APAN AQAO: 34
34
Dina Re Deim" Zag: Yab: Ra" Khyo
1Daba mae Yaku we' Lea tao: myiqe: zo: Dina wa Khanan myiqe: qe damyo" jhao" lae" ye" ra". 2Aimung" mae" au: jhaung ngad: ra" Hivi byumyu" Hamo nho: yauggai zo: Shekhem wa Dina re the' myao lao" yao: wa Dina re jhui" yu mung: deim" zag: yab: pye' ra". 3Ngadqere: Shekhem wa ai: myiqe: nau" gyai qu" ngaui taung" ngad mung: yao: re jhid'de; yang: yao" jhid'de; myid re qo" yu nae" qhid' mae" qam: ke' ra". 4Shekhem wa yao: pho" re- nga" yham sang myhi" khyo" ce: myiqe: nau" re nao yu byid: nae" rure ngo o: ra"- ga: ta" ra".
5Yaku wa yao" myiqe: zo: re nga: yeim ru qhug' va" rure ba ngadqere: yao" yauggai zo: qe wa yao" gug'nyhug' jham we' daga" pa: din" khyo na: jo, shiko" ruyang yao: bam joe" lo sho'- Yaku wa pe" makad' lo: na: ra". 6Shekhem nho: yao: pho" Hamo wa Yaku we' yejho" qhug' nae" thug' ye" lo" ra". 7Ai: au: re Yaku nho: yauggai zo: qe wa pa: din" mae" joe" lo: na: ako". Ai: khyo re yao: bam the' gyo: gelao"- Shekhem wa Yaku nho: myiqe: zo: re deim" zag: yab: ra" khyo" yang Israel byumyu" qere maphug' makhyad' pye' mung: airu: kad' ruyang yao: bam wa gyai nhag' no mung: nhag' yo" ako". 8Hamo wa Yaku re- nga" zo: Shekhem wa ni" myiqe: zo: re jhid'de; ava". Jeju khyo" yao: re lo, xo' xo' yu nhao wa,- 9Ni" byu qe we' nga" byu qe yao: cao: myi: jho" yu genae" khyo re nga" shid' yaug jho" myid vang" khyo kad' to: lang:- 10Ailao"- nao wa ce: ngonhaung" mug: mae ngonhaung" we' daga" qo" na: ra". Nao yao: nug: ra" jo, qo mae na wa, galin: gago: phaga: ga: mung: jo,nho" zai yo sang: yu wa,- ga: ta" ra".
11Ai: thao Shekhem wa Dina nho: yao: pho" we' yao: maung qere ce: khyo re qad byid: gela,- naonhaung" qo: ja: pe" ngadqere: ngo byid: nae". 12Naonhaung" pe" ja" jhaung qhu" o ko" rure ngore ta" gela,- naonhaung" o: ra" nho" vag ke' nae". Naonhaung" yao: re ngo we' za: lo, xo' yu nhao genae" ngad: re wa naonhaung" pe" ja: mho' ngadqere: ngo byid: nae"- ga: ta" ra".
13Shekhem wa yao: tao ho' nhae: mo" Dina re qho' phyo' pye' va" ruyang- Yaku yao: zo: qe wa Shekhem we' yao: pho" Hamo re pha,jhi" khyug' yang: phaug' tau" ako". 14Yao: bam wa Shekhem re ngonhaung" wa ngonhaung" nhae: mo" re au: qid lhai: khyo makham: yu: ra" yauggai dayaug we' lo, xo' xo' nae" akhang" maqo" byid: ngad: ra". Airu: kad' re wa ngonhaung" qhid' mae" aqho' aqhid ngad: ra". 15Ni" byu yauggai qe alhab' au: qid lhai: khyo re kham: yu: ra" khyo" yang naonhaung" wa ngonhaung" we' dakhyo: za: ngad lao" za: ngonhaung" qo" myid vang" ra". 16Ailao"- ngonhaung" wa naonhaung" phaung mae na mung: myi: jho" yu nae" khyo re myid vang" nae" ngonhaung" wa naonhaung" we' byumyu" daja: za: boe" li" nae" ngad: ra". 17Ngadqere: ngonhaung" ta" ra" dao: re naonhaung" magyo:- au: qid lhai: khyo re makham: yu ko" re wa ngonhaung" wa Dina re jhui" yu mung: cemae" to" lo" naeva"- ga: ta" ako".
18Ce: dao: wa Hamo we' yao: zo: Shekhem pha: qhid' mae" gyo" ngaui nhohab ngad: ru we'- 19Shekhem wa Yaku nho: myiqe: zo: re jhid'de; ruyang pha,jhi" byid' ru we' dakhyo: dalhang: dae khae: yu: ra". Yao: wa yao" yham byu qe mae" akhyag: thao" ra" yaug ngad: ra".
20Hamo we' yao: zo: Shekhem pha: wa vomo" kham: dung: mae" zabphaung jo, qo khyo ye: mung:- yao: pha" nho: vobyu cao: qere- 21Ce: byu qe wa ngonhaung" we' nge; ako". Yao: bam re ce: mug: mae ngonhaung" we' daga" na nhao: mung:- galin: gago: du" lhau nhao gelang:- mug: myid wa yao: bam: qhid' mae" re: laug sho' qi" ra". Yao: bam: myiqe: zo: qe rere: ngonhaung" yu mung:- ngonhaung" re: yao: bam re myi: byid: gelang:- 22Ngadqere: ce: byu qe wa yao: bam au: qid lhai: khyo re kham: yu: ru we' dakhyo: ngonhaung" amyu" yauggai qe alhab' au: qid lhai: khyo re kham: yu lao" za: ngonhaung" phaung mae na mung: byu damyu" za: boe" nae" khyo re myid vang" li" genae". 23Yao: bam: gug'nyhug' jham alhab' we' yao: bam sang: ra" gu: gatau alhab' wa ngonhaung" mae" mangad: nae" i? Airumung: yao: bam re ngonhaung" phaung mae na nhao nae" myid vang" gelang:- ga: ta" ako". 24Vomo" byu qe alhab' wa Hamo we' Shekhem pha: nho: dao: vhao" re myid vang" gemung:- yauggai alhab' mo, au: qid lhai: khyo re kham: yu: ako".
25Sam ba thao re ai: yauggai qe au: qid lhai: khyo kham: yu yang: dae no: na shiko" au:- Yaku yao: zo: bam mae" Simon we' Dina yao: mao: Levi shid' tao wa shae dayaug dakhyae: yu: ci yang: mabeim: maso: na: jo, ko" ra" vomo" khug khyo vao ye: mung:- Hamura we' yao: zo: Shekhem: bobo yang: yauggai alhab' re yese' pye' ako". 26Ai: thao yao: shid' tao wa Shekhem nho: yham mae" Dina re jhui" yu yang: phao: lo" ako". 27Airu bin: se' thao Yaku nho: yauggai zo: qe wa yao: bam: nhae: mo" re qho' phyo' ra" lage, phaug' ra" khyo" vogaung: re phyo' zo" pye' ako". 28Yao: bam wa gug'nyhug' jham- nung: jham -loze jham- vomo" khug mae we' yo mae jo; ra" gatau" zai ja: khao: ngo" re lhad' yu: pye' ako". 29Yao: bam wa phug' de; ra" ja: alhab'- myiqe:- zoshao qe alhab' re we' yham jham mae" zai ja: khao: ngo" re tai: phao: lo" ako".
30Yaku wa Simon we' Levi tao re- ni" shid' tao wa ngore aqug: akhai: qhug' nhao: avako". Ana" Khanan byu qe Perizi byu qe- gatau ce: mug: mae na: ra" mo, yaug khao: ngo" wa ngore nghang" li" genae". Ngo wa yauggai myo: sho' maqo"- yao: bam alhab' yang: ngore gye kad' yang: ngore li" lhe: ko" ngad: re- ngomho' yham byu qe alhab' geim" se' pye' ru qhug' li" nae"- ga: ta" ra". 31Ngadqere: yao: shid' tao wa ngonhaung" wa ngonhaung" nho: nhae mo" re shava myhi" we' dakhyo: kad' rure akhang" maqo" byid:- ga: phaug' tau" ako".
Currently Selected:
APAN AQAO: 34: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009