APAN AQAO: 30
30
1Ngadqere: Rakhela wa Yaku re zo: dau dayaug re: makhau byid: ngad: ra". Airumung: yao: wa yao: bai: re myid nug' li" mung: Yaku re ngore zo: dau byid: la,- mangad: lao" wa ngo shid: li" nae"- ga: ta" ra".
2Yaku wa Rakhela re nhag' yo: mung: ngo wa Mao"So: jo, qo mae maqo" yu ngad: ra". Yao: wa nao re zo: dau maqo" nae" tam" to: yaug ngad: ra"- ga: ta" ra".
3Ailao" Rakhela wa cemae nga" jeim myhi" Billa na:ra"-yao: we' yab wa, airulao" yao: wa nga" qhid' mae" ngore zo: dau qo" khau byid' li" nae" ngad: ra". Ceru: yao: khyo" yang ngo wa yao: myhi" dayaug qo" boe" lo zai ngad: ra"- ga: ta" ra". 4Airumung: Rakhela wa Billa re yao" yham sang pho" re byid' ra". Yaku wa Billa we' gaung sho: jho" zam" ako". 5Billa wa gaung la" li" mung: Yaku re yauggai zo: dayaug khau byid' ra". 6Ailao" Rakhela wa Mao"So wa nga" bo: de,yang: dao: kho' byid' ava". Yao: wa nga" akyu" mho' thoe re the' gyo: mung:- ngore yauggai zo: dayaug byid' ava"- ga: ta" ra". Aimung: Rakhela wa yao: re Dan ga: mhang" ra". 7Billa wa gaung dam: la" li" mung: Yaku re yauggai zo: shid' yaug ein: yaug khau byid' ra". 8Rakhela wa- ngo wa nga" bai: we' gyai jho" qhao: va"- ngadqere: ngo aung va"- ga: ta" ra". Aimung: Rakhela wa yao: re Nabhtali ga: mhang" ra".
9Lea wa zo: dau khau: ru thang: pye' va" rure ba lao"- yao" jeim myhi" Zilpa re yham sang myhi" kad' nae" khyo" Yaku re byid' ra". 10Airumung: Zilpa wa Yaku re yauggai zo: dayaug khau byid' ra". 11Lea wa- ngo wa zhau: vha: gai va"- ga: ta" ra". Aimung: Lea wa yao: re Gad ga: mhang" byid' ra". 12Zilpa wa Yaku re yauggai zo: gatau dayaug dam: khau byid' ra". 13Lea wa ngo wa ngaui lho" ra". Ana" myiqe: qe wa ngore ngaui lho" yaug ga: mhang" li" genae"- ga: ta" ra". Amung: yao: re Ashe ga: mhang" byid' ra".
14Jung: gaug yad yo, gyo: mae Rubin wa Yothaung: khyo ye: mung: bo, de, cid' shi: re yemyao ra". Rubin wa aire yao: myhi" Lea jhao" cilo byid' ra". Rakhela wa Lea re jeju we' ni" zo" nho: bo, de, cid' shi: ngore dajhid' byid: la,- ga: mho' ra".
15Lea wa nao wa nga" yham sang pho" re lhad' ru za: maga" shi i? Ana" nao wa nga" zo" nho: bo, de, cid' shi: re lhad' yu nae" lhao" re: seim" na: i?- ga: tau" ra".
Ailao" Rakhela wa nao ngore ni" nho: bo,de, cid' shi: byid: nae" ngad: re wa ana" myi nao Yaku we' qo" yab zai ngad: ra"- ga: ta" ra".
16Myi" thao Yaku yothaung: mae" joe" vao lo lao" Lea wa yao: re yetug: yu mung:- nao wa ana" myi ngo we' yab zai ngad:-pe"mung:ga"re ngo wa nga" zo" nho: bo, de, cid' shi: re ni" qhid' mae" aphug' byid' to: va"- ga: ta" ra". Airumung: ai: myi Yaku wa Lea we' gaung sho: jho" zam" ako".
17Mao"So wa Lea nho: akyu" mho' thoe re tau: byid: mung: yao: wa gaung la" li" yang: Yaku re yauggai zo: ngo" yaug ein: yaug re khau byid' ra". 18Ailao" Lea wa ngo wa nga" jeim myhi" re nga" yham sang pho" re byid: va" ruyang Mao"So wa ngore aphug' jhaung qhu" byid' ava"- ga: ta" ra". Aimung: Lea wa yao: zo: re Isakha ga: mhang" ra". 19Lea wa gaung dam: la" li" mung: Yaku re yauggai zo: kyaug' yaug ein: yaug khau byid' ra". 20Ailao" yao: wa Mao"So wa ngore jhaung qhu" gai byid' ava"- ngo wa yao: re yauggai zo: khyaug' yaug khau byid: va" ruyang ana" wa nga" yham sang pho" wa ngore khae: yu nae" va"- ga: ta" ra". Airumung: Lea wa yao: re Zebulun ga: mhang" ra". 21Ai: thao re Lea wa myiqe: zo: dayaug khau: ra". Yao: re Dina ga: mhang" byid' ra".
22Ai: thao re Mao"So Rakhela re myid: beim: byid' ra". Yao: wa Rakhela nho: akyu" mho' thoe re tau: byid: mung:- yao: re zo: dau khau nhao: ra". 23Rakhela wa gaung la" li" mung: yauggai zo: dayaug khau: ra". Yao: wa Mao"So wa ngore yauggai zo: dayaug re byid' ra" khyo" yang myo, nho ngai: rure yu: pye' ava". 24Asang wa ngore yauggai zo: gatau dayaug byid: vashao:- ga: ta" ra". Aimung: Rakhela wa yao: re Yoseb ga: mhang" byid' ra".
La Ban We' Yaku Aphug' Jho" Thad' Ra" Khyo
25Yoseb khau thao re Yaku wa La Ban re ngo nga" pho" yham khyo qo" tug' lo" nae" qhid' mae" ngore akhang" byid: la,- 26Nao re ngo mau" zaui: byid: yang: ngo qo" yu: ra" nga" yham sang myhi" bam re we' nga" zo: qe re ngore byid: la,- amung: ngo to" lo" nae". Ngo nao re khoqhi" gai sho' caung da" byid: va" rure nao ba: ra"- ga: ta" ra".
27Ailao" La Ban wa- ngore ce: dao: ta" nhao la,- Asang wa ni" mathao: yang ngore shaman" byid: va" rure Byo: qam: so' khyo" ba: yu va". 28Ni" nho: lao jhao: phug' jham re ta" la,- ngo byid: nae"- ga: ta" ra".
29Ailao" Yaku wa ngo wa ni" qhid' mae" khoru: mau" zaui: byid: va" ru we' ngo gun caung yang: ni" nho: yao kyaung" cad' kyaung" jham khonho" je" li" va" rure nao ba: ra". 30Ngo majoe" li" shire nao wa dajhid' za: qo" ru wa gyai laug sho' myo" li" ava". Asang wa ngo khai: ye: khai: nao re shaman" byid' ava" ana" wa ngoyao" qhid' mae" kad' yu nae" ayo, ngad: ra"- ga: ta" ra".
31La Ban wa nao re ngo pe" byid: zai i? ga: myid' ra". Ailao" Yaku wa ngo wa lao jhao: phug' pe" re: ma-o ngad: ra".
Ce: pha,jhi" byid' ra" khyo re nao myid vang" yang: ngad: re wa ngo wa ni" yao kyaung" cad' kyaung" jham re xo' yang: gun caung byid: nae". 32Ana" ba ni" yao kyaung" cad' kyaung" jham re cao" qu" nhao mung: yao nau" ano, dau: khao: ngo" re we' cad' be, nau" ataug' dau: khao: ngo" taung" yu: to: nae" akhang" byid: la,- aigu: wa ngo o: ra" lao jhao: phug' alhab' ngad va"- ga: ta" ra". 33Ngo din:man: rure thao phyao: nao laui laui za: ba zai ngad: ra". Nao nga" lao jhao: phug' re li" ca: qu" ra" au: ngo wa- ataug' atung" mangad: ra" cad' be, dadau: dau: qo" yang: ngad: re- mangad: lao" yao ano, mangad: ru dadau: dau: qo" yang: ngad: re ai wa khug' to" ru ngad: rure nao ba: li" nae"- ga: ta" ra".
34Ailao"- La Ban wa ngo myid vang" ra"- nga" shid' ug zo: nao pha,jhi" byid' ru we' dakhyo: kad' lang:- ga: tau" ra". 35Ai: ba re La Ban wa akhyo: atung" mung: ra" cad' be, lo: jham re we' akhyo: ataug' atung" mung: ru we' akhyo: aphyu: yang tung" ra" cad' myhi" jham re khyin: pye' ra". Yao: wa yao ano, alhab' rere: khyin: pye' ra". Aimung: aijham re caung nae" qhid' mae" yao" yauggai zo: qe re mau" byid' ra". 36Aimung: ce: yao kyaung" we' daga" Yaku mae" sam ba su" ra" jo, qo khyo ye" lo" ra". Yaku wa La Ban nho: dang: ra" gug'nyhug' kyaung" jham re caung byid' ra".
37Ailao" Yaku wa Libna gae- Luza gae- Almon gae anyug akaung jham mae" thau: yu mung:- akaung jham mae aphyu khyo: sho' akaug' daqhae: re qhid' pye' ra". 38Aimung: Yaku wa ai: sag' kaung jham re yao jham qid shaug' ko" ra" thaung: lhao: qhid' au: mae khyo" to" ra". Gug'nyhug' jham qid shaug' nae" joe" lo gelao" amyug: jho" cao" geyang: Yaku wa ai: akaung jham re aitau mae to" ra". 39Airumung: cad' be, jham ai: sag' kaung jham: qhid' au: mae amyug: do, gelao"-cad' be, jham wa atung"- akhyo: khyo" ra" cad' nau" jham xao" ako".
40Yaku wa yao jham re cad' be, jham we' kho' to: mung: La Ban nho: yao kyaung" cad' kyaung" jham mae" ataug' we' ano, jham: shad' khyo myo, nho qang yang: nha: to" ra". Ceru: Yaku wa yao: yao" yao kyaung" cad' kyaung" re kad' yu mung: La Ban nho: gug'nyhug' jham we' gatau kho' to" ra".
41Qam: bo: ra" gug'nyhug' jham amyug: do, gelao" ai: sag' kaung qhid' kheim: mae amyug: cao" geshao: ga: Yaku wa ai: sag' kaung jham re yao: bam: qhid' kheim: qid thaung: lhao: tau mae khyo" to: byid' ra". 42Ngadqere: yao: wa qam: nang" ra" gug'nyhug' jham: qhid' kheim: mae wa ai: sag' kaung jham re mato: byid: ngad: ra". Mamyao" re qam: nang" ra" gug'nyhug' alhab' wa La Ban nho: ngad mung: qam: bo: ra" gu: alhab' wa Yaku nho: ngad: ra". 43Ceru: kad' mung: Yaku wa gyai qo" yaug boe" li" ra". Yao: wa yao kyaung" jham- jeim jham- Gola:u jham- loze jham myo: sho' qo" li" ra".
Currently Selected:
APAN AQAO: 30: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009