APAN AQAO: 19
19
Sodom Vogaung Byu Qe: Qobo
1Ai: myi" thao re Sodom vogaung: khyo mug: lagyo: shid' yaug joe" li" ko" au:- Lod wa vomo" kham: dung: mae zaung: jo; ra". Lod wa yao: shid' yaug re myao we' to" ye: mung: yao: shid' yaug re yetug: yu ra". Yao: wa yao: shid' yaug: qhid' kheim: mae yegoe; gyo" mung:- 2Nga" Asang tao we" ni" shid' yaug re caung: da" byid: nae" qhid' mae" ngo wa cetau mae na: jo; ra". Jeju khyo" nga" yham khyo li" geri: ni" shid' yaug: khyid cid' pye' yang: damyi yab ge, ni" shid' yaug ne, seim no' to" yang: ni" shid' yaug gyaung: khyo khyo ye" lo" ge,- ga: ta" ra".
Yao: shid' yaug wa mangad: nga" shid' yaug wa ce: vomo" mae" shava jao: mae damyi geim" na zai ngad:- ga: tau" ako". 3Yao: wa xo' yang: yao: shid' yaug re lhaung mung: lo" thao" mae yao: shid' yaug wa Lod nho: yham khyo yao: we' daga" cao" ye" lo" ako". Lod wa yao" daui daui mo, re mug dajhid' kad' nhao mung: bang" vo qe: qhid' mae" zo: shaug' nyhang" saboe" genae" qhid' mae" amyin" byid' ke' ra". Bin: nyhang" saboe" gelao" yao: shid' yaug zo" ako". 4Bang" vo qe yab qo mavao shi: gere- Sodom vogaung: mae" yauggai qe wa Lod' yham re vang" to" ako". Ai: vomo" mae" yauggai angai aqi: alhab' mo, ai: mae ngad: ako". 5Yao: bam wa Lod re yao mung:- ana" myi nao jhao" bang" li" khug nae" joe" li" ko" ra" yauggai shid' yaug khai: mae i? ngonhaung" jhao" jhui" thug' lo byid: la,- Sodom vogaung: mae" yauggai qe wa yao: shid' yaug re gaung sho: zam" nae" o: ra"- ga: ta" ako".
6Lod wa taung gaung shad' khyo thug' ye: mung: yao" nhaung thao" mae kham: pyid' pye' ra". 7Amung: yao: wa yao: bam re- ba nam qe we" naonhaung" re ngo mho' geli" airu" ra" makhyang" ra" mau" re dakad' ge,- 8Qu" ge, ngo wa zomyi: gyang" ngad shiko" ra" myiqe: zo: shid' yaug qo"- naonhaung" qhid' mae" yao: shid' tao re nhao byid: geli"- naonhaung" o: ra" khyo" yao: shid' tao re kad' ge, ngadqere: ce shid' yaug re wa pe" dakad' ge,- yao: shid' yaug wa nga" bang" vo ngad: ako". Amung: ngo wa yao: shid' yaug re gug: gam byid: ca" ra"- ga: ta" ra".
9Ngadqere: yao: bam wa taung bug pho" we" qui: wa, ngonhaung" pe" ru kad' nae" rure ngonhaung" re ta" nae" qhid' mae" nao khag' ngad: i? khyo qui: wa, mangad: re ngonhaung" wa yao: shid' zo: re tho' xo sho' nao re kad' nae"- ga: ta" ako". Yao: bam wa Lod re nhaung thao" shad' khyo deim" geim: pye' mung: kham: re phyo' pye' nae" qhid' mae" qui" do, li" ako". 10Ngadqere: yham khug shad' mae" yauggai shid' yaug wa lo, yheim" ke' mung: Lod re yham khug khyo she: vhao" yu mung: kham: pyid' pye' ako". 11Ailao" yao: shid' yaug wa- taung gaung shad' mae na: ra" yauggai alhab' mo, re myo, jid: lo" nhao mung: yao: bam wa kham: dung: maqo" myao ngad: ako".
Sodom Vogaung: Mae" Lod Thug' Lo" Ra" Khyo
12Ai: yauggai shid' yaug wa Lod re- Ce: vogaung: mae ni" yauggai zo: myiqe: zo: zomo, pho" qe mangad: lao" gatau ni" ba nam ug zo: qe na: ngad: re cemae" jhui" thug' lo" wa,- 13Pe"mung:ga"re nga" shid' yaug wa ce: jo, qo re phyo' qheim" pye' naeva" ga: ta" ako". Asang wa ce: vobyu qere qu" gyaug qu" lhaung sho' qobo zhaug' ra" khyo jham re the' gyo" ava". Amung: yao: wa Sodom vogaung: re phyo' qheim" pye' nae" qhid' mae" nga" shid' yaug re nhao: ke' ru ngad: ra" ga: ta" ako".
14Ailao" Lod wa yao" myiqe: zo: qe lo, xo' yu nae" ngad ko" ra" yauggai qejhao" ye: mung: phyad to" mung: cetau mae" thug' lo" ge, Asang wa ce: jo, qo re phyo' qheim" pye' nae" seim" na: ava"- ga: ta" ra". Ngadqere: yao: bam wa Lod nghin" na: ru ngad: ra" ga: myid: jho: ako".
15Mug: bo" zo" re mug: lagyo: shid' yaug wa Lod re phyad mung nae" qhid' mae" jhan" ako". Yao: shid' yaug wa vomo" re phyo' qheim" pye' ra" au: re ni" kao so' majeim: nae" qhid' mae" ni" yham sang myhi" we' ni" myiqe: zo: nhae tao re jhui: yang: thug' lo" wa,- ga: ta" ako". 16Lod wa yam" na: ra". Ngadqere: Asang wa yao: re nhag' khyag' ra"- airumung: ai yauggai shid' yaug wa yao: re jhui: mung: yao" yham sang myhi" we' yao" myiqe: zo: nhae tao re lo; yang she mung: ai: vomo" khug mae" jhui" thug' lo" ako". 17Ailao" mug: lagyo: shid' yaug mae" dayaug wa naonhaung" kao so' loe, sho' tao" phao ge,- nhaung thao" khyo dalhang: qu" ge,- lao: geim: mae dathang ge,- naonhaung" se' pye' ru maqhug' genae" qhid' mae" bug gaung jham khyo tao" phao ge,- ga: ta" ra".
18Ngadqere: Lod wa Asang we" airu: mangad:- jeju khyo" ngonhaung" re airu: dakad' nhao la,- 19Ni" shid' yaug wa ngore qi: sho' myo, nho nga: byid: mung: nga" kao so' re khyad' yu: avako"- ngadqere: bug gaung jham wa gyai va" ako". Ai: khyag' qhui: ru wa ngore myhi mung: ai: jo, qo khyo majoe" shire ngo shid: li" nae". 20Ai: vogaung: nau" re nao myao: i? Aiwa ajhao" mae za: ngad: ra"- Ai: vogaung: khyo ye: nhao la,- ai: vogaung: wa angai ngad: rure nao myao: ra"- ngo wa aimae gug: gam nae" ga: tau" ra".
21Mug: lagyo: wa gai va" ngo myid vang" ra" ngo wa ai: vogaung: nau" re maphyo' qheim" pye' nae". 22Hin hin kad' wa,- tao: wa,- nao ai: vogaung: khyo majoe" joe" wa ngo pe" maqo" kad' ngad: ra" ga: tau" ra".
Lod ai: vogaung: re angai ga: mhang" ruyang ai: vogaung: wa Zoa ga: mhang" ako".
Sodom We' Gomora Vogaung: Re Phyo' Qheim" Pye' Ra" Khyo
23Zoa vogaung: khyo Lod joe" ye: lao" ba thug' li" ra". 24Asang wa nyag din taung" Sodom we' Gomora vogaung: dao khyo nga" de; ra" vhang myi: mug: qu: khyo" ke' ra". 25Amung: ai shid' vo geim" re we' lao: geim: geim" re we' ai: mae na: ra" vobyu qe alhab' we' ai: mug: myid mae yaug: ra" ja: alhab' re phyo' qheim" pye' ra". 26Ngadqere: Lod nho: yham sang myhi" wa nhaung thao" khyo lhang: qu" ke' mung: xo: zang boe" lo" byaug: ra".
27Abraham wa ne, seim no' mae" yao: Asang: qhid' kheim: mae ye; jo; qu" ra" jo, qo khyo hin hin za: ye" lo" ra". 28Yao: wa Sodom we' Gomora vogaung: lao: geim: geim" re qu" khyo" ke' re khyeim" mo" myi: mae" myikhug' ru: ai: jo, qo mae" myikhug' thaui" do, li" na: rure myao: ra". 29Ngadqere: Lod na: ra" lao: geim: mae" vomo" shid' lam: re Mao"So phyo' qheim" pye' ra" au: yao: wa Abraham re myid: beim: mung: gug: gam: ra" jo, qo khyo Lod re phao: loe, nae" akhang" byid' ra".
Moba Byu Myu" We' Amon Byu Myu" Qe: Ajhaung
30Lod wa Zoa vogaung: mae thang: na nae" gyaug yang: yao: we' yao" myiqe: zo: shid' yaug wa bug gaung khyo qui" do, ye: mung: laug aug' dalam: mae yena: ako". 31Ailao" myiqe: zo: bai: mo" yaug wa yao: nhaung: re ngonhae tao: yao: pho" wa mao" lo" na: ava"- ngonhae tao zoshao qo" khau sho' ngonhae tao re lo, xo' yu nae" ce: mug: myid geim" mae yauggai qe mana loko" ngad: ra". 32Sa"- ngonhae tao yao: we' qo" yab nae" qhid' mae" ngonhae tao: yao: pho" re yhid jhaug' yhid' lang:-Ailao" yao: khyo" yang zoshao qo" nae" ngad: ra"- ga: ta" ra". 33Ai: myi re yao: nhae tao wa yao: re sabyi qang: byid: jhaug' ako". Yao: zo: bai: mo" yaug wa yao: pho" we' gaung sho: zam" ako". Ngadqere: Lod wa gyai yid: ruyang ai: khyo re mabeim: ngad: ra".
34Ai: thao ba myiqe: zo: bai: mo" yaug wa yao: nhaung: re amyi ngo yao: we' yab va"- ana" myi re: yao: re yhid dam: jhaug' yhid' lang:- amung: nao yao: we' daga" yab wa, ai lao" nga" shid' nhae geim" ngonhae tao: yao: pho" khyo" yang zoshao qo" nae" ngad: ra"- ga: ta" ra". 35Airumung: ai: myi re yao:nhae tao wa yao: re yhid jhaug' yhid' ako". Amung: myiqe: zo: angai yaug wa yao: we' gaung sho: zam" ra". Lod wa gyai yid: ruyang ai: khyo re mabeim: ngad: ra". 36Ceru" ru Lod nho: myiqe: zo: tao yao: nhae nho: yao: pho" khyo" yang gaung la" li" ako". 37Myiqe: zo: bai: mo" yaug wa yauggai zo: dayaug khau mung: yao: re Moba ga: mhang" byid' ra". Yao: wa ana" pyad mae" Moba byumyu" qenho: phug' pho" ngad: ra". 38Myiqe: zo: angai yaug re: yauggai zo: dayaug khau mung: yao: re Benammi ga: mhang" byid' ra". Yao: wa ana" pyad mae" Amon byumyu" qenho: phug' pho" ngad: ra".
Currently Selected:
APAN AQAO: 19: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009