YouVersion Logo
Search Icon

APAN AQAO: 12

12
Mao"So: yang Abram Re Khai: Ra" Khyo
1 Asang wa Abram re ni" mug:- ni" ba nam- ni" pho" yham re to: co' mung: ngo nao re qhu" byid: nae" ra" mung" khyo ye" lo" wa,- 2Ngo wa nao re myid:zo: myo: sho' byid: nae"- amung: yao: bam wa qi" qhang: ra" byumyu" damyu" boe" li" genae". Ngo wa nao re shaman" byid: mung: ni" mang re lahau: qi: nhao nae"- Airumung: nao wa shaman" jeju gaung boe" li" nae".
3Ngo wa nao re shaman" byid' ra" mo, re shaman" byid: nae".
Nao re nhang" ra" mo, re kam" wa ngo nhang: nae"- ga: ta" ra". Nao khyo" yang ngo wa byumyu" alhab' re shaman" byid: nae"- ga: ta" ra".
4Abram wa nhad' xe ngo" zin ngad lao" yao: wa Haran mae" thug' lo" mung: Asang yao: re ta" to" ru we' dakhyo: kad' ra". Lod wa yao: we' daga" cao" ye" lo" ra". 5Abram wa yao" yham sang myhi" Sarai nho:- yao: zo nhaung: Lod re jhui: mung: Haran mae qo" ra" jeim qe jo,nho" alhab' we' yao: bam wa Khanan mung" khyo to" lo" ako".
Yao: bam Khanan mae joe" ye: gelao". 6Abram wa Shekhem mae" Gyang" lho" jo, qo ngad: ra" More ga" ra" jo, qo mae" gyang" lho" sag' gae khyo joe" ye: sho' Khanan mung" geim" jao: sho' su" qin" ra". (Ai: ayo, joe" sho' Khanan byu qe wa ai: mung" mae na: ako". 7Asang wa Abram re na: qhu" mung: ce: mung"dan: wa ngo ni" myid:zo: qere byid: nae" mung"dan: ngad: ra"- ga: yao: re ta" ra". Ailao" Abram wa aitau mae yao: re na: qhu" ra" Asang: qhid' mae" phan dalam: kad' ra". 8Ai: thao yao: wa Bethela vogaung" nho: ba thug' shad' mae" jo, ra" bam mug: mug: thao shad' khyo qui" ye" lo" ra". Yao" jamu re ba vao shad' Bethela ba thug' shad' Ai: vogaung: agyo: mae kad' ra". Aitau mae re: yao: wa phan dalam: kad' yang: Asang re caung:pa" byid' ra". 9Ai: thao yao: wa jo, qo dalam: mae" dalam: khyo qui" lhau mung: Khanan mung" mug: thao shad' khyo ye" lo" ra".
Egutu Mung" Mae Abram Yena: Ra" Khyo
10Ai: ayo, mae Khanan mung" mae bao" khug' khug' li" mung: bao" khug' saung" no; ruyang Abram wa mug: thao shad' Egutu khyo ye: mung: aitau mae dayo, zo: yena: ra". 11Yao: wa Egutu mung" khyo mug: kyo: re lai: ye: nae" ngad lao"- yao" yham sang myhi" Sarai re- nao wa yaung" ra" myiqe: dayaug ngad: ra". 12Egutu byu qe nao re myao gelao" yao: bam wa nao re nga" yham sang myhi" ngad: ga: jho: li" genae". Ailao" yao: bam wa ngore se' pye' mung: nao re wa nha: to" li" genae". 13Airumung: nao wa nga" nhaung: ngad: ein: yao: bam re ta" wa,- airulao" ni" mathao mae yao: bam wa ngore daui: na nhao mung: ngore nyang" za: kad' li" genae"- ga: ta" ra". 14Yao: wa Egutu mung" shad' mug: kyo: re lai: ye: lao" Egutu byu qe wa yao" yham sang myhi" yaung" qo re lham: myao: ako". 15Kho:kham kho" mae" zug: daqhae: wa Sarai re myao mung:- yao: khoqhi" yaung" ra" khyo re kho:kham pho" re ta" kyo" ako". Airumung: Sarai re yao" kho:kham kho" khyo jhui" yu: ra". 16Yao" mathao mae kho:kham pho" wa Abram re nyang" za: kad' mung:- yao- cad' be,- nung:- loze kyaung" jham we' jeim qe- gola:u jham yao: re byid' ra".
17Ngadqere: kho:kham pho" Sarai re ngho" ra" mathao mae Asang wa qu" gyaug qu" lhaung sho' ra" no aqam" yao" dao mae we' yao" kho:kham kho" mae na: ra" byu qe: dao khyo nhao: ke' ra". 18Ailao" kho:kham pho" wa Abram re khai: yu mung: nao ngore pe" kad' i? Yao: ni" yham sang myhi" ngad: rure ngore pe"mung: mata" kyo: i? 19Yao: wa ni" nhaung: ngad: ein: nao pe"mung: ta" i? Yao: re nga" yham sang myhi" khyo" ngore pe"mung: ngho" nhao: i? Ni" yham sang myhi" cemae ngad: ra". Yao: re jhui" yu mung: thug' lo" wa,- ga: ta" ra". 20Kho:kham pho" wa yao" byu qere amyin" khyo" ke' ra". Airumung: yao: bam wa Abram re khai: yu mung:- yao" yham sang myhi" we' yao: sang: ra" gu: alhab' we' daga" mung"dan: mae" nhao: thug' ke' ako".

Currently Selected:

APAN AQAO: 12: LHCL

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy