Yosua 18
18
Torronapa tana Kanaan ditawa jio Silo
1Ia tonna mangkamo to-Israel rrampai to tana mangka Nabasseanni Puang Allataala, sirempun ngasanmi to umma' Israel jio kota Silo, napake'dehhi jio to Tenda Kasitammuan#18:1 Tenda Puang Allataala disanga too Tenda Kasitammuan na iamo tandana kumua denni Puang Allataala llan tangnga umma'-Na.. 2Ia joo wattu denpa pitu suku to-Israel to te'dapa tawana tana manah. 3Iamo joo, namangkada Yosua lako to-Israel nakua, “Pirapara masainna la minii mangdau-dau bangpa? Ciapari nate'dara mimale nnii torro joo tana to mangka Naben kamu' PUANG Allataala to nasompa tojolomi? 4Pileii sitallu tau jio mai simesa'-mesa' suku. La kusuai male ngkitai joo tana la napumanah, nauki'i to anggena, namane' pole mpauanna'. 5Ia joo tana, la ditawa pitui. Ia to suku Yehuda la tatta' nnii tana llo'na liu, na dua suku bati'na Yusuf#18:5 Ia to suku bati'na Yusuf iamo to suku Efraim na suku Manasye. jajanna liu. 6La migambara' to anggena joo tana ditawa pitu, mibenna', kuundii umbonna to tana la mipumanah to Napattantuan kamu' PUANG Allataala to tasompa. 7Ia manda to suku Lewi to te'da naladiben tana manah, nasaba' ia to napumanah iamo to la menjaji imang la mpangjaman PUANG Allataala. Na ia to suku Gad na suku Ruben, na sitangngana suku Manasye, mangkami ia ntarima tana manah jio kadellekanna Sa'dan Yordan, to nabenni Nabi Musa, to mpangjaman PUANG Allataala.”
8Ia tonna la malemo to todipilei napatujui Yosua jolo' nakua, “Malemo kamu' ngkitai joo tana, miuki'i to anggena, mimane' pole mpauanna', kumane' nnundii inde' kota Silo, nadiissen umbonna to tana Napattantuan kamu' PUANG Allataala la miputawa.” 9Malemi joo tau lleleii, nauki' ngasanni to kotana sola katonanna joo tana pitung tawan. Mangkai joo too, polemi lako Yosua jio kota Silo. 10Natawami Yosua joo tana mpake undi jio olo-Na PUANG Allataala jio Silo, nabenni lako suku to-Israel to te'dapa naampa' tana manah.
Tana diben suku Benyamin napumanah
11Ia tonna ditawamo joo pitung tawan tana mpake undi, rapunna suku Benyamin to jolo nakanna undi. Ia joo tana naparalla' tana manahna suku Yehuda na suku bati'na Yusuf#18:11 Ia to suku bati'na Yusuf iamo to suku Efraim na suku Manasye.. 12Ia to katonan jajanna liu pamula jio mai Sa'dan Yordan nnola de' awa' buntu re'na kota Yerikho, mangnguju kalambunan nnola membuntunna, ratu re' padang pallawangan kota Bet-Awen. 13Namane' nnola awa' sau'na kota Lus (ia bang una to disanga kota Betel), male do' kota Atarot-Adar jio membuntunna sau'na kota Bet-Horon jiongna liu. 14Llan kalambunanna joo buntu, namellekko sau' kota Kiryat-Baal (ia bang una to disanga Kiryat-Yearim). Ia to kota Kiryat-Baal tanana to-Yehuda. Iamo anggena tanana suku Benyamin llan kalambunan. 15Na ia to katonan llo'na liu, pamula llan mai cappa' kota Kiryat-Yearim, mangnguju kadellekan nnola to nanii pira-pira mata wai Me-Neftoah, 16namane' male do' awa' buntu to sioloan Lombok Hinom jaja tampakkana Lombok Refaim. Namane' nnola lo'na liu Lombok Hinom, nnola jao randan buntu llo' kampongna to-Yebus, tarruh do' kota En-Rogel, 17namane' mellekko re' En-Semes, tarruh re' Gelilot sioloan katukaran de' Buntu Adumim. Namane' male do' batunna Bohan (ia to Bohan anakkana Ruben), 18namane' nnola jajanna liu awa' buntu, tarruh do' Lombok Yordan, 19namane' nnola jajanna liu awa' Buntu Bet-Hogla, nacappa' jio re'na Tasik Mate to nanii cappa'na Sa'dan Yordan. Susimi joo to katonan suku Benyamin llo'na liu. 20Na ia to katonan kadellekan, iamo to randan Sa'dan Yordan. Susimi joo to katonan tana manah ditawan lako sininna rapunna suku Benyamin.
21-24Ia to sininna kota diben rapunna suku Benyamin, den sangpulo dua kota sola kampongna, iamo to: kota Yerikho, kota Bet-Hogla, kota Emek-Kezis, kota Bet-Araba, kota Zemaraim, kota Betel, kota Haawim, kota Para, kota Ofra, kota Kefar-Haamonai, kota Ofni, na kota Geba. 25-28Den toopa sangpulo appa' kota sola kampongna iamo to: kota Gibeon, kota Rama, kota Beerot, kota Mizpa, kota Kefira, kota Moza, kota Rekem, kota Yirpeel, kota Tarala, kota Zela, kota Elef, kota Yebus (ia una to kota Yerusalem), kota Gibea, na kota Kiryat-Yearim. Iamo joo to tana diben lako sininna rapunna suku Benyamin la napumanah.
Currently Selected:
Yosua 18: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.