Chukusakị 1
1
Tomonikiri Mị Wẹrị Tẹmẹ Ọkụ Mị Ḅe Ḅẹrẹ
1Sakị mị ḅụ, Tamụnọ Ḅe so mị na sẹkiri mị na tẹmẹ sịkị, 2sẹkiri mị ọrụtọnkẹ, gbọrịye sọnị pịkị anịa ḅie ofori-ẹ. Owoi abaji mị kanakana se anị gbẹịn gbitipumamẹ, se Tamụnọ Ḅe ọ̀ tẹmẹ#1.2 Tẹmẹ anịkanịka FọrụanịkanịkaTamụnọkụrọ mị mengi mị ọgọnọ nwẹngịmaḅọrọmẹ. 3Anịsịkị Tamụnọ Ḅe kụrọ pịrịmẹ, “Ye enekuḅu ḅịa paka”—enekuḅu pịkị ḅịa pakamẹ. 4Tamụnọ Ḅe ori ọrị enekuḅu mị anị iḅimẹ. Se enekuḅu mị ḅụ kanakana mị pusikimamẹ, 5seni ọ̀ nwọse enekuḅu mị chịnmẹ “Enekaka” anịsịkị kanakana mị “Ḍin”. Anị ḅọrọso se saso na dede na simemẹ—anị tatarị ene mị-ẹ.
6-7Anịsịkị Tamụnọ Ḅe pịkị kụrọ pịrịmẹ “Ye mengi mị pua se mama kịrịkịrị pẹkẹrẹ ḅụ sime”—anị pịkị ọkọ sime mẹ. Anịḅụ Tamụnọ Ḅe ò kpomgbo mịẹmẹ, anị ọgọnọ sime mengi mị ḅụ chukuju sime mengi mị pusikimamẹ. 8Kpomgbo mị ọ̀ nwọse anị chịnmẹ “So.” Anị ḅọrọso se saso na dede na simemẹ—anị maịn karama ene mị-ẹ.
9Anịsịkị Tamụnọ Ḅe kụrọ pịrịmẹ “Ye so mị chuku ḅie sime mengi mị ḅo gboloma gbọrị anga sime, mịẹse kiri pakaḅịa ḅara”—anị pịkịna ọkọ sime mẹ.
10Ọ̀ nwọse paka nyọ mị chịnmẹ “Kiri” anịsịkị ḅo gboloma mengi mị ọ̀ nwọse anị chịnmẹ “Tọrụ.” Se Tamụnọ Ḅe ori ọrị kiri mị anị iḅimẹ. 11Se ọ̀ kụrọ pịrịmẹ, “Ye kiri mị ịnyanya chụa, kịrịkịrị chịn na chịnmgbọlụ na pakụmaḅo”—anị pịkịna ọkọ sime mẹ. 12Anịẹrẹchị kiri mị ịnyanya chụa chịn ḅụ kịrịkịrị aye na kịrịkịrị fịaye chụa chịn na pakụmaḅomẹ, se Tamụnọ Ḅe ori ọrịye mị iḅimẹ. 13Anị ḅọrọso se saso na dede simemẹ—anị tẹrẹ karama ene mị-ẹ.
14Anịsịkị Tamụnọ Ḅe kụrọ pịrịmẹ, “Ye sotọrụ enekuḅu pakụmaḅịaye pakaḅo, anị enekaka mị ḅụ ḍin mị pusikima, anị seni enema na kụra ma na pịkị alalị sịkị ma sakịḅịa sịkị nemiḅịa ẹrẹchị-ẹ, 15àrị sotọrụ ḅịa se enekuḅu se kiri mị pịrịḅịa”—anị pịkịna ọkọ mịẹmẹ. 16Anịḅụ Tamụnọ Ḅe mama opu tọnjie nwọ mịẹmẹ, ịrụa mị ḅẹrẹtọn enekaka mị pịrị, anịsịkị akalụ mị ḅẹrẹtọn ḍin mị pịrịḅịa; ọ̀ pịkịna loliama sọnị mịẹmẹ. 17Tọnjiema ò seni sotọrụ koromamẹ, àrị ḅịa paka kiri ọgọnọ saraḅịa ẹrẹchị, 18àrị ḅẹrẹtọn enekaka mị na ḍin mị na pịrị, se pịkịna enekuḅu ḅụ kanakana mị pusikimamẹ. Se Tamụnọ Ḅe ori ọrịye mị anị iḅimẹ. 19Anị ḅọrọso se saso na dede na simemẹ anị inein-a ḍin karama ene mị-ẹ.
20Anịsịkị Tamụnọ Ḅe kụrọ pịrịmẹ, “Ye kịrịkịrị pịkị ḍumo nyanaye mengi mị ḅie ḅein, pịkịna sotọrụ kịrịkịrị feni ḅein.” 21Anịḅụ Tamụnọ Ḅe tọrụ ḅie anga opu namama na, pịkịna mengi ḅie anga kịrịkịrị aye mamgba na, feni goyegoye na tẹmẹmẹ. Se Tamụnọ Ḅe ori ọrịye mị anị iḅimẹ. 22Tamụnọ Ḅe àrị ḅẹlẹmamẹ, ọ̀ pịkị ḍuko mengi ḅie angaye mamgba pịrịmẹ na àrị yi tọrụ mị ḅie ḅeinma, ọ̀ pịkịna ḍuko fenima pịrịmẹ àrị kịẹnḅịpị ḅụ su sẹkiri ḅeinma. 23Anị ḅọrọso se saso na dede na simemẹ—anị sọnọ-a ḍin karama ene mị-ẹ.
24Anịsịkị Tamụnọ Ḅe kụrọ pịrịmẹ, “Ye kiri mị ḍumo nyana kịrịkịrị nama goyegoye pakụmaḅo: owoi-a nama na dein seni tomoni na angaḅịa nama na, pịkị ikiriarịyema na, opuaye na kalaye na”—anị pịkịna ọkọ sime mẹ. 25Tamụnọ Ḅe arịmgba mịẹmẹ, ori ọrịye mị pịkị iḅimẹ.
26Anị Tamụnọ Ḅe ḅo nwọḅẹye-ẹ, “Mịọkụ wa tomoni tẹmẹḅịa, ini wa simeọkụ sime seni mine kịkẹḅịa. Ini mengi ḅie inji na, sotọrụ fin àrị feni na, nama goyegoye na, owoi piriḅie angaye na, dein tomoni na angaye na, opuaye na kalaye na ḅụ kụrọ nyanaḅịa.” 27Anịḅụ Tamụnọ Ḅe ò tomoni tẹmẹmẹ, ori ini mịẹmẹ ini ò simeọkụ simemẹ. Ori owuḅọ na eremeniḅọ na tẹmẹmẹ, 28ori ini ḅẹlẹma se nwọḅẹmẹ, “Ọ́ ḅakama awọ yi, mịẹsosịkị ọ́mịna furo ḅie pakaḅoḅịa awọma bebe sẹkiri mị mgba anga kelema seni ḅẹrẹtọn anị pịrị. Àrị injima na, fenima na, namama na pịkịna owoi-a namama na se ọ́ pịrịmẹ ómine arịaḅụ kụrọkọnḅịa. 29Ọ́ fịḅịa kịrịkịrị ḍọkọḍọkọ fịaye mgbọlụ na, chịnmgbọlụma na, pịkịna jịn-a fịaye na à nwọseni ọ́ pịrịsam, 30owoi-a nama mamgba na feni mamgba na, sẹkiri ḅụ ikiriaye na, ịnyanya na à nwọseni fịye ḅaraḅụ àrị pịrịsam”—anị pịkịna ọkọ sime mẹ. 31Tamụnọ Ḅe ọ̀ mịẹsaye goyegoye ọ̀ nwọ pekele ḍikimẹ seni àrị pịkị iḅiọkụma iḅimẹ. Anị ḅọrọso se saso na dede na simemẹ—anị sonio-a ḍin karama ene mị-ẹ.
Currently Selected:
Chukusakị 1: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria