Matayo 24
24
Yecu otito pi muko ot pa Lubaŋa woko
(Mar 13.1-2; Luka 21.5-6)
1Yecu okato woko ki i ot pa Lubaŋa. Ma doŋ tye ka cito, lupwonnyene gubino gunyutte gedo me ot pa Lubaŋa. 2Odok iye botgi ni, “Wuneno gin magi ducu, pe kumeno? Ada awaco botwu ni, pe gibiweko got acel mo kany ma ododde i wi wadi, ma pe gibicoro woko piny.”
Acakki me can ma bipoto i lobo
(Mar 13.3-13; Luka 21.7-19)
3I kare ma Yecu obedo i wi got Jeituni, lupwonnye gubino bote i muŋ gucako penye ni, “Tit botwa, lok man bitimme awene, dok kit gin aŋo ma binyuto dwogoni, ki agikki piny?” 4Ci Yecu odok iye botgi ni, “Wugwokke, ŋatti mo owek rwenyowu. 5Pien jo mapol gibibino i nyiŋa, ma giwacci, ‘An aye a Kricito ma Lubaŋa oyero’, ci gibimiyo jo mapol rwenyo woko. 6Dok bene wubiwinyo pi mony, ki lok ma yweko pi mony; pe wuwek tipo komwu oto woko lirut; pien koŋ myero man otimme, ento noŋo nino me agiki pud peke. 7Pien rok bilweny ki rok wadi, ki ker bene bilweny ki ker wadi, ki kec bene bipoto i lobo, ki oyeŋoyeŋ biyeŋo lobo i kabedo mapol; 8gin magi ducu gin aye acakki me te can ma bipoto i lobo.
9 #
Mat 10.22
“I kare meno gibiketo lok roro i komwu wek wunen can, gibinekowu woko; jo me rok ducu bikwerowu pi nyiŋa. 10I kare meno jo mapol bipoto, gibiketo lok roro i kingi gidotte kekengi, dok gibibedo ki adagadaga i kingi kekengi. 11Lunebi mapol ma lugoba bibino ma gibirwenyo jo mapol. 12Kit macalo tim maraco bibedo ka medde ameda-ni, mar pa jo mapol bikwe woko. 13#Mat 10.22 Ento ŋat ma biciro nio wa i agikki bilarre. 14Doŋ lok man me kwena maber me ker pa Lubaŋa gibitito i wi lobo ducu, me bedo caden bot rok ducu; ka doŋ lacen agikki piny bibino.
Can madit atika
(Mar 13.14-23; Luka 21.20-24)
15 #
Dan 9.27; 11.31; 12.11 “Doŋ ka wubineno gin mo me kwer, malik, ma balo cwiny dano, ma yam Daniel otito pire, kun ocuŋ i kabedo maleŋ (dano ma kwano myero oniaŋ iye), 16i kare meno jo ma tye i Judaya myero guriŋ woko i wi godi. 17#Luka 17.31 Dano ma onoŋo tye i wi ot pe dok olor piny me bino ka kwanyo gin mo ma tye i ode; 18ki dano ma tye i poto bene pe odok cen paco ka omo ginarukane. 19Dok mon ma giyac gibineno can i kare meno, ki mon ma gidoto litino bene! 20Wuleg wek ŋwecwu pe otimme i cwir nyo i ceŋ cabit. 21#Dan 12.1; Yabo 7.14 Pien i kare meno twon can madit atika bitimme iye, ma yam peya onen i lobo, nia wa i acakki lobo nio kwede wa onyoo, dok pe bene binen. 22Kono nene Rwot pe ojwiko kare-nu obedo manok mo, kono dano mo pe obwot; ento pi jo ma giyero, miyo gibijwiko wel nino bedo manok.
23“I kare meno ka ce dano mo biwaco botwu ni, ‘Nen, Kricito ma Lubaŋa oyero tye kany’, nyo ni, ‘Nen, tye kuca’, pe wuye. 24Pien Kricito ma lugoba, kacel ki lunebi-gu ma lugoba gibibino, gibinyuto lanyut ki tyo jami me taŋo, wek girweny jo mapol ka gitwero, wek girweny wa ki jo ma Lubaŋa oyero bene. 25Nen, doŋ atyeko tito botwu con. 26#Luka 17.23, 24 Ka ce gibiwaco botwu ni, ‘Nen, en tye i tim kuca’, pe wucit kunnu, nyo ni, ‘Tye i kicika ot ma i iye’; pe wuye. 27Kit macalo lutkot a ki yo tuŋ wokceŋ ci wil menyo piny wa yo tuŋ potoceŋ, dwogo pa Wod pa dano bene bibedo kit meno. 28#Luka 17.37 ka ma kom dano muto tye iye, acut bene gicokke kunnu.
Kit ma Wod pa dano bidwogo kwede
(Mar 13.24-27; Luka 21.25-28)
29 #
Ic 13.10; Joel 2.10, 31; 3.15; Yabo 6.12;
Ic 13.10; Ejek 32.7; Joel 2.10; 3.15;
Ic 34.4; Yabo 6.13 “Oyotoyot i ŋe can madit me kare meno bibedo kit macalo yam gicoyo ni
‘Ceŋ bicido woko macol licuc,
ki dwe bene pe biryeny,
lakalatwe bia ki i polo gipoto piny,
ki twer ducu ma i polo bene biyeŋŋe’;
30 #
Dan 7.13; Jek 12.10-14; Yabo 1.7 “ka doŋ gin ma nyuto Wod pa dano binen i polo. Ci i kare meno kaka ducu ma i wi lobo bikumo, ci gibineno Wod pa dano ka bino ki i wi pol me polo, ki twero madwoŋ, ki deyo madit. 31En bioro lumalaika ki tum ma kok maloŋo, gibicoko jone ma en oyero ki i twok piny aŋwen ducu, nia ki i agikki polo tuŋcel nio kwede wa i agikkine mukene.
Pwony i kom yat oduro
(Mar 13.28-31; Luka 21.29-33)
32“Wupwony carolok i kom yat oduro. Cutcut ka jaŋe olot, ci pote luk, ci doŋ wuŋeyo ni oro cok. 33Ki wun bene ka ce wuneno gin magi ducu, ci wuŋe ni en doŋ tye cok, tye wa i doggola. 34Ada awaco botwu ni, yalwak man pe bitum, nio waŋ ma lok magi ducu otimme. 35Polo ki lobo bitum, ento lokka pe bitum.
Ŋat mo pe ma ŋeyo nino kadi cawa meno
(Mar 13.32-37; Luka 17.26-30, 34-36)
36“Ento nino meno ki cawa meno, pe tye ŋat mo ma ŋeyo, kadi wa lumalaika ma i polo, kadi wa Wod, ento kono Lubaŋa Won keken aye ŋeyo gire. 37#Acak 6.5-8 Kit macalo ceŋ otimme i kare pa Nua, bitimme kit meno bene i kare me dwogo pa Wod pa dano. 38I kare ca ma peya pii aluka ocorre i wi lobo onoŋo gicamo, gimato, dok awobe ki anyira ginyomme, nio wa i nino ma Nua odonyo kwede i yeya; 39#Acak 7.6-24 pe gumedo ki ŋeyo gin mo nio ka pii aluka opoŋ, ci omologi woko ducu. Bibedo kit meno bene i kare ma Wod pa dano bidwogo iye. 40I kare meno co aryo bibedo i poto; gibikwanyo ŋat acel, gibiweko ŋat acel doŋ. 41Mon aryo bibedo ka rego kacel; gibikwanyo ŋat acel, gibiweko ŋat acel doŋ. 42Pi meno, wubed ma waŋwu twolo, pien pe wuŋeyo nino ma Rwotwu bibino iye. 43#Luka 12.39, 40 Ento myero wuŋe man, ni, ka ce nene won ot oŋeyo cawa mene i dyewor ma lakwo onoŋo obebino kwede, kono obedo ka kiyo piny, kono pe oweko gituro ode. 44Pi meno, wun bene wubed ma wuyubbe; pien Wod pa dano bibino i cawa ma noŋo pe wutamo pire.
Latic ma lagen ki ma pe lagen
(Luka 12.41-48)
45“Aŋa ma lagwok ot ma lagen dok maryek, ma laditte biweko dano ducu ma bedo i ode i te locce, wek opok botgi camgi i kare ma mitte? 46Latic meno tye ki gum, ma laditte ka obino onoŋo en tye ka tiyo ticce kit meno. 47Ada awaco botwu ni ladit-tu bimiye twero me loyo jamine woko ducu. 48Ento ka latic meno oloko kekene ni, ‘Laditta doŋ ogalle ka bino’, 49ci cako goyo lutic luwote, kun camo, mato dok mer kacel ki lumero, 50ladit pa latic meno bidwogo i nino ma en pe tamo pi dwogone, dok i cawa ma en pe ŋeyo, 51bipwode, ci kete kacel ki lugoba; ka ma dano gibibedo iye ka koko kun gikayo lakgi.
Currently Selected:
Matayo 24: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.