod pa Lubaŋa. koŋ ia ki malo kun ipoto piny pien yam bene gicoyo ni,
‘En biciko lumalaikane piri,’
dok bene ni,
‘Gibijoli ki ciŋgi,
wek pe iyok tyeni i kom got.’”
7 # Nwo 6.16 Yecu dok ogamo doge owacci, “Yam bene gicoyo ni, ‘Pe iom i Rwot Lubaŋani.’ ” 8Catan dok otere malo i wi got mabor adada, ci onyutte ker ducu ma i wi lobo ki deyogi ducu. 9Ci Catan owacce ni, “Magi ducu abimiyo boti, ka iryebbe iwora.” 10#Nwo 6.13 Ci Yecu owacce ni, “Nyik icit cen, Catan, pien yam gicoyo ni,
‘Wor Rwot Lubaŋani,
dok bene iti pire keken.’ ”
11Cutcut Catan oweke, ci lumalaika gubino gukonye.
Yecu ocako ticce i Galilaya
(Mar 1.14-15; Luka 4.14-15)
12 # Mat 14.3; Mar 6.17; Luka 3.19, 20 Cutcut ka Yecu owinyo ni gimako Jon gitweyo woko i mabuc, oa obino i Galilaya; 13#Jon 2.12 oweko Najaret, ci ocito obedo i Kapernaum ma tye i dog nam, i lobo Jabulon ki Naputali, 14wek lok ma yam lanebi Icaya oloko ocobbe kakare ni,
15 # Ic 9.1, 2 “Lobo Jabulon ki lobo Naputali,
yo tuŋ i nam, loka Jordan,
Galilaya pa Lurok. 16Jo ma yam gibedo i piny macol
doŋ guneno dero ceŋ madit,
jo ma yam gibedo i lobo ki i tipo
me to,
ceŋ doŋ otuc woko omenyogi.”
17 # Mat 3.2 Cakke i kare meno Yecu ocako tito lok kun wacci, “Wuŋuti, pien ker me polo doŋ onyiko cok.”
Yecu olwoŋo lucik-rec aŋwen
(Mar 1.16-20; Luka 5.1-11)
18I kare ma Yecu obedo ka wot kun rabo dog nam Galilaya, ci oneno omego aryo, Cimon ma gilwoŋo Petero ki ominne Anderiya, ka gitye ka bolo obwo recgi i nam; pien onoŋo gin lumak-rec. 19Ci olwoŋogi ni, “Wubin wulub kora, ci an abimiyo wudoko lumak dano.” 20Ci cutcut gutugi weko obwogi, gulubo kore. 21Ka dok owoto anyim manok, ci oneno omego mukene aryo, Yakobo ki ominne Jon, gin awobe pa Jebedayo, ma onoŋo gitye i yeya kacel ki wongi Jebedayo ka kubo obwo recgi, ci olwoŋogi. 22Cutcut gutugi weko yeya ki wongi Jebedayo, ci gulubo kore.
Yecu okonyo lwak dano mapol ata
(Luka 6.17-19)
23 # Mat 9.35; Mar 1.39 Yecu owoto orumo lobo Galilaya ducu, kun pwonyo i kacokkegi, dok bene onoŋo tito lok me kwena maber me ker pa Lubaŋa, ocaŋo bene kit two ducu ki kit goro ducu ki i kin dano. 24Mumiyo nyiŋe oywek i lobo Ciria ducu, ci dano gukelo jo ducu ma komgi lit bote, jo ma gitwo kit two mapatpat ki jo ma arem obwoyogi, jo ma tye ki cen maraco, jo ma twoyo two alili, ki jo ma twoyo two akweya, ci en ocaŋogi. 25Lwak dano mapol ata ma gua ki i Galilaya, Dekapoli, Jerucalem, Judaya ki loka Jordan ducu gulube.

Currently Selected:

Matayo 4: Aco85

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy