Ohuchaaka 35
35
Nasaae aberesa Yakobbo ehabi naali e Bbeteli
1 #
Huc 28:11-17. Nasaae yaboolera Yakobbo ati, “Siingira, ochie Bbeteli, omenye eyo; mani woombahire Nasaae wahubonehera niwiiruha Esau mwaanamao, alutaari.” 2Yakobbo bulaanu yaboolera abomu nyuumba yae, neende abaandu ba yali nabo ati, “Mutuseo banasaae bateende ba muli nabo, abeene mweelabye, mani mweefwaale engubo chiindi. 3Lehe husiingire, huchie Bbeteli, mani nyale ohwoombahayo alutaari eyiri Nasaae owahoonya ni ndi mu bidinyu haandi obeere naange buli yimbere ningeendera.” 4Mani nibaberesa Yakobbo banasaae bateende ba bali nabo, neende ebitaadi bi bali nibefwaalire; yabikisa aasi w'omutuumba kwali aambi neende Sekemu.
5Nae nibali nibasikeendaanga, amatiichasi maangi ohutula eyiri Nasaae kadiira abaandu bomu biko ebyali nibyebodoohaanie abuundu ao, mani nibahaya ohuloonda abaana ba Yakobbo. 6Nae Yakobbo niyoola Lusi (oba Bbeteli), esiri mu syaalo sya Kanani, Yakobbo neende abaandu ba yali nabo boosi, 7yoombahao alutaari, mani yalaanga abuundu ao ati, Eli-Bbeteli, olwohuba ao niwo yi Nasaae mweene yamubonehera niyeeruha ohutula eyiri Esau mwaanang'ina. 8Debbora, omwihasa wa Rebbeka yafwa, mani baamusiiha aasi w'omutuumba, emwaalo wa Bbeteli, mani abuundu ao yalaangwa ati, “Alonibakuti,” amahuluundu mbwe, “Omusaala kw'ohuliriramo.”
9Nasaae haandi yabonehera Yakobbo ohutula Mesopotamia, mani yaamuberesa ehabi. 10#Huc 32:28.Nasaae yamuboolera ati, “Eliita lyao nilyo Yakobbo; nae ohutula buti soochia hulangwaanga Yakobbo, nae ochia ohulaangwaanga Yisiraeli.” Mani eliita lyae nililaangwa Yisiraeli. 11#Huc 17:4-8.Nasaae yamuboolera ati, “Niise Nasaae w'Obunyala bwoosi, ‘nyoola olwiibulo mani wingiiye.’ Esyaalo neende emikaanda ky'ebyaalo bichia ohuhutulamo, haandi abeechuhulu bao baachia ohubechaanga abatuki. 12Esyaalo si ndaberesa Abburahamu neende Yisaka sichia ohuba esyao, haandi njia ohuberesa esyaalo esyo abeechuhulu bao abaheebulwe.” 13Nasaae mani yatula eyiri Yakobbo, abuundu yi yali n'alomelomeere nae. 14#Huc 28:18,19.Yakobbo yoombaha esiiro abuundu yi Nasaae yali n'alomalomeere nae, esiiro y'amakina, mani yaayilabya neende ohuyichuhaho efiini alala neende amafuta k'emiseituuni. 15Yakobbo yalaanga abuundu yi Nasaae yalomalomera nae ati, “Bbeteli.”
Ohufwa hwa Rakeeli
16Yakobbo neende abomu daala lyae batula Bbeteli, nae nibali nibasisiiri ohwoola Ewufuraati, Rakeeli yachaaka ohulumwa, olwohuba yali aasito. 17Nae Rakeeli esasaakisi niyali niyimuchuuna muno, omuhasi wali namwiibusa yamuboolera ati, “Guma sa; olwohuba ochia ohwiibula omwaana wuundi.” 18Nae Rakeeli niyali aambi ohukwiisa omwooyo, yamulaanga ati “Bbenoni,” amahuluundu mbwe, “Omwaana w'ebidinyu byaange,” nae laatang'ene yaamulaanga ati, “Bbenjamini,” amahuluundu mbwe, “Omwaana ochia ohuba ow'obusiha”. 19Rakeeli yafwa, mani nibamusiiha hu ngira yicha Ewufuraati (oba Bbetilehemu). 20Yakobbo mani niyoombaha esiiro hu sirindwa syae; niyo esiiro y'esiriindwa sya Rakeeli, eyisisiiruwo ohwoola buti. 21Yisiraeli yemeeda ohukeendaana, mani niyoombaha eyeema lyae n'obitire omunaara kwa Ederi.
Abaana ba Yakobbo
22 #
Huc 49:4. Bulaanu Yisiraeli niyali nasiimenyere mu syaalo esyo, Rubbeeni yaba alala neende Bbiliha, omuhasi w'erwaanyi wa laatang'ene; mani Yisiraeli yaasimanya.
Abaana basyaani ba Yakobbo bali ehumi neende babiri. 23Abaana ba Leya nibo: Rubbeeni (omwaana waamberi wa Yakobbo), Simeoni, Leefi, Yuda, Yisakari, neende Sebbuluuni. 24Abaana basyaani ba Rakeeli bali nibo: Yosefu neende Bbenjamini. 25Abaana basyaani ba Bbiliha, omuwaambe wa Rakeeli, nibo: Daani neende Nafutaali. 26Abaana ba Silupa, omuwaambe wa Leya nibo: Gaadi neende Aseri. Mani nibo abaana basyaani ba Yakobbo yeebula naali mu Padanaramu.
Ohufwa hwa Yisaka
27 #
Huc 13:18. Yakobbo yachia Mamure oba Kiriati Aribba (oba Hebburoni) eyiri Yisaka laatang'ene, yi Abburahamu neende Yisaka yi bali nibamenya. 28Emyaaka kya Yisaka kyali emia ndala neende amahumi kataanu-na-kadatu (180). 29Yisaka n'akwiisa omwooyo mani naafwa n'akofuule haandi n'angaale muno; mani baamuyira yi basiihaanga abaandu bae, mani abaana bae Esau neende Yakobbo nibamusiiha.
Currently Selected:
Ohuchaaka 35: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019