Psalmyn 71
71
MORNING PRAYER.
PSAL. 71.
In te, Domine, speravi.
1Ayn-yds, O Hiarn, ta mee er choyrt my hreishteil; ny lhig dou dy-bragh v’er my choyrt gys nearey:
agh feayshil orrym, as livrey mee ayns dty chairys; cromm dty chleaysh hym, as saue mee.
2Bee oo my chummal lajer, huggey oddyms kinjagh goll son sauchys:
t’ow er yialldyn dy chooney lhiam; son oo thie m’endeilys as my chastall.
3Livrey mee, O my Yee, veih pooar ny mee-chrauee:
veih laue yn dooinney neu-chairagh as dewill.
4Son dty lurg’s, O Hiarn Yee, ta mee goaill foddeeaght:
uss my hreishteil, dy-jarroo veih m’aegid.
5Liort ta mee er ny chummal seose neayr as ruggyr mee:
uss ren m'y ghoaill ass breïn my vayrey; bee my voylley dy-bragh jeeds.
6Ta mee er jeet dy ve shilley agglagh da ymmodee:
agh ta my hreishteil shickyr ayn-yds.
7O lhig da my veeall v’er ny lhieeney lesh dty voylley:
dy voddym arrane y ghoaill jeh dty ghloyr as dty onnor slane liurid y laa.
8Ny tilg mee ersooyl ayns my henn eash:
ny treig mee tra ta my niart dy m’ailleil;
9Son ta my noidyn loayrt m’oï, as t’adsyn ta lhie farkiaght son m’annym, coyrt nyn goyrle dy-cheïley, gra:
Ta Jee er hreigeil eh; eiyr-jee er, as gow-jee eh; son cha vel fer erbee dy livrey eh.
10Ny gow foddey voym, O Yee:
my Yee, jean siyr dy chooney lhiam.
11Lhig dauesyn ta noi m’annym ve er nyn goyrt mow as cherraghtyn:
lhig daue ve coodit lesh nearey as mee-ooashley ta shirrey dy yannoo aggair dou.
12Agh er my hon’s, nee’m dy-meen farkiaght dy-kinjagh:
as moyll-ym oo ny smoo as ny smoo.
13Loayr-ee my veeall dagh-laa jeh dty chairys as jeh dty livrey-ys:
son cha nione dou yn earroo oc.
14Hem magh ayns niart y Chiarn Jee:
as loayr-ym ynrycan jeh dty chairys.
15T’ow uss, O Yee, er m’ ynsaghey veih my aegid derrey nish:
shen-y-fa soilshee-yms magh dty obbraghyn yindyssagh.
16Ny treig mee, O Yee, ayns my henn eash, tra ta my chione lheeah:
derrey ta mee er hoilshaghey dty niart da’n cheeloghe shoh, as dty phooar dauesyn ooilley ta foast roï cheet.
17Ta dty chairys, O Yee, feer ard, as smooar ny reddyn shen t’ow er n’yannoo:
O Yee, quoi ta dy ve er ny hoyllaghey hoods!
18O cre’n seaghyn as yn arkys trome t’ow er choyrt my raad! as foast hyndaa oo as ren oo mee y ooraghey:
dy-jarroo, as hug oo lhiat mee reesht veih diunid ny hooirey.
19T’ow er chur lhiat mee gys onnor:
as er my gherjaghey er dy-chooilley cheu;
20Shen-y-fa nee’m uss as dt’irriney y voylley, O Yee, cloie er greïe dy vingys:
hoods goym arrane er y chlaasagh, O uss Er chasherick dy Israel.
21Bee my veillyn gennal tra ta mee goaill arrane hoods:
as myr shen vees m’annym t’ow uss er ny livrey.
22Nee my hengey myrgeddin loayrt jeh dty chairys fey-ny-laa:
son t’ad er nyn ghoyrt mow as er nyn ghoyrt lhieu gys nearey, ta shirrey olk y yannoo dooys.
Currently Selected:
Psalmyn 71: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society