Psalmyn 74
74
PSAL. 74.
Ut quid Deus.
1O Yee, cre’n-fa t’ow freayll oo hene voïn choud dy hraa:
cre’n-fa ta dty yymmoose cha cheh noi kirree dty phastyr?
2O smooinee er dty phobble t’ow er chionnaghey, as er veaysley er dyn chenn earish.
3Smooinee er sheeloghe dt’eiraght:
as er cronk Sion, ayn t’ow er chummal.
4Trogg seose dty chassyn, dy vod oo dy-bollagh dy-chooilley noid y stroie:
t’er n’yannoo olk ayns dt’ynnyd casherick.
5Ta dty noidyn gullaghey ayns mean dty haglym cooidjagh:
as soiaghey seose nyn mergaghyn son cowraghyn.
6Eshyn ren feigh y ghiarey sheese roish nish ass ny biljyn chiu:
v’eh ry akin dy chur lesh eh gys obbyr aalin.
7Agh nish t’ad brishey sheese ooilley yn obbyr granit eck:
lesh teighyn as oardyn.
8T’ad er hoiaghey dt’ynnydyn casherick er aile:
as er lhieggal sheese ynnyd-vaghee dt’Ennym, eer gys y laare.
9Dy-jarroo, dooyrt ad ayns nyn greeaghyn, Lhig dooin ad y stroie dy-bollagh ooilley-cooidjagh:
myr shoh t’ad er lostey seose ooilley thieyn Yee ’sy cheer.
10Cha vel shin fakin nyn gowraghyn; cha vel phadeyr er-mayrn:
cha vel unnane ta toiggal caid.
11O Yee, caid nee eshyn ta dt’oï yn vee-onnor shoh y yannoo:
caid nee yn noid loayrt dy-mollaghtagh noi dt’Ennym, nee son dy-bragh?
12Cre’n-fa t’ow tayrn back dty laue:
kys te nagh vel oo goaill dty laue yesh ass dt’oghrish dy chur mow yn noid?
13Son Jee my Ree er dyn chenn earish:
yn cooney ta jeant er y thalloo, eh hene ta dy yannoo eh.
14Ren oo yn aarkey y scarrey trooid dty phooar:
vrish oo khing ny dragonyn ayns ny ushtaghyn.
15Voaill oo khing y Leviathan ayns peeshyn:
as hug oo eh dy ve son beaghey da’n pobble ayns yn aasagh.
16Hug oo lhiat farraneyn, as ushtaghyn magh ass ny creggyn creoi:
hyrmee oo seose ushtaghyn niartal.
17She lhiats yn laa, as lhiats yn oie:
uss t’er phointeil yn soilshey as y ghrian.
18T’ow er hoiaghey ooilley cagliaghyn ny hooirey:
t’ow er yannoo sourey as geurey.
19Cooinee er shoh, O Hiarn, kys ta’n noid er oltooaney:
as kys ta’n pobble ommijagh er loayrt goan mollaghtagh noi dt’Ennym.
20O ny livrey annym dty chalmane meen gys earroo ny noidyn:
as ny jarrood sheshaght ny boghtyn son dy-bragh.
21Jeeagh er y chonaant:
son ta ooilley yn ooir laane dy ghorraghys as dy chummallyn dewil.
22O ny lhig da’n vooinjer gyn loght goll roue lesh nearey:
agh lhig da ny boghtyn as ny ymmyrchee moylley ’choyrt da dt’Ennym.
23Trogg, O Yee, jean dty chooish hene y chummal seose:
cooinee kys ta’n dooinney ommijagh dy dt’oltooaney dy-chooilley laa.
24Ny jarrood coraa dty noidyn:
ta’n daanys vooaralagh ocsyn ta feoh oc ort, gaase dy-kinjagh ny smoo as ny smoo.
Currently Selected:
Psalmyn 74: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society