YouVersion Logo
Search Icon

Psalmyn 73

73
EVENING PRAYER.
PSAL. 73.
Quam bonus Israel!
1Dy-firrinagh ta Jee graihagh er Israel:
dy-jarroo er nyn lheid as ta jeh cree glen.
2Ny-yeih, va my chassyn faggys er n’gholl voym:
va my chesmadyn er-gerrey dy skyrraghtyn.
3As cre’n-oyr? va mee seaghnit er coontey ny mee-chrauee:
ta mee myrgeddin fakin drogh ’leih ayns lheid y raah.
4Son cha vel ad ayns gaue erbee jeh’n vaase:
agh t’ad trean as lajer.
5Cha vel ad cheet ayns drogh-haghyrt erbee myr sleih elley:
cha-moo t’ad er nyn gerraghey myr deiney elley.
6As shoh yn oyr dy vel ad sheidit seose lesh moyrn:
as coodit harrish lesh dewlys.
7Ta ny sooillyn oc gatt lesh riurid:
as t’ad jannoo dy-jarroo myr sailliu.
8T’ad mhilley sleih elley, as dy-mee-chrauee loayrt goan mollaghtagh:
ta’n ghlare oc noi yn Er-syrjey;
9Son t’ad sheeyney magh nyn meeall noi niau:
as ta’n chengey oc goll trooid y theihll.
10Shen-y-fa ta’n pobble tuittym lhieu:
as cha nee beggan cosney t’ad dy hayrn ass shen.
11Twish, t’ad gra, Kys ver Jee tastey da:
vel fyssyree ayns yn Er-syrjey?
12Jeeagh, ad shoh ny mee-chrauee, ad shoh ta bishaghey ayns y theihll, as oc shoh ta berchys ayns nyn gummal:
as dooyrt mee, Eisht ta mish er ghlenney my chree ayns fardail, as er niee my laueyn ayns ônid.
13Fey-ny-laa ta mee er ve er my cherraghey:
as er my smaghtaghey dy-chooilley voghrey;
14Dy-jarroo, as va mee er loayrt faggys myr ren adsyn:
agh cur-my-ner, veïn eisht er gheyrey sheeloghe dty cloan.
15Eisht ghow mee ayns laue dy hoiggal shoh:
agh ve ro ghoillee er my hon,
16Derrey hie mee stiagh ayns ynnyd-casherick Yee:
eisht hoigg mee jerrey ny deiney shoh;
17Ta shen, Kys t’ow uss dy hoiaghey ad ayns ynnydyn shliawin:
as dy hilgey ad sheese, as dy stroie ad.
18Oh, cre cha leah as t’ad goll naardey:
cherraghtyn, as cheet gys jerrey agglagh!
19Dy-jarroo, eer myr dreamal tra ta fer doostey:
myr shen ver oo er y chaslys oc dy lheïe ersooyl ass yn ard-valley.
20Shoh myr va my chree seaghnit:
as hie eh eer trooid my veeghyn.
21Cha ommijagh shen va mee, as cha mee-hushtagh:
dy-jarroo myr dy beagh eh baagh kiongoyrt rhyts.
22Ny-yeih, ta mee kinjagh liort’s:
son t’ow er my chummal rish my laue yesh.
23Nee oo m'y leeideil lesh dty choyrle:
as ny lurg m'y ghoaill gys gloyr.
24Quoi t’aym ayns niau agh uss:
as cha vel unnane erbee er y thalloo ta mee dy yeearree ayns solaghey jeeds.
25Ta m’eill as my chree failleil:
agh ta Jee niart my chree, as my hoghyr son dy-bragh.
26Son cur-my-ner, nee adsyn ta dy dty hreigeil, cherraghtyn:
t’ow er stroie adsyn ooilley ta kyndagh jeh maarderys dt’oï.
27Agh te mie er my hon’s dy chummal shickyr gys Jee, dy chur my hreishteil ayns y Chiarn Jee:
as loayrt jeh ooilley dt’obbraghyn ayns giattyn inneen Sion.

Currently Selected:

Psalmyn 73: PS1765

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy