Psalmyn 89
89
EVENING PRAYER.
PSAL. 89.
Misericodias Domini.
1Bee m’arrane kinjagh jeh kenjallys-ghraihagh y Chiarn:
lesh my veeall bee’ms dy-bragh soilshaghey dt’irriney veih un sheeloghe gys sheeloghe elley.
2Son ta mee er ghra, Bee myghin er ny hoiaghey seose son dy-bragh:
dt’irriney nee oo y hickyraghey ayns ny niaughyn.
3Ta mee er yannoo conaant rish my er-reiht:
ta mee er vreearrey da David my harvaant;
4Dty ’luight’s nee’ms y hickyraghey son dy-bragh:
as dty stoyl-reeoil y hoiaghey seose veih sheeloghe gys sheeloghe.
5O Hiarn, nee ny niaughyn hene dt’obbraghyn yindyssagh y voylley:
as dt’irriney ayns sheshaght ny nooghyn.
6Son quoi eh er-skyn ny bodjallyn:
vees er ny hoyllaghey rish y Chiarn?
7As quoi eshyn mastey ny Jee'ghyn:
vees casley rish y Chiarn?
8Ta aggle feer vooar dy v’er ny ghoaill roish Jee ayns chaglym-cooidjagh ny nooghyn:
as ta arrym dy ve er ny choyrt da lioroosyn ooilley ta mygeayrt-y-mysh.
9O Hiarn Yee jeh sheshaght flaunys, quoi ta goll rhyts:
ta dt’irriney, Hiarn smoo niartal, er dy-chooilley cheu.
10T’ow reill dewlys ny marrey:
t’ow kuinaghey ny tonnyn eck tra t’ad troggal.
11T’ow er choyrt Egypt fo-chosh, as er stroie eh:
t’ow er skeayley dty noidyn dy-lhean lesh dty roih niartal.
12Ta ny niaughyn lhiats, lhiats myrgeddin yn thalloo:
t’ow er hoiaghey undin y seihll rhunt, as ooilley ny t’ayn.
13T’ow er yannoo yn twoaie as y jiass:
nee Tabor as Hermon boggey y ghoaill ayns dt’Ennym.
14Ta roih niartal ayd:
s’lajer ta dty laue’s, as ard ta dty laue yesh.
15Cairys as cor'mid ta stoyl-reeoil dty ynnyd-vaghee:
hed myghin as firrinys roish dt’eddin.
16Bannit ta’n pobble, O Hiarn, oddys boggey y ghoaill ayn-yd:
nee ad gimmeeaght ayns soilshey dt’eddin.
17Bee yn taitnys oc gagh-laa ayns dt’Ennym’s:
as ayns dty chairys nee ad boggyssagh;
18Son uss gloyr y niart oc:
as ayns dty chenjallys-ghraihagh nee oo nyn ghing y hroggal seose.
19Son ta’n Chiarn nyn vendeilagh:
ta’n Er Casherick dy Israel nyn Ree.
20Loayr oo keayrt dy row ayns ashlishyn rish dty nooghyn, as dooyrt oo:
Ta mee er choyrt cooney er fer ta niartal; Ta mee er hoiaghey seose fer reiht ass y pobble.
21Ta mee er gheddyn David my harvaant:
lesh my ooïll chasherick ta mee er n’ooïllaghey eh.
22Cummee my laue eshyn dy-shickyr:
as nee my roih eh y niartaghey.
23Cha bee yn noid abyl tranlaase y yannoo er:
cha jean mac yn olkys aggair y yannoo da.
24Bwoaill-ym sheese e noidyn kiongoyrt rish yn eddin echey:
as nee’m adsyn y stroie ta feoh oc ersyn.
25Bee m’irriney neesht as my vyghin mârish:
as ayns m’Ennym’s bee’n niart echey er ny hoiaghey seose.
26Soie-ym seose yn reill echey neesht er yn aarkey:
as e laue yesh ayns ny thooillaghyn.
27Nee eh geamagh hym, She uss my Ayr:
my Yee, as my haualtys lajer.
28As nee’ms eh y yannoo my vac shinney:
ny syrjey na reeaghyn y thallooin.
29Freill-ym my vyghin er e hon son dy-bragh:
as shassee my chonaant shickyr mârishyn.
30Ver-ym er y sluight echey myrgeddin dy arraghtyn son dy-bragh:
as y stoyl-reeoil echey myr laghyn niau.
31Agh my hreigys yn chloan echey my leigh:
as nagh nimmee ad ayns my vriwnyssyn;
32My vrishys ad my ’lattyssyn, as nagh vreill ad m’annaghyn:
nee’ms ny foilljyn oc y cherraghey lesh y clatt, as nyn beccah lesh booillaghyn.
33Ny-yeih, my chenjallys-ghraihagh cha goym dy-bollagh voïsh:
cha-moo lhiggym da m’irriney dy ailleil.
34My chonaant cha jean-ym y vrishey, ny yn red y chaghlaa t’er n’gholl magh ass my veillyn:
ta mee er n’yannoo breearrey un cheayrt liorish my chasherickys, nagh vail-ym David.
35Nee yn sluight echey tannaghtyn son dy-bragh:
as ta’n stoyll echey goll-rish y ghrian kiongoyrt rhym.
36Nee eh shassoo shickyr son dy-bragh myr yn eayst:
as myr yn feanish firrinagh ayns niau.
37Agh t’ow er chur cooyll rish as er hreigeil dt’Er-ooïllit:
as t’ow jymmoosagh rish.
38T’ow er vrishey conaant dty harvaant:
as er hilgey yn attey echey gys y thalloo.
39T’ow er lieggal ooilley e voallaghyn:
as er vrishey sheese ny tooryn lajer echey.
40T’adsyn ooilley ta goll shiaghey dy spooilley eh:
as t’eh er jeet dy ve ny oltooan da e naboonyn.
41T’ow er hoiaghey seose laue yesh e noidyn:
as er chur orroosyn ooilley va n’oï dy ghoaill boggey.
42T’ow er ghoaill ersooyl foyr e chliwe:
as cha vel oo cur da barriaght ayns y chaggey.
43T’ow er choyrt ass e ghloyr:
as er hilgey e stoyl-reeoil sheese gys y thalloo.
44Laghyn e aegid t’ow er yannoo giare:
as er choodaghey eh lesh mee-ooashley.
45Hiarn, caid nee uss oo hene y ollaghey, son dy-bragh:
as jean dty chorree lostey goll-rish aile?
46O cooinee cre cha giare as ta my hraa:
cre’n-fa t’ow uss er n’yannoo dy-chooilley ghooinney dy ve fardalagh?
47Quoi’n dooinney ta bio, nagh vaik y baase:
as jean eh yn annym echey y livrey veih laue yn oaie?
48Hiarn, cre vel dty henn chenjallyssyn-ghraihagh:
yiall oo lesh breearrey da David ayns dt’irriney?
49Cooinee, Hiarn, er yn oltooan t’ec dty harvaantyn:
as kys ta mee gymmyrkey ayns m’oghrish scammyltyn ymmodee sleih;
50Lhieu ta dty noidyn er dty oltooaney; as er hilgey scammylt er kesmadyn dt’Er-ooïllit:
dy row yn Chiarn er ny voylley son dy-bragh. Amen, as Amen.
Currently Selected:
Psalmyn 89: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society