Yosua 23
23
Cappa' pepasanna Yosua
1Masainmi Naben PUANG Allataala kamanyamanan to to-Israel, te'damo ewana barani nnewai. Ia joo wattu matuami to Yosua, 2iamo natambaii to sininna to-Israel sola tomatua-tua, tomangparenta, tomangra'tah kara-kara na komandan, namangkada nakua, “Gaja tuamo', 3na mikitamo to sininna Nagaukanni PUANG Allataala to tasompa, lako bangsa ntee. Na Ia ntulungki' parari. 4Mangka ngasanmo kamu' kutawan mpake undi mipumanahhi to tanana bangsa to mangka tataloi sola to te'dapa naditaloi, mangpamula jio mai Sa'dan Yordan, angge randan Tasik Tangnga llan kalambunan. 5Ia joo bangsa, la Napupentaloi PUANG Allataala to tasompa, Naula'ii jio mai olomi namale sipalaian. Mikuasaii to tanana mipumanahhi situru' to mangka Nabassean kamu' PUANG Allataala to tasompa. 6Pamawatangngi penawammi, mimasumanga' mitatta' nturu'i to sininna atoran to diuki' llan Sura'na Nabi Musa. Danggi' lalo naden tangmipugauk. 7Danggi' too misiama' bangsa to torro unapa llan alla'mi. Danggi' mipau-paui to sanga dewatanna, iarika mipakei massapah. Danggi' too misuju' ssompai. 8Nang la tatta' kamu' menturu' lako PUANG Allataala to tasompa susi to mipugauk ratu lako too allo.
9Mangkamo kamu' Naularan PUANG Allataala buda bangsa simawatang na simatonggo, nate'da lalo moi mesa' ngkullei nnewa kamu'. 10Moi misimesa'ra nnewai, apa wa'ding kamu' ntaloii massa'bu-sa'bu, nasaba' PUANG Allataala to tasompa ntulung kamu' parari susi to mangka Nabasse.#Ulangan 3:22, 32:30 11Iamo joo, ingaranni mitatta' ngkamali' PUANG Allataala to tasompa. 12Ia ke te'da mitatta' menturu' lako Puang Allataala, mikannora siama' bangsa to torro unapa misolan iarika misirampean, 13ingaranni kumua, te'damo Nalannula'ii PUANG Allataala joo bangsa, iamo butung poja la ntumang kamu'. Napa'dikki kamu', susi to dirambi ba'tu butung duri llan matammi. Napandasa tarruh kamu', nate'damo minii torro tee tana liwa' melo, to mangka Naben kamu' PUANG Allataala to tasompa.
14Na te'damora namasain kumate. La mikanassai tongan kumua diben ngasanmo kamu' to sininna mipumelona to mangka Nabasse PUANG Allataala to tasompa. Napugauk ngasanmo to basse-Na, moi mesa' te'da Nasala. 15-16Nabenmo kamu' kameloan PUANG Allataala to tasompa situru' basse-Na. Susi toomi joo, la Naparatuan kamu' parri' ke te'da mituru'i to atoran-Na, ke te'da mitoe tonganni to basse-Na, na te'da mipugaukki to parenta-Na. Ia ke suju' kamu' ssompa dewatanna bangsa laen, nang la liwa' magalli PUANG Allataala, Nalanynya'i kamu' llan ntee tana melo, to mangka Naben kamu'.”
Currently Selected:
Yosua 23: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.