Ohuchaaka 49
49
Emboosi cha Yakobbo chimaliirihayo
1Yakobbo yalaanga abaana bae basyaani, mani yaababoolera ati, “Mwebuuse alala, mbaboolereho ebichia ohuboolaho mu ndaalo chiicha.
2“Eng'we abaana ba Yakobbo, mwebuuse alala,
mani muwulire bi Yakobbo laata yeeng'we aboola.
3“Rubbeeni, niiwe omwaana waange waamberi,
niiwe amaani kaange, haandi yi ndeebula mu maani k'oburaaga bwaange,
yi hira ohwesuungiramo haandi ohiramo amaani.
4Oli koti amaachi kahulukusa, mani haba soochia ohuba ohiramo
olwohuba waniina hu sitaanda sya laatao;
mani weeyalisaho neende omuhasi wae, waasinyaasa!
5“Simeoni neende Leefi batula mu nda ndala;
beehoonyera ebilwaaniso byaabwe ohuhola eby'obutemo.
6Ese haba siinjia ohweeyingisa mu bumoonyi bwaabwe obwo, kata sa ohwiihalaanga mu mihung'aano kyaabwe, olwohuba beeta abaandu neende egiili, beeteraangao sa esurusi.
7Esichubo sibe hu tima lyaabwe, olwohuba bitiirifu nilyo, nae hu bwaalaba bwaabwe olwohuba bululu nibwo.
Ese njia ohubasalaanisira mu syaalo sya Yisiraeli yoosi.
Ese njia ohubasalaanisira mu baandu basyo.
8Ewe Yuda, bamwaanamaao bachia ohuhufumia;
ochia ohukwichaanga abasuku bao mu kosi;
abaana ba laatao bachia ohuhwiinamiraanga.
9 #
Hub 24:9; Hubwi 5:5. Yuda oli koti edalang'i enjere,
mwaana waange, okoboole nootula ohuyiima, ogunaame aasi, oli koti edalang'i esaacha,
haandi koti edalang'i ehasi, wiina mweene onahusingiseenge?
10Yuda niye ochia ohudiraanga endawusi y'obutuki,
noomba endawusi y'abatuki ohutula mu makulu kae,
ohwoola omweene butuki lu yaheechere;
mani oyo niye yi baandu bahawulire.
11Yahaboye omwaana kw'esuhiri yae hu musabbiibbu
haandi esuhiri yae ndoto hu musabbiibbu kuhiramo obulai,
engubo chae yahachoosereenge mu fiini
haandi ebyefwaalo byae mu fiini enjahanyu.
12Emoni chae chahaahanye olw'ohung'wa efiini,
haandi ameeno kae kahalabe olw'ohung'wa amabeere.
13“Sebbulooni yahamenye hu lwaasi ly'enyaanja;
amaato kachia ohukoberaanga hu genya lyae,
haandi olwaho lwae luchia ohuba Sidoni.
14“Yisakari, suhiri y'amaani niyo,
eyeyalisa akatikaati w'ebidwooli by'amakoondi;
15yabona abuundu w'ohuwuluhiramo ao naali alai,
haandi ati eloba elyo lyali niliboneha bulai;
yeenamia ebeka lyae ohwedwiiha,
mani niyehola omuwaambe yi bayiika ohuhola emirimo.
16“Daani niye ochia ohuheengeraanga abaandu bae emisaango
koti mulala hu nono cha Yisiraeli.
17Daani achia ohubechaanga enjuha eyiri hu ndulo w'engira,
endemo yiri hu ngira,
eyiboocha ebisiisiro by'efaraasi
mani oyiirusa niyaanuhaho naakwa aasi.
18Ewe Omwaami, ese niindire sa obuwonia bwao.
19“Abanyaka bachia ohuyaaya Gaadi,
nae achia ohukaluuhana mani abaloondeho.
20Ebyohulya bya Aseri bichia ohubechaanga ebiingi,
haandi achia ohuleetaanga ebyohulya bihoyera omutuki.
21“Nafutaali niye emboongo ndehuule,
owiibula abaana bae balai.
22“Yosefu niye omusaala kwaamaho ebyaamo biingi,
okwaama ebyaamo biingi nikuli aambi neende esulo y'amaachi
amasaga kakwo katakalala ohwoola hu sida.
23“Abasuku bae bamuseeta neende obwaalaba buungi muno,
beecha baamufumita, mani baamuyira bubi muno;
24nae oluyiingo lwae lwoomera mu mahono kae,
mani amahono kae nikanyoola amaani
ohutula mu mahono k'Owobunyala wa Yakobbo
(mu liita ly'Omwaayi, Omuliindi wa Yisiraeli),
25mu liita lya Nasaae wa lataao ochia ohuhuhoonya,
mu liita lya Nasaae w'Obunyala bwoosi ochia ohuhuberesa ehabi
neende ehabi chitula aakulu Muukulu,
ehabi chitula aasi mu loba,
ehabi ch'ohwiibula neende ohunuunia.
26Ehabi cha lataao
nyiingi muno ohuhira ehabi ch'engulu ch'endaalo choosi
ohuhira ebilai by'obugulu bw'endaalo choosi;
lehe ehabi echo chibe hu mutwe kwa Yosefu,
neende hu bweeni bw'oyo owaawulwa ohutula hu bamwaanang'ina.”
27“Bbenjamini niye eebbwe linyaka echuli,
analichaanga ebiindu bi yeetere,
haandi engoloobe, anakabanaangamo ebiindu bi ayaayire.”
28Chino choosi nichio enono ehumi-na-chibiri cha Yisiraeli; haandi sino nisyo si laata yaabwe yababoolera naababeresa ehabi, buli muundu naamuberesa ehabi yimuhoyera.
Ohufwa neende ohusiihwa hwa Yakobbo
29Yakobbo yalagira abaana bae mani naababoolera ati, “Njia ohuyirwa mbe alala neende balaata yaange; mani musiihaanga alala neende balaata yaange mu ng'uungu yiri mu mukuunda kwa Efirooni Omuhiti, 30#Huc 23:3-20.Mu ng'uungu yiri mu mukuunda kwa Makipela okuli ebukwe wa Mamure, mu syaalo sya Kanani. Omukuunda ku Abburahamu yakula ohutula hu Efirooni Omuhiti kube abuundu w'ohusihaangamo abaandu. 31#Huc 25:9,10; Huc 35:29.Eyo niyo yi basiiha Abburahamu neende omuhasi wae Saara; eyo niyo yi basiiha Yisaka neende omuhasi wae Rebbeka; haandi eyo niyo yi ndasiiha Leya. 32Omukuunda neende eng'uungu yirimo, byakulwa ohutula hu muundu Muhiiti.” 33#Biho 7:15.Yakobbo niyamala ohulagira abaana bae basyaani, yeengisa amakulu kae mu buliri, mani yakwiisa omwooyo. Yayirwa yasiihwa alala neende balataang'ene.
Currently Selected:
Ohuchaaka 49: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019