Psalmyn 94
94
PSAL. 94.
Deus ultionum.
1O Hiarn Yee, dhyts ta bentyn dy ghoaill kerraghey:
uss Yee, dhyts ta kerraghey bentyn, jean oo hene y hoilshaghey.
2Trogg ort, uss Vriw y theihll:
as jean ny mooaralee y chooilleeney lurg nyn doilchin.
3Hiarn, caid nee ny mee-chrauee:
caid nee yn vooinjer vee-chrauee boggyssagh?
4Caid nee ooilley ny drogh-yantee loayrt cha mooaralagh:
as goaill orroo lheid y voggyssagh voyrnagh?
5T’ad bwoalley sheese dty phobble, O Hiarn:
as jannoo tranlaase er dt’eiraght.
6T’ad dunverys y ven-treoghe, as y joarree:
as cur y liannoo gyn ayr dy baase.
7As foast t’ad gra, Cha n’aggle dooin, cha jean y Chiarn fakin:
cha-moo ver Jee Yacob geill da.
8Gow-jee tastey, shiuish vee-hushtee mastey’n pobble:
O shiuish ommydanyn, cooinn nee shiu toiggal?
9Eshyn ren y chleaysh y hoiaghey, nagh jean eh clashtyn:
ny eshyn ren y thooill, nagh jean eh fakin?
10Ny eshyn ta cummal seose ny ashoonyn:
she eshyn ta gynsaghey da dooinney tushtey, nagh jean eshyn kerraghey?
11Ta fys ec y Chiarn er smooinaghtyn dooinney:
nagh vel ad agh fardail.
12Bannit yn dooinney t’ow dy smaghtaghey, O Hiarn:
as dy ynsaghey ayns dty leigh;
13Dy vod oo surranse y choyrt da ayns earish seaghyn:
derrey vees yn ooig er ny chleiy son ny mee-chrauee.
14Son cha jean y Chiarn failleil e phobble:
cha-moo nee eh treigeil e eiraght;
15Derrey hyndaa's cairys reesht gys briwnys:
nee adsyn ooilley ta firrinagh ayns cree, geiyrt er.
16Quoi nee girree seose mârym noi ny mee-chrauee:
ny quoi hassys er my cheu noi ny drogh-yantee?
17Mannagh beagh y Chiarn er chooney lhiam:
cha row saase my chour nagh beagh m’annym er ny choyrt ny-host.
18Agh tra dooyrt mee, Ta my chass er skyrraghtyn:
ren dty vyghin’s, O Hiarn, mish y chummal seose.
19Ayns ymmodee ny smooinaghtyn trimshagh v’aym ayns my chree:
ta dty gherjagh er ooraghey m’annym.
20Bee veg ayds dy yannoo rish y stoyl-briwnys dy vee-chairys:
ta cummey yn aggair myr y leigh?
21T’ad chaglym cooidjagh noi annym y dooinney cairagh:
as deyrey gy baase yn uill neu-chyndagh.
22Agh yn Chiarn my chemmyrk:
as my Yee niart my hreishteil.
23Cooilleenee eh orroosyn nyn olkys, as stroie-ee eh ad ayns y ghoanlys oc hene:
dy-jarroo, nee’n Chiarn yn Jee ain ad y stroie.
Currently Selected:
Psalmyn 94: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society