Ohuchaaka 33
33
Yakobbo abukaanana neende Esau
1Yakobbo yabona Esau neende abasaacha emia chine (400), mani Yakobbo yaakabulamu abaana akatikaati wa Leya, Rakeeli neende abahalaabani bahasi boombi. 2Mani nataangisamo abahalaabani abo neende abaana baabwe, naamala n'aloondyaho Leya neende abaana bae, naseembyao Rakeeli neende Yosefu. 3Yakobbo mweene naabataangiriramo, yeenama mani yageeng'a omutwe hu loba amahabi kataanu-na-kabiri, ohwoola lu yasuda aambi neende mwaanang'ina.
4Esau yeeruha yaachia ohumubukaanira, yaamukwa mu sirifu, mani nibachaaka ohulira. 5Nae Esau niyasiingisa emoni, yaabona abahasi neende abaana, yaboola ati, “Abaandu booli nabo nibo wiina?” Yakobbo yakobolamo ati, “Abo nibo abaana ba Nasaae mu sisa syae yaberesa omuhalaabani wao wuno.” 6Abahalaabani neende abaana baabwe basuda aambi mani beenama aasi; 7Leya yesi neende abaana bae mu ngeri nasilala bosi basuda aambi mani nibeenama aasi. Muhumaliiriha, Yosefu neende Rakeeli bosi basuda aambi mani beenama aasi. 8Esau yateeba ati, “Emikaanda ky'abaandu kimbukaanana nakio, kyeekesa siina?” Yakobbo yakobolamo ati, “Ky'ohudaha ohwakaanirwa mu moni wao ewe omwaami waange.” 9Nae Esau yaboola ati, “Mwaanama, ebiindu bi ndi nabyo biimala sa syeeng'ene, mani leha by'oli nabyo bibe ebyao weesi weeng'ene.” 10Nae Yakobbo yaboola ati, “Haba daawe, hwekweeda endi, niimba niinjakaanirwa mu moni wao, fukiirira esiyaanwa sino ohutula mu mahono kaange, olwohuba, mubwadyeeri bweene, ohuhubonaho endi, ndi koti obweene Nasaae mweene, olwohuba wuunjakaanire neende esisa siingi muno. 11Hwekweeda endi, mala akafukiirira esirabo syaange si huleteere, olwohuba Nasaae yangwiriire esisa siingi muno, haandi olwohuba ndi neende ebiindu biimala.” Yakobbo yamwekweeda muno mani Esau yaafukiirira.
12Esau yaboola ati, “Leha hwaanje olukeendo lweefwe, ese njia ohuhweemereramo.” 13Nae Yakobbo yaboola ati, “Omwaami waange, omanyire oti, abaana baange bajoong'u nibo, haandi ebyaayo byaange neende eng'oombe chaange, binuunia. Mani nihunabyalaasa ohubyuubba mu ludaalo lulala, byoosi binyala ohufwa. 14Leha omwaami waange ataangiriremo omuhalaabani wae, ese njia ohuloondaho kaala, ngeende koti luunyala ebyaayo byaange nibyeemereremo alala neende abaana baange, ohwoola lu ndoole hu mwaami waange mu Seyiri.”
15Esau mani yaboola ati, “Leha hulehereho abasaacha baandi hu baandu bali naange,” Nae Yakobbo yaboola ati, “Esyo haba sisihoyerwa. Leha nyoole ohwakaanirwa mu moni wao ewe omwaami waange.” 16Mani hu ludaalo olwo, Esau yakobola Seyiri. 17Nae Yakobbo yachia Sukooti, mani yeeyoombahira enyuumba. Yaaholera ebyaayo byae ehoonge; sakira abuundu ao alaangwa ati, “Sukooti.”
18Yakobbo niyali n'akeenda naachia Pedanaraamu, n'asisiiri ohwoola mu siko, yoola bulai mu siko sya Sekemu, esiri mu syaalo sya Kanani, mani yeeyikama abweene ao. 19#Yos 24:32; Yow 4:5.Yakobbo yabukula ebituundu by'efeesa emia ndala (100), mani yaakula eloba hu baana ba Hamori, laatang'ene Sekemu. Huu loba elyo nihwo hu yoombahaho eyeema lyae. 20Mani Yakobbo yoombaha ao alutaari, yaayilaanga ati, “Eli-Elohe-Yisiraeli,” amahuluundu mbwe, Eli, Nasaae wa Yisiraeli.
Currently Selected:
Ohuchaaka 33: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019