Ohuchaaka 27
27
Yisaka aberesa Yakobbo ehabi
1Yisaka bulaanu yali n'akofuule haandi nawofuule. Yalaanga Esau omwaana wae muhuluundu yaamuboolera ati, “Mwaana waange!” Nae yakobolamo ati, “Mbano nduwo.” 2Yisaka n'amuboolera ati, “Bona, mbano ngofuule; mani haba siimanyire oludaalo lu ndahafwiireho. 3Bulaanu bukula eby'ohuyiimira byao, oluyiingo neende obusaale bwao mani ochie mu siino oyiime. Ndaha wunjitiire esisolo, 4mani wundeehere ebyohulya bilai, ebyo bi ndaha muno, mani wundeetere ndie; mani huberese ehabi nisisiiri ohufwa.”
5Bulaanu, Rebbeka yali n'atekereese n'awulira bi Yisaka yali n'abooleraanga Esau omwaana wae. Esau niyali n'achiire mu siino ohuyiima aleteere laatang'ene esolo, 6Rebbeka yaboolera omwaana wae Yakobbo ati, “Mbuliire laatao n'abooleraanga Esau mwaanamao ati, 7‘Chia wundeetere esisolo mani wundeehere ebyohulya bilai ndie, mani huberese ehabi mu moni w'Omwaami nisisiiri ohufwa.’ 8Sakira bulaanu, mwaana waange, wulira buli mboosi yihuboolera mani ohole koti lu hulagira. 9Chia mu byaayo mani wundeetere embusi ehomefu enjere chibiri, mani nyale ohudeehera laatao ebyohulya bilai by'adaha. 10Ochia ohubiyirira laatao alye, anyale ohuhuberesa ehabi n'asisiiri ohufwa.” 11Nae Yakobbo yaboobera Rebbeka ng'ina ati, “Bona, Esau mwaanama aliho obwooya buungi hu mubiri, nae omubiri kwaange mukwalaafu nikwo. 12Laata yaange anyala ohundiiraho, mani yaamanya ati ndi ohumubacha, mani ndeleetera esibwaabo esiha sy'ehabi.” 13Ng'ina yamuboolera ati, “Mwaana waange, leha esibwaabo syao sibe hweese, ewe mala akafukiirira emboosi chaange, mani ochie obiindeetere.” 14Yakobbo yaachia yaabibukula yaabileetera ng'ina, nae ng'ina yadeeha ebyohulya bi laatang'ene yali n'adaha. 15Rebbeka yabukula engubo ndai muno echia Esau omwaana wae muhuluundu, echali nae mu nyuumba yae, mani yachifwaasa Yakobbo omwaana wae muyere. 16Nae amaseero k'embusi njere, yakata hu mahono k'omwaana wae Yakobbo neende mu kosi wae ohutaaliho obwooya. 17Mani yaberesa omwaana wae Yakobbo ebyohulya bilai ebyo neende omugaati, bi yali n'adeehere.
18Yakobbo yaachia eyiri laatang'ene, mani yaboola ati, “Laata”; nae laatang'ene yaboola ati, “Mbano ano; niiwe wiina, mwaana waange?” 19Yakobbo yaboolera laatang'ene ati, “Niise Esau omwaana wao waamberi. Mbano holere koti lu wuumboleere; mani singiira wiihale olye enyama y'esisolo syaange, wuumbeerese ehabi.” 20Nae Yisaka yateeba omwaana wae oyo ati, “Mwaana waange, onyoolere otye esolo eyo bwaangu butyo?” Nae yakobolamo ati, “Olwohuba Omwaami Nasaae wao niye owunyaliire.” 21Yisaka yaboolera Yakobbo ati, “Mwaana waange, suda aambi mani hudiireho, manye oba niiwe omwaana waange mweene Esau kose haba.” 22Yakobbo yasuda aambi neende Yisaka laatang'ene, owamudiira mani yaamubabaasaho yaboola ati, “Ekono lya Yakobbo nilyo, nae amahono ka Esau niko.” 23Mani yaahaya ohumumanya olwohuba amahono kae kaliho obwooya koti amahono ka mwaanang'ina Esau; mani Yisaka yamala yaamuberesa ehabi. 24Yamuteeba ati, “Niiwe elalira omwaana waange Esau kose?” Nae yaakoboolamu ati, “Ngaandi niise.” 25Mani yaamuboolera ati, “Yindeetere, ndye esolo y'omwaana waange mani huberese ehabi.” Mani yaamuleteera, yaayilya; yaleeta efiini yosi yaang'wa. 26Yisaka laatang'ene yamuboolera ati, “Mwaana waange suda aambi wuungwe mu sirifu.” 27#Abaib 11:20.Mani yasuda aambi yaamukwa mu sirifu; niyawunyiirisa hu ngubo chae; yamuberesa ehabi yaboola ati,
“Bona, esing'aari sy'omwaana waange
siri koti esing'aari sy'omukuunda ku Omwaami abereese ehabi!
28Leha Nasaae ahuberese olume lwomu kulu,
neende obulai bw'eloba,
neende ekesa liingi neende efiini enyiingi.
29 #
Huc 12:3. Leha abaandu bahuhalaabanire
haandi leha ebyaalo bihwiinamire.
Ba omwaami wa bamwaanamao,
haandi leha bamwaanamaao bahwiinamire.
Buli muundu ohubwaaba leha abwaabwe,
haandi buli muundu ohuba ehabi leha anyoole ehabi!”
Esau asaba Yisaka ehabi
30Yisaka niyamala ohuberesa Yakobbo ehabi ati, Yakobbo n'asisiiri ohutula eyiri laatang'ene, Esau yoola n'atula mu huyiima hwae. 31Mani yesi yadeeha ebyohulya bilai, mani yaabileteera laatang'ene. Mani yaamuboolera ati, “Leha laata asiingire, olye enyama yi ese omwaana wae muleetere, mani wumberese ehabi.” 32Yakobbo laatang'ene yamuteeba ati, “Niiwe wiina?” Nae yaakobolamo ati, “Niise Esau, omwaana wao muhuluundu.” 33Mani Yisaka yakwaamo oluteengo, n'aboola ati, “Wiina mweene oyiimire esolo yayindeetera ndayirya yoosi ewe n'osisiiri ohwiicha mani ndaamuberesa ehabi? Eee, achia ohunyoola ehabi.” 34Nae Esau niyawulira emboosi cha laatang'ene, yahubba wuuwi yaalira muno, mani yaboolera laatang'ene ati, “Ewe laata yaange, hwekweeda, syeesi wuumbereseho ehabi!” 35Nae yakobolamo ati, “Mwaanamao yeechere yaambachirisa, mani yaayira ehabi yao.” 36#Huc 25:29-34.Esau yaboola ati, “Sino haba sinisyo esyakera baamulaanga Yakobbo? Olwohuba lino nilyo ehabi lyoohubiri naayiraanga ehabi yaange. Yanyuula obusiha bwaange koti omwaana muhuluundu; haandi mbao bulaanu ayirire ehabi yaange.” Yateeba n'aboola ati, “Haba siwumbihiireho ehabi yoosi daawe?” 37Yisaka yakobola mu Esau n'aboola ati, “Bona, muholere abe omwaami wao, haandi holere bamwaanang'ina boosi ohuba abawaambe bae. Mubereese emwo yoosi neende efiini ohuliinda obulamu bwae. Mani mwaana waange, ndaahuberese siina syeene?” 38#Abaib 12:17.Esau yekweeda laatang'ene yaboola ati, “Laata yaange, mbeeho sa syesi ehabi ayahaba ndala yoong'ene sa yiti!.” Esau yaayuulira mu kono ly'aakulu mani n'achaaka ohulira. 39Yisaka laatang'ene yamukobolamo ati,
“Bona, eloba ly'ochia ohumenyaangamo haba silichia ohuba elai daawe,
haandi olume lutula aakulu haba siluchia hulitoonyaho.
40 #
Huc 36:8; 2 Abat 8:20. Ochia ohubao ohweema hu lugaanga lwao,
haandi ochia ohuba omuhalaabani muwaambe wa mwaanamao;
nae niweechimula,
ochia ohuhalaka ekoombo lyae ohutula hu mabeka kao.”
41Esau yahayihana neende Yakobbo ohweema hu habi yi laatang'ene yamuberesa, mani Esau yaboola mu mwooyo ati: “Mbao endaalo ch'ohulira laata yaage n'afwiire chiri aambi ohwoola; ohwoola lu njia ohwiita mwaanama Yakobbo oyo.” 42Rebbeka niyamanya emboosi cha Esau omwaana wae muhuluundu, yalaanga Yakobbo omwaana wae muyere, yaamuboolera ati, “Bona, Esau mwaanamao nguyo adaha ohuhwiita amale awuuchuluhe. 43Sakira mwaana waange, bulaanu tekeeresa bi huboolera, siingiriramo, wiiruhe ochie Harani eyiri Labbani hoochao, 44mani omenye nae ebiha bidiidi, ohwoola lu etima lya mwaanamao lyahakwe. 45Etima lya mwaanamao lyahoole lyaakwa, yeebirira esiindu siwamuhola. Ao niwo yinjiira ohuhutumira omuundu mani ahweende ohutula eyo. Haba siindaha ohufwiirwa abaana baange boombi hu ludaalo lulala.”
Yisaka atuma Yakobbo eyiri Labbani
46Rebbeka yaboolera Yisaka ati, “Obulamu bwaange haba sibudahana neende abahasi Bahiiti. Niwiichuhana Yakobbo yadeehya mulala hu bahasi Bahiiti koti bano, sibulao si mba ninyoolere mu bulamu buno daawe.”
Currently Selected:
Ohuchaaka 27: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019