Ohuchaaka 34
34
Ohukwa hu Dina
1Ao mani Dina omwaana wa Yakobbo, yi yeebula mu Leya, naachia ohukeniya abahasi bomu syaalo esyo. 2Nae Sekemu, omwaana wa Hamori Omuhiiti, owali omuhuluundu w'esyaalo esyo niyamubona, yamukwaho yaaba nae olw'amaani koti omusaacha neende omuhasi. 3Mani omwooyo kwa Sekemu nikwekoomba Dina omuhaana wa Yakobbo; mani naadaha Dina muno, naalomaloma nae bulai muno. 4Sekemu yalomaloma neende Hamori laatang'ene mani yaboola ati, “Ewe hweere sa omuhaana wuno abe omuhasi waange.” 5Bulaanu, Yakobbo yamanya ati bakwiire hu Dina omwaana wae; nae abaana bae basyaani bali nibali mu esa nibaaya ebyaayo byae. Yakobbo yaguma ohwoola lu baana bae basyaani lu bakobolera. 6Hamori, laatang'ene Sekemu yachia eyiri Yakobbo yaalomaloma nae. 7Nae abaana ba Yakobbo nibakobola nibatula ohwaaya, basimanya, mani bawaamo omwooyo nibanyoolera muno; olwohuba Sekemu yali n'aholere esy'omusiro eyiri Abaisiraeli, ohukwa hu mwaana wa Yakobbo, esiindu sifwaana sityo haba sisyali nisihoyeerwe ohuholwa daawe.
8Nae Hamori naalomaloma nabo n'aboola ati, “Omwooyo kw'omwaana waange Sekemu kwekoomba omuhaana wao; husaba mumulehere amudeehye. 9Lehe mudeehisanie naafwe, huyire abahaana beeng'we haandi mwesi muyire abahaana beefwe. 10Munamenyaanga alala naafwe, haandi esyaalo syeefwe sinabechaanga esiikule yi muli; munamenyaangamo sa haandi muchurusireengemo sa, mani munyoolereengemo emyaandu.” 11Sekemu haandi n'aboolera laatang'ene neende bamboochong'ene Dina ati, “Lehe nyoole ohwakaanirwa mu moni wao, mani mba njia ohubaba buli siindu syoosi simunamboolere. 12Muheengereo ebiindu by'ohuhwa neende ebiyaanwa, mani njia ohubaba koti lu munaabe mumboolere, esihuluundu syeene siri mbwe muumberese omuhaana weeng'we abe omuhasi waange.”
13Nae abaana ba Yakobbo nibakobola mu Sekemu neende laatang'ene Hamori mu ngeri y'obubacha, olwohuba Sekemu yali n'akwiire hu Dina mboocho yaabwe. 14Bababoolera bati, “Haba sihunyala ohuhola esiindu sityo daawe, ohuberesa mboocho yeefwe eyiri omuundu otahebwa, olwohuba esyo sichia ohuba esiindu sy'esoni muno yi huli. 15Mani nimuhola esiindu sino syoong'ene, huchia ohubafukiirira, ‘Endi muchia ohuba koti lu efwe huli haandi buli musaacha yeesi mweeng'we aba achia ohubechaanga ow'ohuhebwaanga.’ 16Mani huchia ohubaberesa abahaana beefwe haandi fweesi huchia ohuyira abahaana beeng'we mani huchia ohumenya naang'we humale hube omuundu mulala. 17Nae nimuhaya ohufukiirira ebiindu bi hubaboolera mani mwaahaya ohuhebwa, efwe huba huchia ohuyira omuhaana weefwe mani hwebweereo.”
18Emboosi chaabwe echo cheecha chasangaasa Hamori neende Sekemu omwaana wae. 19Mani omuraaga wuno haba siyahiinda ohuhola esiindu sino, olwohuba yadaha muno omuhaana wa Yakobbo. Bulaanu Sekemu niye owali ohiramo oluyaali mu daala lya Hamori. 20Mani Hamori neende Sekemu omwaana wae niboola hu siruwa sy'esiko syaabwe mani balomaloma neende abasaacha bomu siko syaabwe baboola bati, 21“Ngaandi abasaacha bano beecha beefwe nibo, mani lehe bamenye mu syaalo syeefwe mani bachurusiremo, olwohuba bone, esyaalo sino sihoongo muno sibamala sa. Lehe huyire mani huhwe abahaana baabwe, haandi bosi bayire abahaana beefwe. 22Esiindu sinaakere abasaacha bano baanyala ohufukiirira ohumenya naafwe, nisyo ohweehola omuundu mulala, ‘mbwe buli musaacha mweefwe w'ohuhebwa koti lu abo bosi bahebwaanga.’ 23Eng'oombe chaabwe, neende ebiindu byaabwe neende ebisolo byaabwe byoosi bichia ohuba ebyeefwe. Ohutusaho, lehe hufukiirisanie nabo, mani bamenye naafwe sa.” 24Mani abasaacha boosi nibatula nibachia erwaanyi w'esiruwa syae, nibafukiirira bi Hamori neende omwaana wae Sekemu baboola, mani buli musaacha naahebwa, buli musaacha yeesi owaachia erwaanyi w'esiruwa syae.
25Nae hu ludaalo lwohudaatu, abasaacha abo nibasisiiri neende obuchuuni bw'ohuhebwa, abaana ba Yakobbo babiri, Simeoni neende Leefi, bamboochong'ene Dina, babukula engaanga chaabwe mani baseeta esiko esyo nibataamanyire, mani nibeeta abasaacha abo boosi. 26Mani nibeeteramo Hamori neende omwaana wae Sekemu, nibatusa Dina mu nyuumba ya Sekemu mani nibawaao. 27Abaana ba Yakobbo baandi, beecha baanyoola nibamalire ohwiita abaandu, mani nibachaaka ohuyaaya esiko esyo nibetuunga olwohuba bali nibakwa hu mboocho yaabwe. 28Bayaaya mani baayira eng'oombe chaabwe, ebyaayo byaabwe, esuhiri chaabwe alala neende buli siindu syoosi esyali mu siko omwo neende mu ndalo chaabwe. 29Bayira eby'obuyiinda byaabwe byoosi, bayira abaana baabwe boosi neende abahasi baabwe boosi, neende ebiindu byoosi ebyali mu nyuumba chaabwe, byoosi babiyaaya mani nibawaao nabyo. 30Yakobbo nae yaboolera Simeoni neende Leefi ati, “Ngaandi eng'we mbao muundeteere ebidinyu byeene! Bulaanu Abakanani neende Abaperisi alala neende abeebulanwa bomu syaalo sino baachia ohuhaya. Ndi neende abaandu badiidi muno, mani niwiichuhana beeha alala, bachia ohungaluuhanaho mani baaseete, ao mba njia ohusihirira, ese alala neende enyuumba yaange yoosi.” 31Nae nabo nibamukobolamo bati, “Odaha ayire mboocho yeefwe koti omucheke-bucheke sa, kose?”
Currently Selected:
Ohuchaaka 34: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019