Matayo 10
10
Yecu olwoŋo lupwonnye apar wiye aryo
(Mar 3.13-19; Luka 6.12-16)
1Yecu olwoŋo lupwonnyene apar wiye aryo bote, ci omiyogi twero me ryemo cen maraco, ki me caŋo kit two ducu kadi wa goro-gu. 2Nyiŋ lukwena magi apar wiye aryo gin ene: mukwoŋo Cimon, ma gilwoŋo ni Petero, ki Anderiya ominne; Yakobo wod pa Jebedayo, ki Jon ominne: 3Pilipo ki Bartolomayo; Tomaci ki Matayo lajog-mucoro; Yakobo wod pa Alipayo, ki Tadayo; 4Cimon ma yam obedo i kin jo ma gimito locken, ki Juda me Keriot, ma odobe.
Yecu ooro lupwonnye apar wiye aryo
(Mar 6.7-13; Luka 9.1-6)
5Dano magi apar wiye aryo Yecu oorogi, kun cikogi ni, “Pe wucit i kin Lulork, pe bene wudony i gaŋ pa Lucamaria mo, 6ento wucit bot jo Icrael, ma gitye calo romi murwenyo. 7#Luka 10.4-12 I kare ma wutye ka wot wutit lok, kun wuwaco ni, ‘Ker me polo doŋ onyiko cok.’ 8Wucaŋ lutwo, wucer jo muto, wucaŋ ludobo wek gulonnye, wuryem cen maraco. Wun wugamo nono laboŋo cul mo, wumi bene nono laboŋo cul. 9Pe wuwot ki jabu, kadi ryal, kadi lim mo i del pyerwu, 10#1 Kor 9.14; 1 Tem 5.18 pe wuter kadi kicaa mo me wotwu, kadi ki bamo kanyi aryo, kadi war tyen, kadi ki odoo; pien latic myero gimiye cam ocam. 11Gaŋ madit nyo paco mo ma wudonyo iye, koŋ wuniaŋ aŋa ma myero ma bedo iye, ci wubed bote nio waŋ ma wua ki kenyo. 12Ka wuedonyo i ot koŋ wumot dano ma i ot meno. 13Ci ka ot meno myero, wumi kuc i kom jo me ot meno; ento ka ce pe myero, ci wuwek kucwu odwog cen botwu. 14#Tic 13.51 Ka ce ŋat mo pe bijolowu nyo pe biwinyo lokwu, ci wuteŋ apwa woko ki i tyenwu i kare ma noŋo wua wuweko ot nyo gaŋ meno. 15#Mat 11.24; Acak 19.24-28 Ada, atittiwu ni, i nino me ŋolo kop can pa Codom ki Gomora bibedo tworatwora, ento can ma gibikelo i kom gaŋ meno doŋ bikato.
Ayelayela ma bibedo i kare me anyim
(Mar 13.9-13; Luka 21.12-17)
16 #
Luka 10.3
“Nen, doŋ acwalowu me cito woko macalo romi i kin orudi; pi meno wubed ryek calo twol dok wubed laboŋo bal mo i komwu calo akuri. 17#Mar 13.9-11; Luka 12.11, 12; 21.12-15 Dok wugwokke i kom dano; pien gibiterowu i lukiko, dok gibigoyowu i kacokkegi, 18gibiywayowu giterowu i nyim luloc ki luker-gu pira, wubitito lok ma bedo caden botgi ki bot Lurok bene. 19Ka giterowu i lukiko, pe wubed ka tamo kit ma myero wulok kwede, nyo kit lok aŋo ma wubilokone; pien lok ma myero wuloki gibimiyowu i cawa meno; 20pien pe wun aye wubilok, ento Cwiny Maleŋ pa Wonwu aye bilok ki i iwu. 21#Mar 13.12; Luka 21.16 Omego bimiyo ominne ni ginek woko, ki wego bene bimiyo latinne ni ginek woko, ki litino gibitugge i kom lunyodogi, gimiyo lunyodogi ni ginekgi woko; 22#Mat 24.9; Mar 13.13; Luka 21.17; Mat 24.13; Mar 13.13 dok dano ducu bikwerowu pira. Ento ŋat ma ciro kun diyo cwinye nio i agikki bilarre.. 23Ka inen guketo ayela i komwu i gaŋ acel, ci wuriŋ woko i gaŋ ma cok kwede; pien ada awacciwu ni, pe wubiwoto i gaŋi me Icrael wurumo woko ducu, ma noŋo peya Wod pa dano obino.
24 #
Luka 6.40;
Jon 13.16; 15.20 “Dano ma pud gipwonyo apwonya pe bedo dit makato ŋat ma pwonye, kadi latic bene pe bedo dit makato laditte; 25#Mat 9.34; 12.24; Mar 3.22; Luka 11.15 ento romo ka dano ma gipwonyo-ni odoko calo ŋat ma pwonye, ki latic bene ka odoko calo laditte. Ka onoŋo gulwoŋo won ot ni Beeljebul, ci doŋ jo ma i pacone gibilwoŋogi ki nyiŋ marac ma rom mene?
Ŋat ma myero dano olwor
(Luka 12.2-9)
26 #
Mar 4.22; Luka 8.17 “Pi meno, pe wulworgi; pien pe tye gin ma giumo ma pe gibiyabo ka maleŋ, kadi ki gin ma gikano ma pe biŋene. 27Gin ma awaco botwu i colpiny, myero wutit i leŋpiny; ki gin ma gikwilo akwila i itwu lawewe, wutuc lokke wa i wi labila ot. 28Pe wulwor jo ma neko kom, ento pe gitwero neko tipo; ento myero wulwor ŋat ma twero neko tipo ki kom ducu i Geena. 29Ojwinyojwiny aryo pe gicato pi cente apar? Ento mo acel pe poto piny i ŋom ma Wonwu pe ŋeyo. 30Kadi bed wa yer wiwu doŋ gikwanogi woko liweŋ. 31Pi meno, pe wulwor; pien piwu tek twatwal makato pi ojwinyojwiny mapol. 32Pi meno dano ducu ma bituco nyiŋa i nyim dano, an bene abituco nyiŋe i nyim Wora ma tye i polo, 33#2 Tem 2.12 ento ŋat ma bikwera i nyim dano, an bene abikwere woko i nyim Wora ma tye i polo.
Pe kuc ento pala lucwan
(Luka 12.51-53; 14.26-27)
34“Pe wutam ni abino me kelo kuc i lobo; an pe abino me kelo kuc, ento pala lucwan. 35#Mika 7.6 Pien abino me poko kin dano woko ki wonne, nyako bipokke woko ki minne, ki ci-wod bene bipokke woko ki dane. 36Lukwor pa dano bibedo jo ma i pacone. 37Ŋat ma maro wonne nyo minne makato an pe myero me bedo danona; ki ŋat ma maro wode nyo nyare makato an pe myero me bedo danona. 38#Mat 16.24; Mar 8.34; Luka 9.23 Dok bene dano ma pe tiŋo yatariyane kun lubo kwede kora pe myero me bedo danona. 39#Mat 16.25; Mar 8.35; Luka 9.24; 17.33; Jon 12.25 Dano ma noŋo kwone, birwenyo kwone woko arwenya; ento ma rwenyo kwone pira binoŋo.
Bakacic ma dano binoŋo
(Mar 9.41)
40 #
Luka 10.16; Jon 13.20;
Mar 9.37; Luka 9.48 “Dano ma jolowu noŋo ojolo an, ki ma jola noŋo ojolo ŋat ma oora. 41Ŋat ma jolo lanebi ni pien obedo lanebi, bilimo bakacic pa lanebi; ki ŋat ma bijolo dano ma kite atir ni pien dano ma kite atir, bilimo bakacic ma rom ki pa dano ma kite atir-ri. 42Dok bene dano ma bimiyo pii maŋic me amata bot ŋat acel i kom jo magi matino ni pien en obedo, lapwonnyena, ada awacciwu ni, pe bikeŋ bakacicce.”
Currently Selected:
Matayo 10: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.