Ohuchaaka 14
14
Abburamu yaabina Loti
1Abatuki bane, Amurafeeli omutuki wa Bbabbilooni, Arioki omutuki wa Elasaari, Kedorilaomeri omutuki wa Elamu, neende Tidali omutuki wa Goyiimu. 2Abatuki bano bachaakisa ebiita neende abatuki baandi bataanu: Bbeera omutuki wa Sodomu, Bbirisa omutuki wa Gomora, Sinabbu omutuki wa Aduma, Semebberi omutuki wa Sebboyimu, neende omutuki wa Bbela (oba Soari). 3Abatuki bataanu bano baholera alala mani babuusira alala amaye kaabwe mu hooho lya Sidimu (Enyaanja y'Omuunyu). 4Bali bahalaabaniire Kedorilaomeri hulw'embaka y'emyaaka ehumi neende kibiri, nae mu mwaaka kwa ehumi neende kidatu beecha baahayuha. 5Mu mwaaka kwa ehumi neende kine, Kedorilaomeri alala neende abatuki ba yali nabo, baseeta bayiingira Refaimu mu Asiteroti-Karinaimu, Omususimu mu Haamu, Omuemimu mu Safe-Kiriataimu; 6neende Abaahoori hu lugulu lwaabwe lwa Seyiri ohwoolera elalira Eliparani, hu lwaaho lw'esiparara. 7Bano bakaluuhana baakobola mani niboola Enumisipati (Kadesi). Nibayiingira esyaalo sy'Abameleki syoosi, bayiingira neende Abaamoori abali nibamenya mu Hasasonitamari. 8Omutuki wa Sodomu neende owa Gomora, neende owa Aduma, neende owa Sebboyimu, neende owa Bbela (Soari) basiingira mani beengira mu biita byali mu hooho lya Sidimu. 9Bali alala neende Kedorilaomeri omutuki wa Elamu, Tidali omutuki wa Goyiimu, Amorafeeli, omutuki wa Sinaari, neende Arioki, omutuki wa Elasaari, abatuki bane nibalwaania abatuki bataanu. 10Bulaanu ehooho lya Sidimu lyali lyeechulamo ameena k'ewula. Mani abatuki ba Sodomu neende Gomorah nibali nibeeruha, abaandi bakwiichaanga mu meena kano nibaayandamo, nae abadoong'ao nibeeruhira mu lugulu. 11Abatuki bane bano bayaaya emyaandu kya Sodomu neende Gomora, neende obuyiinda bwaabwe bwoosi nibeweerao. 12Nae bayiriramo Loti, omwaana wa mwaanang'ina Abburamu, owali niyamenya mu Sodomu, alala neende emyaandu kyae kyoosi mani nibeweerao.
13Nae mulala hu baandu bano yaboolera Abburamu Omuibburania owali niyamenya aambi neende emisaala myoolerefu kya Mamure Omuamoori, mwaanang'ina Esikoli neende Aneri. Bano bali abakwa alala neende Abburamu. 14Abburamu niyawulira ati omunaluyia wae yawaambwa yaayirwa mu buwaambe, yabukula abasaacha bakugu abali nibeebulirwa mu daala lyae, aboola emia chidatu neende ehumi-na-bataanu-na-badatu (318), mani nibabaloondaho ohwoolera elalira Daani. 15Esiro nisyoola, Abburamu yakabulamo abalwaani bae. Omweene neende abahalaabani bae nibabaseeta mani nibaboongaho ohwoola Hobba, emukulu wa Damasiko. 16Mani Abburamu n'akobosa emyaandu ki abasuku bali nibayaayire. Yakobbosa neende Loti omunaluyia wae alala neende emyaandu kyae neende abahasi neende abaandu bosi.
Melikisedeki aberesa Abburamu ehabi
17Abburamu niyakobola n'amalire ohuyiingira Kedoriloameri alala neende abatuki ba yali nabo, omutuki wa Sodomu yachia ohumubukaanira mu hooho lya Safe (Ehooho ly'omutuki). 18#Abaib 7:1-10.Nae Melikisedeki, omutuki wa Salemu, haandi owali yesi omulaamisi wa Nasaae w'Aakulu Muno, yaleetera Abburamu omugaati neende efiini. 19Mani Melikisedeki yaberesa Abburamu ehabi n'aboola ati,
“Leha Nasaae w'Aakulu Muno aberese Abburamu ehabi,
oyo owaloonga ekulu neende esyaalo;
20haandi Nasaae w'Aakulu Muno w'ehabi,
olwohuba ateere abasuku bao mu mahono kao!”
Abburamu yaberesa Melikisedeki silala sy'ehumi sya buli siindu. 21Omutuki wa Sodomu n'aboolera Abburamu ati, “Ngobosere abaandu, nae ewe wedoong'isire emyaandu.” 22Nae Abburamu yakobola mu mutuki wa Sodomu n'aboola ati, “Malire ohwechubira Omwaami, Nasaae w'Aakulu Muno, oyo owaloonga ekulu neende esyaalo, 23endi siinjia hubukulaho kata oluwuusi lulala, kata sa olusya lw'ebiraato lwoong'ene, kata sa esiindu silala siti esyao syoosi daawe, ohaye ohuboola oti, ‘Ndakera Abburamu yaaba omuyiinda.’ 24Ese haba siinjia hwebukuliraho esiindu syoosi, nae ebiindu bi baraaga balya, neende omukabo kw'abaandu bachia naange, leha Aneri, Esikoli, neende Mamure bayire omukabo kwaabwe.”
Currently Selected:
Ohuchaaka 14: SAMDC
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019