YouVersion Logo
Search Icon

Psalmyn 72

72
PSAL. 72.
Deus, judicum.
1Cur da’n Ree dty vriwnyssyn, O Yee:
as dty chairys da mac y Ree.
2Eisht nee eh dty phobble y vriwnys cordail rish cairys:
as nee eh ny boghtyn y endeil.
3Ver ny sleïtyn myrgeddin lhieu shee:
as ny croink veggey cairys da’n pobble.
4Freilee eh yn vooinjer ôney ayns nyn gair:
cloan y voght nee eh y endeil, as ny tranlaasee y cherraghey.
5Gow-ee ad aggle royd choud as ta’n ghrian as yn eayst er-mayrn:
veih un heeloghe gys sheeloghe elley.
6Hig eh neose myr y fliaghey ayns loamrey olley:
dy-jarroo myr ny bineyn ta gushtaghey yn thalloo.
7Ayns y lhing echeysyn nee yn vooinjer chairagh bishaghey:
dy-jarroo, as palchey dy hee, choud as ta’n eayst farraghtyn.
8Bee yn reilltys echey myrgeddin veih un aarkey gys faarkey elley:
as veih’n awin vooar gys ayrnyn sodjey yn ooir.
9Adsyn ta vaghey ’syn aasagh nee ad gliooney sheese kiongoyrt rish:
nee e noidyn yn joan y liee.
10Reeaghyn Tharsis as ny ellanyn, ver ad lhieu toyrtyssyn:
ver reeaghyn Arabia as Saba lhieu giootyn.
11Nee dy-chooilley ree tuittym sheese kiongoyrt rish:
nee dy-chooilley ashoon eh y hirveish.
12Son nee eh yn boght y livrey tra t’eh geam:
yn ymmyrchagh neesht, as eshyn nagh vel fer-coonee erbee echey.
13Bee eh foayroil da’n vooinjer ôney as ny ymmyrchee:
as nee eh anmeenyn ny boghtyn y choadey.
14Nee eh ny anmeenyn oc y livrey veih foalsaght as aggair:
as deyr vees yn uill oc ayns e hilley.
15Bee eh bio, as dasyn vees er ny choyrt jeh airh Arabia:
bee padjer er ny yannoo dy-kinjagh huggey, as gagh-laa vees moylley er ny choyrt da.
16Bee palchey arroo er y thalloo, ard er ny croink:
nee’n mess echey craa myr Libanus, as bee eh glass ’syn ard-valley myr faiyr er y thalloo.
17Nee yn Ennym echey farraghtyn son dy-bragh, bee yn Ennym echey er-mayrn fo’n ghrian mastey ny sheelogheyn ta foast ry heet:
vees er nyn mannaghey ny-hrooidsyn, as nee ooilley ny ashoonyn eh y voylley.
18Bannit dy row yn Chiarn Jee, dy-jarroo yn Jee dy Israel:
ta ny-lomarcan jannoo reddyn yindyssagh;
19As bannit dy row Ennym yn Ard-ooashley echey son dy-bragh:
as bee ooilley yn seihll er ny lhieeney lesh e Ard-ooashley. Amen, Amen.

Currently Selected:

Psalmyn 72: PS1765

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy