Ohuchaaka 48
48
Yakobbo aberesa Efuraimu neende Manaase ehabi
1Bino nibyawa bityo, baboolera Yosefu bati, “Bona, laatao nguno mulwaae niye.” Yosefu Bulaanu yabukula abaana bae basyaani babiri, Manaase neende Efuraimu n'achia nabo eyiri Yakobbo laatang'ene. 2Nae nibaboolera Yakobbo bati, “Yosefu omwaana wao yaheecha ohuhubona;” Yakobbo yefuutamo amaani, mani yeehala hu sitaanda syae. 3#Huc 28:13,14.Yakobbo yaboolera Yosefu ati, “Nasaae w'obunyla bwoosi yaambonehera ni ndi Lusi mu syaalo sya Kanani, mani yaamberesa ehabi. 4Yamboolera ati, ‘Bona, njia ohuhuberesa abeechuhulu baangi, haandi njia ohwiingiya olwiibulo lwao, mani weehole esyaalo, haandi njia ohuberesa abeechuhulu bao esyaalo sino sibe esyaabwe endaalo choosi.’ 5Mani bulaanu abaana bao babiri, baweebula nooli mu syaalo sy'e Misiri ese nisisiiri ohwiicha mu Misiri, baange nibo. Efuraimu neende Manaase bachia ohuba abaange, koti lu Rubbeeni neende Simeoni lu bali. 6Nae abaana bawaheebule ohuloonda hu bano nibo abahabe abao; bahakulihwe ameeta ka bamwanaang'ina, mani banyoola ohusihirwa. 7#Huc 35:16-19.Olwohuba nindali niindula Padani, Rakeeli maakoo yafwiira hu ngira, nisisiiri ohwoola Ewufuraati; mani nimusiiha hu ngira yichia Ewufuraati (niyo, Bbetilehemu). Sino syanjunia muno omwooyo.”
8Nae Yakobbo niyabona abaana ba Yosefu, yateeba ati, “Bano nibo ba naanu?” 9Yosefu yaboolera laatang'ene ati, “Bano nibo abaana baange ba Nasaae yamberesa ni ndi ano.” Yakobbo yaboola ati, “Hwekweeda, baleete yi ndi, mbaberese ehabi.” 10Emoni cha Yakobbo haba sichali nichibona bulai hulw'emyaaka kyae. Mani Yosefu yabaleeta aambi nae; mani Yakobbo yaabakwa mu sirifu. 11Yakobbo yaboolera Yosefu ati, “Haba sindali nimanyire endi nyala ohuhubonaho daawe; nae bona, Nasaae Akerere ndabonaho neende abaana bao bosi.” 12Mani Yosefu naabatusa hu makulu ka Yakobbo, omweene n'aguunama nageeng'a omutwe hu loba. 13Yosefu mani yabadiira boombi mu mahono, Efuraimu naaba mu muhono kwae muluungi, olwaande lwa Yakobbo lw'omukaada, nae Manaase yamudiirira mu muhono mukooda, olwaande lwa Yakobbo ly'omuluungi, mani naabasudia aambi nae. 14Nae Yakobbo yaakolola omuhono kwae muluungi mani yaakuta hu mutwe kwa Efuraimu, owali omuyere wahwo, nae omuhono kwae mukooda yakuta hu Manaase, owali omwaana waamberi. 15Yakobbo yaberesa Yosefu ehabi n'aboola ati,
“Lehe Nasaae yi balaata yaange Abburahamu neende Yisaka bahalaabanira,
Nasaae wuunindire ohutula obuyere ohwoola buti,
16Bamalaika abaamonia mu budinyu byoosi, baberese abaana bano ehabi!
Lehe eliita lyaange neende ameeta ka Abburahamu neende Yisaka kemeede ohukulihwa nikabitira mu baana bano;
haandi lehe beebulane mani beengiye mu syaalo.”
17Nae Yosefu haba siyasangaala niyabona ati laatang'ene ateere omuhono kwae muluungi hu mutwe kwa Efuraimu; mani n'abukula omuhono kwa laatang'ene, yakutusa hu Efuraimu mani n'akuta hu mutwe kwa Manaase. 18Yosefu yaboolera laatang'ene ati, “Laata haba sisiri sityo; olwohuba wuno niye omwaana waamberi; geeng'a omuhono kwao muluungi hu mutwe kwae.” 19Nae laatang'ene n'ahaya, n'aboola ati, “Manyire, mwaana waange, manyire; yesi achia ohwiingiya, haandi yesi achia ohuba omuhunuufu. Nae mwaanang'ina muyere achia ohumuhira obuhunuufu, mani abeechuhulu bae bachia ohweehola ebyaalo bihunuufu.” 20#Abaib 11:21.Mani oludaalo olwo Yakobbo yababeresa ehabi, n'aboola ati,
“Abaisiraeli bachia ohunyoolaanga ehabi nibehoonyere ameeta keeng'we, nibaboola bati,
‘Lehe, Nasaae abahole mube koti Efuraimu haandi koti Manaase.’ ”
Mu ngeri yino, Yakobbo yataangisamo Efuraimu, mani Manaase yaamuloondaho. 21Mani Yakobbo yaboolera Yosefu ati, “Bona, mbano ndi aambi ohufwa, nae Nasaae achia ohuba naawe, haandi achia ohubakalusao mu syaalo sya bakuuka yeeng'we. 22Mbereese ewe, ataali bamwaanamao, olwaande lulala lw'olugulu lwa Sekemu, lu ndatusa hu Abaamoori, nindehoonyera olugaanga lwaange neende oluyiingo lwaange.”
Currently Selected:
Ohuchaaka 48: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019