APAN AQAO: 37
37
Yoseb We' Yao" Mao: Nhaung: Qe
1Yaku wa yao: pho" na: lo: ra" Khanan mung" mae xo' na: ra". 2Ce: ru wa Yaku nho: byu qe: mhomyi: ngad: ra".
Yoseb wa daxe: nhad' zin ngad mung:- yao: pho" nho: myingai ngad ko" ra" Bila we' Zilpa tao: yauggai zo: qe- yao: mao: bam we' daga" yao- cad' be, jham re gun caung yang: na: ra". Yoseb wa yao: mao: bam kad' ra" magai: ra" khyo lau thoe re yao: pho" re lota" kyo" ra".
3Yaku wa yao" yauggai zo: alhab' mo, tho' re Yoseb re je: jhid'de; ra"- pe"mung:ga"re yao: wa Yaku mao: thao re khau yang: ngad: ra". Yaku wa Yoseb re adao: bau: qhang lo, de dakhye' re khyab' byid' ra". 4Yoseb nho: yao: mao: bam wa yao: bam: yao: pho" Yaku wa yao: bam re jhid'de; ra" tho' mae Yoseb re je yang: jhid'de; ru myao gelao"- yao: bam wa yao: nhaung: re jhid' jhid' kug' kug' manug: jhau losho' gyai nghang" ako".
5Damyi mae Yoseb wa yab mo, dalam: mo, mung: ai: khyo re yao: mao: qere ta" kyo: lao"- yao: bam wa yao: re je yang: lhao" nghang" ako". 6Yao: wa- nga" yab mo, re tae" gyo" qu" ge,- 7Ngotao ho' alhab' wa yothaung: mae gaug dang: jham re myag: na: bam: au:- nga" gaug dang: wa to" li" mung: din: za: ye; jo; ra". Naonhaung" nho: gaug dang: jham wa nga" gaug dang: re lhang" kham" ci mung: aire goe; pa" ako"- ga: ta" ra". 8Yao: mao: bam wa- nao wa kho:kham boe" li" mung: ngonhaung" re eib nae" ein: myid: jho: i? ga: myid' ako". Airumung: yao: bam wa yao" yab mo, jham: mathao mae we' yao: bam: khyo we' sin: yang: yao: ta" ra" dao: mathao mae je yang: Yoseb re nghang" ako".
9Ai: thao Yoseb wa yab mo, gatau dam: mo, mung: yao: mao: bam re ngo wa yab mo, mae- ba- lho"- kyi daxe: dace' wa ngore goe; pa" ko" rure myao: ga: ta" kyo" ra".
10Yoseb wa ai: yab mo, re yao: pho" rere: ta" kyo: mung:- yao: pho" wa yao: re ai wa pe" ja" yab mo, ngad: ra" i? Ni" myhi"- ni" mao: bam re we' ngo wa nao jhao" lo mung:- nao re goe; pa" li" genae" ein: nao myid: jho: i? ga: qeim: ra". 11Yoseb nho: yao: mao: bam wa yao: re myid nug' ako". Ngadqere: yao: pho" wa ai: khyo alhab' re xam" ci: ra".
Yoseb Aung: Zo: Qhug' Mung: Egutu Mung" Khyo Jhui" Lo" Ko" Ra" Khyo
12Daba mae Yoseb yao: mao: bam wa yao: pho" nho: yao cad' be, kyaung" jham re yezam: nae" qhid' mae" Shekhem khyo ye" byaug gethao re- 13Yaku wa Yoseb re ngo wa nao re ni" mao: bam yao- cad' be, zam" na ko" ra" Shekhem: khyo nhao: ke' nug: ra"- ga: ta" ra".
Yoseb wa ngo jin" jin" ngad:- ga: tau" ra".
14Yao: pho" wa Yoseb re- ni" mao: bam qao" na ko" la,- yao- cad' be, jham pe" maqo ko" la,- yequ" mung: ngojhao" lodam: ta" kyo: la,- ga: ta" ra". Airumung: yao: pho" wa- Hebron lao: geim: mae" Yoseb re nhao: ke' ra".
Yoseb wa Shekhem: khyo joe" ye: mung:- 15Ai bam mug: khaung: re yedu" lae" qin" na: au:- byu dayaug yao: re the' myao mung:- yao: wa Yoseb re- nao pe" nam qho: lhau: i? ga: myid' ra".
16Yoseb wa- ngo wa yao: bam: yao- cad' be, jham zam" na ko" ra" nga" mao: bam re qho: lhau: ru ngad: yao: bam khai: mae na ko" rure nao ngore qo" ta" kyo: nae" i? ga: phaug' tau" ra".
17Ai: yaug wa- yao: bam to" lo" byaug vako" ra". Yao: bam Dothan khyo ye" lo" na ko" ga" thoe re ngo the' gyo"- ga: ta" ra". Airumung: Yoseb wa yao: mao: bam: thao cao" khe' ye: mung: Dothan mae yao: bam re yeqhug' ra".
18Yao: bam wa Yoseb re va: mae" the' myao mung: Yoseb yao: bam jhao" majoe" shire- yao: bam wa yao: re khug' se' pye' nae" myid: phyid' to" ako". 19Yab mo, mo, yaug cekhyo li" ava"- 20Sage, ana" yao: re se' pye' mung:- yao" mao gaung re qid mabo: ra" qid thaung: dalam: mae pye' zaui: pye' gelang:- seyo: gug'nyhug' dadau" yang: yao: re bin" se' pye' ra" ein: ngonhaung" qo" ta" ra". Ailao" yao" yab mo, jham pe" boe" li" ko" rure ngonhaung" myao: li" nae"- ga: yao: cao: jho" ta" ako".
21Yao: bam: dao: re Rubin: the' gyo: mung:- Yoseb re khyad' yu nae" seim" ra". Airumung: yao: wa ngonhaung" yao: re mase' gejhao"- 22Din" pyad' yo mae" ce: qid thaung: khug khyo yao: re pye' za: pye' zaui: ke' gelang:- ngadqere: yao: re dae date' ge,- ga: ta" ra". Yao: cedao: re ta" ru wa- yao: bam: lo, mae" Yoseb re khyad' yu mung: yao: pho" jhao" dam: nhao: ke' byid: nae" pha,jhi" khyug' ru ngad: ra". 23Yoseb yao: mao: bam jhao" joe" do, li" lao"- yao: bam wa Yoseb nho: bau: qhang lo, de, re khyad' pye' byid' ako". 24Ai: thao yao: bam wa yao: re jhui" yu mung:- qid kin" byaug: ra" qid thaung: khug khyo Yoseb re pye' zaui: pye' ako".
25Yao: bam vae: zo" na ko" au:- Gilead mung" mae" Egutu mung" khyo gyaung: su" li" ko" ra" Ishmae byu daphung: re yao: bam nyag din taung" myao: ako". Yao: bam: gola:u jham mae nae pyo" ra" sag' gyid: Mura jham tho: ako". 26Yuda wa yao: mao: yao: nhaung: bam re- ngonhaung" nho: yao:nhaung: re se' pye' mung: ai: khyo re nghoe' to: yang: ngonhaung" pe" akyu" bo nae" i? 27Yao: re Ishmae byu qere aung" pye' gelang: Airulao"- ngonhaung" wa yao: re dae mate' ca" nae"- ai: tho' mago"- yao: wa ngonhaung" yao" sa: sho: yao: ngad: ra"- ga: ta" ra". Yao: mao: yao: nhaung: bam wa aire myid vang" ako". 28Midian phaga: byu damyo" ai: nhae khyo joe" lo gelao"- yao: mao: bam wa Yoseb re qid thaung: mae" she: thug' yu gemung:- Ishmae byu qere ngaui shid' xe we' yao: re aung" pye' mung:- ai bam wa Yoseb re Egutu khyo jhui" lo" ako".
29Rubin wa ai: qid thaung: khyo dam: tug' joe" lo mung:- Yoseb aimae mana lo" rure lomyao lao"- yao: wa kaug' mung: yao" mai bau: jham re lao" cad' pye' ra". 30Yao: wa yao:nhaung: bam jhao" tug' lo mung: aitau mae zolau: zo: mana lo:ngad: ra"- ngo pe" ru: kad' lo nae" i? ga: ta" ra".
31Ai: thao yao: bam wa cad' be, dadau: re se' mung: Yoseb nho: bau: qhang re ai: sa: mae deim" jam: ako". 32Yao: bam wa ai: bau: qhang re yao: bam: yao: pho" jhao" cilo" gemung:- ngonhaung" ceru re the' myao:- ceru wa ni" zo" nho: bau: mangad: i? ga: ta" ako".
33Yaku wa aire qu" xam: mung:- ngad: ra"- ai wa yao" bau: ngad: ra". Seyo: gug'nyhug' yang bin" se' pye' vanhaung- nga" zo: Yoseb wa mhan" mhan" bin" mhan" pye' ru qhug' vanhaung- ga: ta" ra". 34Yaku wa kaug' yang: yao" mai bau: jham re lao" cad' pye' mung:- jid: mo" mai bau: gaug; ve; ra". Yaku wa yao: zo" mathao mae myao" sho' kaug' ngug: ra". 35Yao" nho: yauggai myiqe: zo: qe wa yao: re nhag' li" tang" byid' ako". Ngadqere: yao: wa aire ha: pye' mung:- ngo wa nga" zo" mathao mae kaug' ngug zo" re" movo: mug: khyo gyo" ye: zai ngad:- ga: ta" ra". Airumung: yao: wa xo' yang: yao: zo: Yoseb mathao mae kaug' ngug: ra".
36Ai: ayo, gyo: mae Midian byu qe wa Yoseb re Egutu mung" mae kho:kham kho" zaung" ra" Gyezug: pho" ngad mung: kho:kham nho: zug: dayaug ngad: ra" Potipha re aung: byid' pye' ako".
Currently Selected:
APAN AQAO: 37: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009