YouVersion Logo
Search Icon

Ohuchaaka 44

44
Esikoombe syakota
1Yosefu yalagira omubiihi w'enyuumba yae ati, “Yichusa ebyohulya mu sao ch'abasaacha abo, bi buli muundu anyala ohukiinga, mani ote eseende cha buli muundu mu sao yae. 2Ta esikoombe syaange sy'efeesa alala neende eseende ch'ebyohulya mu sao y'omwaana ohiramo obuyere.” Omubiihi mani n'ahola koti lu Yosefu yamuboolera. 3Nibwahya buti, baseebula abasaacha abo bawaao neende esuhiri chaabwe. 4Nae nibali bahakeendaho olukeendo ludiidi ohutula mu siko esyo, Yosefu yaboolera omubiihi wae ati, “Siingira, oloonde hu basaacha abo; nae noobanyoola, baboolere oti, ‘Lwasiina esilai musituungire neende esibi? Lwasiina mwiibire esikoombe syaange sy'efeesa? 5Sino nisyo esikoombe si omwaami waange ang'weeraangamo, haandi alakuliramo. Esiindu simuholere sibi muno.’ ”
6Omuhalaabani oyo niyaboolaho, yababoolera emboosi chino choosi. 7Nabo bamuboolera bati, “Lwasiina omwaami weefwee alomaloma emboosi chifwaana chiti? Efwe abahalaabani bao sihunyala ohuhola esiindu sifwaana siti daawe! 8Bone eseende chihwanyoola mu sao cheefwe, hwabakalusira ohutula mu syaalo sya Kanani; mani hunyala hutye ohwiiba efeesa oba esaabbu ohutula mu nyuumba? 9Mani oyo yesi-yeesi hweefwe yibananyoole naali nabyo, leha bamwiite, haandi efwe fwesi huba huchia ohuba abawaambe b'omwaami.” 10Yakobolamo ati, “Fukiriire, ohumalaho oyo yibananyoole naali nasyo yeeng'ene niye ochia ohuba omuwaambe waange, nae abadoong'ereo hweeng'we haba simuchia hubaaho omusaango.” 11Mani buli muundu nadwiihula bwaangu esao yae, naayita hu loba, haandi buli muundu niyeekulao esao yae. 12Omubiihi wa Yosefu yachaaka ohukoonya, naachaakira hu muhuluundu waabwe mani naamaliirisa neende oyo ohiramo obuyere. Esikoombe syanyoolwa mu sao ya Bbenjamini. 13Engisa nyiingi yabadiira. Betaandulaanga sa engubo chaabwe, buli muundu nadwiiha esuhiri yae, mani nibakobolayo mu siko.
14Yuda neende bamwanaang'ina niboola mu nyuumba ya Yosefu, banyoola Yosefu nasisiiriwo; mani baakwa aasi mu moni wae. 15Yosefu yababoolera ati, “Siindu siina sino simuholere? Mubeere nimukoterwe muti omuundu waakiira ano koti ese siinyala ohulakula ndafuumbula?” 16Yuda yaboola ati, “Nae efwe hunaaboolere siina omwaami waange? Hunaalomelome siina? Oba hunaayaale hutye? Nasaae afumbuule esibi sy'abawaambe bae; bonaho, hane mbao huli abawaambe b'omwaami waange, efwe alala neende oyo yeesi yibanyoolere neende esikoombe.” 17Nae Yosefu yakobolamo ati, “Ese haba, siinyala huhola endyo daawe! Oyo yeeng'ene yibanyoolere neende esikoombe niye ochia ohuba omukulwa waange, nae abadoong'ereo eng'we, mukaluheyo emirembe, muchie eyiri laata yeeng'we.”
Yuda yekweeda balehe Bbenjamini
18Yuda yaachia eyiri Yosefu mani yaamuboolera ati, “Ewe omwaami waange, hwekweeda, leha omuhalaabani wao alomalomeho naawe emboosi ndala yiti yoong'ene. Otanyoolerera omuhalaabani wao daawe, olwohuba ewe niiwe sa oloonderera hu mutuki wa Misiri mweene. 19Omwaami waange, wateeba abahalaabani bao, noboola oti, ‘Muli neende laata yeeng'we, oba omwaana weeng'we wuundi?’ 20Mani efwe hwaahuboolera sa ewe omwaami waange huti, ‘Huli neende laata yeefwe, bulaanu mukofu, neende mwaanama muyere, omwaana yi laata yeefwe yeebula mu myaaka kyae ky'obukofu, nae mwaanang'ina yafwa, niye yeeng'ene owadoong'ao mu nda ya ng'ina, mani laatang'ene amudaha muno.’ 21Waboolera abahalaabani bao bano oti, ‘Eng'we mumundeetere, muboneho sa.’ 22Mani hwaboolera ewe omwaami waange huti, ‘Omwaana haba s'anyala ohutula hu laatang'ene daawe, olwohuba naamutulaho, laatang'ene anyala ohufwa-bufwa.’ 23Mani ewe noboolera abahalaabani bao oti, ‘Ohumalaho nimwiicha neende walaka weeng'we, haba simuchia ohuumbonaho haandi daawe.’ 24Nae nihwakaluhao eyiri laata yaange omuhalaabani wao, hwamuboolera emboosi ch'omwaami waange. 25Nae laata yeefwe n'aboola ati, ‘Muchie haandi mutukulireho ebyohulya,’ 26hwamuboolera huti, ‘Haba sihunyala ohuchia daawe. Nae laata yeefwe saanakanya humuboneho haandi daawe nihutachiire neende walaka yeefwe.’ 27Mani laata yaange, omuhalaabani wao yatuboolera ati, ‘Mumanyire muti omuhasi waange yaanjibulira abaana basyaani babiri; 28mulala yaandulaho, mani ndaboola endi, mubwadyeeri bweene, esolo ndeende chamubosyoola-bosyoolamo; ohutula olwo sisiiri ohumubonaho daawe. 29Nae nimuyira wuno yesi mwamuundusaho, esidinyu syaamukwaho, ohwelalihirira hwahaanjoleho mu myaaka kyaange ky'obukofu, hunyala ohuunjita-bwiita.’ 30Mani sakira nihukaluha eyiri laata yaange omuhalaabani wao, omwaana musyaani n'atali naafwe, ao, koti obulamu bwae buli alala neende obw'omwaana oyo, 31achia ohubona ati, omwaana musyaani saali naafwe, achia ohufwa sa, mani omuhalaabani wao achia ohukera omuhalaabani wao mukofu, laata yeefwe yelalihire mani afwe. 32Olwohuba ese omuhalaabani wao ndeeyama eyiri laata yaange endi, ese mweene njia ohuliinda omwaana musyaani oyo nimboola endi, ‘Nitamukobosa yooli, njia ohuba neende omusaango mu moni wa laata yaange obulamu bwaange bwoosi.’ 33Mani sakira, husaba endi, leha ese omuhalaabani wao ndoong'e ano koti omuwaambe w'omwaami waange mu bweyaango bw'omwaana wuno; leha omwaana wuno akoboleyo neende bamwaanang'ina. 34Olwohuba, ndaakaluheyo endye eyiri laata yaange nitaali neende omwaana wuno? Haba siinyala huguma ndaabona esibi sichia ohukwa hu laata yaange.”

Currently Selected:

Ohuchaaka 44: SAMDC

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy