Matayo 3
3
Lok ma Jon Labatija otito
(Mar 1.1-8; Luka 3.1-9, 15-17; Jon 1.19-28)
1I kare meno Jon Labatija obino kun tito lok i tim me Judaya, 2#Mat 4.17; Mar 1.15 kun wacci, “Wuŋuti, pien ker me polo doŋ onyiko cok.” 3#Ic 40.3 Pien man aye dano ma yam lanebi Icaya otito pire ni,
“Dwan dano mo ma daŋŋe i tim ni,
Wuger yo pa Rwot,
wutir yone ocuŋ atir.”
4 #
2 Luker 1.8
Jon yam onoŋo ruko boŋo yer kinaga, kun tweyo pyere ki del, onoŋo camo bonyo ki moo kic ma i tim. 5Onoŋo pol dano gia ki i Jerucalem, ki lobo Judaya ducu, ki lobo ducu ma tye cok ki Jordan, gimol gibino bote. 6Gituco balgi, ci en batijagi i kulu Jordan.
7 #
Mat 12.34; 23.33 Ento i kare ma en oneno Luparicayo ki Lucadukayo gibino kun gimito ni en ebatijagi, owaco botgi ni, “Wun litino twol ororo, aŋa ma owaco botwu ni myero wuriŋ woko ki i akemo pa Lubaŋa ma mito bino-ni? 8Doŋ wuti gin ma nyuto ni wuŋut i kom balwu, 9#Jon 8.33 pe dok wucak tamo ni, ‘Watye ki kwarowa Abraim.’ Koŋ wunen awaco botwu ni, Lubaŋa tye ki twero me miyo gweŋ magi olokke odok likwayo Abraim. 10#Mat 7.19 Kombeddi doŋ giketo latoŋ woko i lwit yadi, yat acel acel ma pe nyak nyige mabeco, gitoŋo gireto woko piny, ci gibolo woko i mac.
11“An abitijawu ki pii pi nyuto ni doŋ wuŋut woko i kom balwu, ento ŋat ma bino luba-ni tek kata woko; pe amyero me mako war tyene. En bibatijawu ki Cwiny Maleŋ, dok ki mac bene. 12Oderone me pyeto bel tye i ciŋe, en biyubo larone woko maber, ci coko kalle dilo i dero, ento cuŋe en biwaŋo woko ki mac ma pe to.”
Jon obatija Yecu
(Mar 1.9-11; Luka 3.21-22)
13Yecu oa ki i Galilaya obino bot Jon i dog kulu Jordan, wek Jon obatija en. 14Jon onoŋo mito kwero woko, owaco bot Yecu ni, “Amito in aye ibatija an, ento in dok ibino bota ni an aye abatija in?” 15Ento Yecu odokke iye ni, “Wek koŋ doŋ obed kumeno kombeddi, pien porre botwa me cobo gin ducu ma tye atir.” ci Jon oye lokke. 16I kare ma doŋ gityeko batija Yecu, ci en okatti woko ki i pii oyotoyot; cutcut polo oyabbe, ci oneno Cwiny Maleŋ pa Lubaŋa ma bino kun lyanne piny macalo akuri, ci opye i kome. 17#Acak 22.2; Jab 2.7; Ic 42.1; Mat 12.18; 17.5; Mar 1.11; Luka 9.35 Ci dwan ocako winnye ma a ki i polo ma wacci, “Man aye Woda ma amare, ma cwinya yom i kome.”
Currently Selected:
Matayo 3: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.