YouVersion Logo
Search Icon

- उत्पत्ति 26

26
इसहाक कौ गरार में निवास
1ऊ देस में अकाल पड़ो, जौ ऊ पैलां अकाल सें अलग हतो जो अब्राहम के दिनन में पड़ो हतो। ई लाने इसहाक गरार हों पलिश्‍तियों के राजा अबीमेलेक के लिगां गओ। 2उतै यहोवा परमेसुर ने ऊहों दरसन दैकें कई, “मिस्र में नें जा; जो देस मैं तोहों बताओं ओई में रै। 3तें ऐई देस में परदेसी होकें रै, और मैं तोरे संगै रैहों, और तोहों आसीस दैहों; और जे सब देस मैं तोए हों और तोरे बंस हों दैहों; और जो कौल मैंने तोरे बाप अब्राहम सें खाई हती, ऊहों मैं पूरी करहों। 4मैं तोरे बंस हों आकास के तारागण के जैसो करहों; और मैं तोरे बंस हों जे सब देस दैहों, और पृथ्‍वी की पूरी जातियन तोरे बंस के कारन अपने हों धन्‍य मानहें। 5कायसे अब्राहम ने मोरी मानी, और जो मैंने ऊहों सौंपो हतो ऊहों और मोरे हुकमों, बिधियों और ब्‍यावस्था कौ पालन करो।”
6ई लाने इसहाक गरार में रै गओ। 7जब ऊ जागां के मान्‍सन ने ऊकी बईयर के बारे में पूंछो, तब ऊने जौ सोचकें कि जदि मैं ऊहों अपनी बईयर कहों तौ इतै के मान्‍स रिबका के कारन जो बहुतई सुन्‍दर आय मोए हों मार डालहें, ऊने जवाब दओ, “बा तौ मोरी बहन आय।” 8जब ऊहों उतै रैत भए मुतके दिना हो गए, तब एक दिना पलिश्‍तियों के राजा अबीमेलेक ने जंगला में सें झांककें का हेरो कि इसहाक अपनी बईयर रिबका के संगै प्रेम कर रओ आय। 9तब अबीमेलेक ने इसहाक हों टिरवाकें कई, “बा तौ पक्‍कौ तोरी बईयर आय; फिन तेंने काए ऊहों अपनी बहन कओ?” इसहाक ने जवाब दओ, “मैंने सोचो हतो कि एैसो नें होए कि ऊके कारन मैं मर जाओं।” 10अबीमेलेक ने कई, “तेंने हम सें जौ का करो? एैसे तौ परजा में सें कोऊ तोरी बईयर के संगै आसानी सें कुकर्म कर सकत, और तें हमें पाप में फसात।” 11ई लाने अबीमेलेक ने अपनी पूरी परजा हों हुकम दओ, “जो कोऊ ऊ मान्‍स हों या ऊ बईयर हों छूहै, ऊ पक्‍कौ मार डालो जैहै।”
12फिन इसहाक ने ऊ देस में धरती जोती-बोई, और ओई साल में सौ गुना फल पाओ; कायसे यहोवा परमेसुर ने ऊहों आसीस दई, 13और ऊ बढ़ो और ऊकी बढ़ती होत गई, इतै लौ कि ऊ बेजा पईसावारो मान्‍स हो गओ। 14जब ऊके गाड़र-छिरियां, गईया-बैला और मुतके दास-दासियां भए; तब पलिश्‍ती ऊसें जलन लगे। 15ई लाने जितेक कुओं हों ऊके बाप अब्राहम के दासों ने अब्राहम के जियत भए खोदे हते, उनहों पलिश्‍तियों ने माटी सें मूंद दओ। 16तब अबीमेलेक ने इसहाक सें कई, “हमाए लिगां सें चलो जा; कायसे तें हमसें बहुतई ताकतवारो हो गओ आय।” 17सो इसहाक उतै सें चलो गओ, और गरार की घाटी में अपनो तम्‍बू ठांड़ो करके उतै रैन लगो। 18तब जो कुआं ऊके बाप अब्राहम के दिनन में खोदे गए हते, और अब्राहम के मरबे के बाद पलिश्‍तियों ने मूंद दए हते, उनहों इसहाक ने फिन उघड़वाओ; और उनके बेई नाओं रखे, जो ऊके बाप ने रखे हते। 19फिन इसहाक के दासों हों घाटी में खोदत-खोदत बहते पानूं कौ सोता मिलो। 20तब गरार के चरवाहों ने इसहाक के चरवाहों सें झगड़ा करो और कई, “जौ पानूं हमाओ आय।” ई लाने ऊने ओई कुआं कौ नाओं एसेक#26:20 मतलब झगड़ा या बिवाद रखो; कायसे बे ऊसें झगड़े हते। 21फिन उनोंरन ने दूसरो कुआं खोदो, और उनोंरन ने ऊके लाने भी झगड़ा करो; ई लाने ऊने ऊकौ नाओं सित्‍ना#26:21 मतलब बिरोध रखो। 22तब ऊने उतै सें कड़कें एक और कुआं खुदवाओ; और ऊके लाने उनोंरन ने झगड़ा नें करो; ई लाने ऊने ऊकौ नाओं जौ कहकें रहोबोत#26:22 मतलब बिलात जांगा रखो, “अब तौ यहोवा परमेसुर ने हमाए लाने मुतकी जागां दई आय, और हम ई देस में फलहें-फूलहें।”
23उतै सें ऊ बेशेर्बा हों गओ। 24ओई दिना यहोवा परमेसुर ने रात में ऊहों दरसन दैकें कई, “मैं तोरे बाप अब्राहम कौ यहोवा परमेसुर आंव; नें डर, कायसे मैं तोरे संगै आंव, और अपने दास अब्राहम के कारन तोहों आसीस दैहों, और तोरो बंस बढ़ाहों।” 25तब ऊने उतै एक बेदी बनाई, और यहोवा परमेसुर सें बिन्‍तवाई करी, और अपनो तम्‍बू उतईं ठांड़ो करो; और उतै इसहाक के दासों ने एक कुआं खोदो।
इसहाक और अबीमेलेक के मजारें सन्‍धि
26तब अबीमेलेक अपने मंत्री अहुज्‍जत और अपने सेनापति पीकोल हों संगै लैकें, गरार सें ऊके लिगां गओ। 27इसहाक ने उनसें कई, “तुमने मोए सें बैर करके अपने मजारें सें काड़ दओ हतो, अब मोरे लिगां कायहों आए आव?” 28उनोंरन ने कई, “हमने तौ अपने सामूं हेरो आय कि यहोवा परमेसुर तोरे संगै रैत आय; ई लाने हमने सोचो कि तें तौ यहोवा परमेसुर कुदाऊं सें धन्‍य आय, सो हमाए और तोरे मजारें कौल खाई जाए, और हम तोए सें ई बारे में बाचा बंधाएं, 29कि जैसे हमने तोहों नईं छुओ, बल्‍कि तोरे संगै हमेसा भलाई करी आय, और तोए हों सान्ति सें बिदा करो, ऊके अनसार तें भी हम सें कोऊ बुराई नें करहै।” 30तब ऊने उनहों जेवनार दई और उनोंरन ने खाओ-पिओ। 31भुन्‍सारे उन सबई ने जल्‍दी उठकें आपस में कौल खाई; तब इसहाक ने उनहों बिदा करो, और बे राजी खुसी सें ऊके लिगां सें चले गए। 32ओई दिना इसहाक के दासों ने आकें अपने ऊ खोदे गए कुआं कौ वृत्तांत सुनाकें कई, “हमें पानूं कौ एक सोता मिलो आय।” 33तब ऊने ऊकौ नाओं शिबा#26:33 मतलब कौल रखो; ऐई कारन ऊ नगर कौ नाओं आज लौ बेशेर्बा#26:33 मतलब कौल कौ कुंआ पड़ो आय।
एसाव की बिदेसी बईयरें
34जब एसाव चालीस साल कौ भओ, तब ऊने हित्ती बेरी की मोंड़ी यहूदीत, और हित्ती एलोन की मोंड़ी बासमत सें ब्‍याव कर लओ; 35और इन बईयरों के कारन इसहाक और रिबका दुखी भए।

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy