YouVersion Logo
Search Icon

APAN AQAO: 27

27
Isag Yaku Re Shaman" Byid' Ra" Khyo
1Ana" Isag wa mao: mung: myo, jid: byaug: ra". Yao: wa yao" zoqhid' Eso re khai: yu nhao mung:-
Yao: re nga" zo: we"- ga: ta" ra". Eso wa na: ga: tau" ra".
2Ailao" Isag wa- ngo wa mao: va" rumung: mamyao" re shid zai ngad: rure nao ba: myao gau ngad: ra". 3Ni" lo, la: we' ni" myo: re yu: ci yang: seyo khyo ye: mung: nga" qhid' mae" sho: dadau: yebag: lo ri:- 4Amung: aimae" dajhid' re ngo o: ra" khyo" myho' sho' yhaung" mung: ngojhao" cilo byid: la,-aire ngo bin: zo: lao" ngo mashid shire nao re lo" thao" shaman" dao: ngo ta" byid: nae"- ga: ta" ra".
5Isag wa Eso re airu: jhau: na: au: Rebekha wa tae" gyo" na: ra". Aimung: Eso sho: kung"" thug' ye" lo" lao"- 6-7Rebekha wa Yaku re- ni" pho" wa Eso re gug'nyhug' dadau: kung" lo mung: aire nga" qhid' mae" yhaung" byid: la,- aire ngo bin: zo: thao- ngo mashid shire ngo wa Asang: qhid' kheim: mae nao re shaman" byid: nae"- ga: ta" rure ngo ana" za: the' gyo: va". 8Rebekha wa xo' yang: ana"- nga" zo: we" nga" dao: re tae" gyo: mung: ngo ta" rure kad' wa,- 9Cad' kyaung" khyo ye: mung: xau: nyam: ra" cad' be, qae" shid' dau: yetaung" lo ri:- airu: lao" ngo wa aijham re yhaung" mung: aimae" dajhid' re ni" pho" gyai o: ra" khyo" nyhang" byid: nae". 10Nao wa aire yao: re lo" qo" byid: zho: mung: yao: mashid shire yao: wa nao re yao" shaman" dao: byid' li" nae"- ga: ta" ra".
11Ngadqere: Yaku wa yao: myhi" re- Eso wa shomug' hab' ngad rure nao ba: ra". Ngo wa shomug' mayaug ngad: ra". 12Nga" pho" wa ngore li" tin" ke' mung: ngo wa yao: re mhug' pyag' na: rure gai beim" li" nae". Ceru: ngo wa shaman" dao: qo" yu nae" atha" ngo yao" gaung re ngo yao: nhang" yu: ru boe" li" maba- ga: ta" ra".
13Ailao" yao: myhi" wa- nga" zo: we" nao re nhang" ra" nhang: kheim: alhab' ngore zao" vashao:- ngo ta" ru we' dakhyo: za: kad' wa,- cad' be, shid' dau: re za: ngore ye taung: byid: la, ga: phaug' tau" ra". 14Airumung: yao: wa ai: cad' be, shid' dau: re ye taung" yu yang: yao: jhao" cilo byid' ra". Amung: Rebekha wa Yaku nho: yao: pho" o: ra" ja: yhaung" byid' ra". 15Ai: thao Rebekha wa yao" yham mae shaung: to" ra" gai: thao" ra" Eso nho: mai bau: re yu: yu mung: Yaku re vhe' ra". 16Rebekha wa ai: cad' be, qid re wa Yaku nho: lo, pau" mae we' shomug' mayaug: ra" Yaku nho: lang zang khaung: mae thab' byid' ra". 17Rebekha ai: wa ai: myho' ra" sho: we' yao: kad' to" ra" mug re daga" za: Yaku re byid' ra".
18Ai: thao Yaku wa yao: pho" jhao" ye: mung:- nga" pho" we"- ga: ye jhau: ra".
Isag wa cemae na: ga: tau mung:- nao khoyaug lam: ngad: i? ga: myid' ra".
19Ailao" Yaku wa ngo wa ni" zoqhid' yaug Eso ngad: nao ta" to" ru we' dakhyo: bin: kad' va". Ni" shaman" dao: nao ngore qo" byid: nae" qhid' mae" jeju we' to" zaung mung:- ngo cili" ra" sho: re zo: wa,- ga: ta" ra".
20Isag wa- nga" zo: we" gyai phyad sho' sho: khoru: qo" kung" yu: i? ga: myid' ra".
Yaku wa Asang ni" Mao"So ngore bao" thaug' byid: yang: ngad: ra"- ga: tau" ra".
21Isag wa Yaku re jeju khyo" nao re ngo qo" tin: sho' te' lo ri: nao wa gaigai: yao: Eso: ngad: i? ga: ta" ra". 22Yaku wa yao: pho" jhao" te' sho' qui" ye: mung: yao: pho" wa yao: re soe' qu" yang:- ni" thoe wa Yaku nho: thoe we' dau: kyi:- ngadqere: ni" lo, pau" jham wa Eso nho: lo, ru" ru ngad: kyi:- ga: ta" ra". 23Isag wa Yaku re maba: kho' ngad: ra". Pe"mung:ga"re yao" lo, wa Eso nho: lo, ru: shomug' hab' yang: ngad: ra". Isag wa Yaku re yao" shaman" dao: byid: nae" qid re- 24Nao wa gaigai: yao: Eso ngad: i? ga: dam: myid' ra".
Yaku wa ngo ngad: va"- ga: phaug' tau" ra".
25Ailao" Isag wa sho: ngojhao" cilo ri:-ngo aire bin: zo: lao" nao re ngo shaman" byid: nae"- ga: ta" ra".Yaku wa ai: sho: re Isag jhao" cilo byid: mung:- yao: wa sabyi qang: rere: yao: jhao" cilo byid' ra". 26Ai: thao yao: pho" wa Yaku re nga" zo: we"- te' lo mung: ngore bo baug baug la,- ga: ta" ra". 27Yaku wa yao: re bobaug baug nae" te' lo: au: Isag wa yao" mai bau: re sheim nae: yu mung: yao" shaman" dao: Yaku re byid' ra". Isag wa- nae pyo" ra" nga" zo" nho: sheim wa Mao"So shaman" byid' to" ra" Yothaung: sheim we' dakhyo: ngad: ra". 28Mao"So wa mug:gaung mae" nao re nghin khyo" byid: mung: ni" yothaung: jham re myid xau gai nhao vashao:- yao: wa nao re byid: vashao:- 29Byumyu" qe wa ni" nho: daui daui mo, boe" vageshao:- amung: byu qere ni" qhid' kheim: mae goe; gyo" vageshao:- nao wa ni" ba nam sang: cao: alhab' mo; dao mae eib vashao:- amung: ni" myhi" nho: myid:zo: qe wa ni" qhid' kheim: mae goe; gyo" vageshao:- nao re nhang" ra" mo, wa nhang" ru qhug' vageshao:- amung: nao re shaman" byid' ra" mo, wa shaman" byid' ru qhug' vageshao:- ga: yao: re shaman" byid' ra".
Eso- Isag Nho: Shaman" Dao: Mho' Ra" Khyo
30Isag yao" shaman" dao: bin: ta" thao Yaku thug' lo" we' yao: mao: Eso wa sho: kung" rumae" joe" lo: ra". 31Eso re: sho: re gyai myho' sho' yhaung" mung: aire yao: pho" jhao" cilo byid' ra". Yao: wa nga" pho" we" jeju we' to" zaung yang: nao ngore qo" shaman" byid: nae" qhid' mae" nao jhao" ngo cilo byid' ra" sho: re zo: wa,- ga: ta" ra".
32Ailao" Isag wa nao khag' ngad: i? ga: myid' ra"
yao: wa- ni" zoqhid' Eso ngad:- ga: tau" ra".
33Aimung: Isag wa gaung geim" din: gyaug: nin" ru we' ai: gug'nyhug' re se' yang: ngojhao" sho: yhaung" cili" yaug wa khag' ngad: i? Nao majoe" li" shire ngo zo" pye' va". Ngo wa nga" lo" thao" shaman" dao: re yao: re byid' pye' va". Aimung: ai wa apyad ato yao" mae" ngad: ava"- ga: ta" ra".
34Ce: dao: re the' gyo: lao"- yao: wa thoe qi: ke' yang: ngug mung: gyai nhag' lam: no: ru we' nga" pho" we"- ngore ni" shaman" dao: byid: la,- ga: mho' ra".
35Isag wa ni" nhaung: li" mung: ngore mhug' pyag' zo" pye' ava". Yao: wa ni" nho: shaman" re yu: pye' ava"- ga: tau" ra".
36Ailao" Eso wa yao: ngore mhug' zo" ru celhang wa shid' lhang ein: lhang ngad va". Yao" mang Yaku ngad: rure khag' mug' nae" khyo majo,- yao: wa nga" zoqhid' aya: re yu: pye' byid: mung: ana" re: nga" nho: shaman" jeju re yu: pye' ra". Nga" qhid' mae" shaman" dao: nao matang" to: lo: i? ga: ta" ra".
37Isag wa ngo wa yao: re ni" dao mae zug: kad' nhao: pye' va". Amung: yao" ba nam sang: cao: alhab' re yao" jeim qe doe, nhao: pye' va". Ngo wa yao: re gaug zo maui: lam: we' sabyi qang: byid' to: va". Nga" zo: we"- ana" ngo wa ni" qhid' mae" pe" kad' byid: nae" re: maqo" lo: ga: tau" ra".
38Eso wa xo' yang: yao: pho" re- nga" pho" we"- nga" pho" we" nao wa shaman" dao: daja: za: qo" i? Ngo rere: shaman" byid: la, ga: ngug yang: mho' ra".
39Ailao" Isag wa ni" qhid' mae" mug:gaung mae" nghin magyo" byid: nae"-
ni" qhid' mae" myid xau gai: ra" yothaung: majo, nae". 40Nao wa nao yao" shae: yang kao so' daui: li" nae".
Ngadqere: ni" nhaung" nho: jeim doe; li" nae" ai ngad sho' ngadqere:-
nao yao: re geim lau to" lao" wa yao" lo, mae" qo" loe; li" nae"- ga: yao: re ta" ra".
41Yao: pho" wa Yaku re shaman" dao: byid' pye' va" ruyang Eso wa Yaku re nghang" ra". Eso wa- nga" pho" shid yang: kaug' ngug nae" ba na wa jhao" li" na: ava"- ai:thao re ngo wa Yaku re se' pye' nae"- ga: yao" nhag' khug mae myid: to" ra".
42Ngadqere: Rebekha wa Eso nho: yaung: to" ra" khyo re the' gyo" ra". Amung: yao: wa Yaku re khai: yu yang:- Yaku re- tae" gyo: wa,- ni" mao: Eso wa nao re se' pye' nae" yaung: na: ra". 43Ana" nga" zo: we" ngo ta" rure kad' wa,- Haran mae na: ra" nga" mao: La Ban jhao"- ana" yao: ye: wa,- 44Ni" mao" nho: nhag' yo: gyo" mung:- nao yao: re kad' va" khyo re to" myhid' yo, joe" sho'- 45La Ban we' dayo, zo: yena: jo, wa,- ai:thao ngo wa byu dayaug yaug re li" dam: jhui: yu nhao nae". Ngo wa pe"mung: yang: daba mae za: nga" yauggai zo: shid' zo" geim" seim" kham nae" i? ga: ta" ra".
Isag Wa Yaku Re La Ban Jhao" Nhao: Ke' Ra" Khyo
46Rebekha wa Isag re ngo wa Eso nho: taung bug amyu" yham sang myhi" qe: mathao: yang no boe" mung: shobyo; ra". Yaku re ce: Hiti myiqe: nau" qe mae" dayaug re lo, xo' yu: re wa ngo wa qo" shid nae kyi: ga: ta" ra".

Currently Selected:

APAN AQAO: 27: LHCL

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy