Psalmyn 68
68
MORNING PRAYER.
PSAL. 68.
Exurgat Deus.
1Lhig da Jee girree seose, as lhig da e noidyn v’er nyn skeayley:
lhig dauesyn myrgeddin ta dwoaie oc er, roie er-chea roïshyn.
2’Naght myr ta’n jaagh goll ass nyn shilley, myr shen nee oo gimman ad ersooyl:
as myr ta kere lheïe rish yn aile, myr shen lhig da’n vee-chrauee cherraghtyn ec kionfenish Yee.
3Agh lhig da’n vooinjer chairagh ve gerjoil, as boggey ’ghoaill kiongoyrt rish Jee:
lhig daue myrgeddin ve gennal as laane dy voggey.
4O gow-jee arrane gys Jee, as arraneyn-moyllee gys e Ennym:
cur-jee ard-voylley dasyn ta markiagh er ny niaughyn, myr er cabbyl; cur-jee moylley da ayns e Ennym Jah, as gow-jee boggey kiongoyrt rish.
5Eshyn Ayr yn chloan gyn ayr, ta fendeil cooish ny mraane-treoghe:
dy-jarroo Jee ayns e ynnyd-vaghee casherick.
6Eshyn y Jee ta cur er deiney dy ve jeh un aigney ayns thie, as ta cur lesh ny pryssoonee magh ass cappeeys:
agh lhiggey da ny wagaanee tannaghtyn ayns genney.
7O Yee, tra hie uss magh roish y pobble:
tra hie oo rowe trooid yn aasagh,
8Chrie yn thalloo, as ren ny niaughyn shilley ec kionfenish Yee:
myr va Sinai myrgeddin er ny chraa ec fenish Yee, eh ta Jee Israel.
9Hug uss, O Yee, fliaghey graysoil er dt’eiraght:
as dooiree oo eh tra ve tooillit.
10Nee dty hioltane cummal ayn:
son t’ow uss, O Yee, jeh dty vieys er chiarail son ny boghtyn.
11Ren y Chiarn yn fockle y choyrt:
smooar va sheshaght ny preachooryn.
12Ren reeaghyn lesh nyn sheshaghtyn-caggee roih er-chea, as v’ad er nyn goyrt fo-chosh:
as adsyn jeh’n lught-thie rheynn ad y spooilley.
13Ga dy vel shiu er ve ny lhie mastey ny pooiyt, foast vees shiu myr skainyn calmane:
ta coodit lesh skainyn argid, as ny fedjagyn eck goll-rish airh.
14Tra ren yn Ooilley-niartal reeaghyn y skeayley er y choontey ocsyn:
eisht v’ad cha gial as sniaghtey ayns Salmon.
15Myr ta cronk Vasan, myr shen ta cronk Yee:
dy-jarroo cronk ard, myr cronk Vasan.
16Cre’n-fa ta shiu lieme myr shen, shiuish chroink ard? shoh cronk Yee, ayn s’gooidsave lesh dy chummal:
dy-jarroo, nee yn Chiarn tannaghtyn ayn son dy-bragh.
17Ta fainee Yee feed thousane, dy-jarroo thousaneyn dy ainlyn:
as ta’n Chiarn ny mast’ oc, myr ayns ynnyd casherick Sinai.
18T’ow er n’gholl seose er yn yrjid, t’ow er leeideil cappeeys ayns bondiaght, as er gheddyn giootyn son deiney:
dy-jarroo, son dt’eer noidyn, dy voddagh y Chiarn Jee cummal ny mast’ oc.
19Moylley dy row gys y Chiarn gagh-laa:
dy-jarroo yn Jee ta cooney lhien, as deayrtey e hoyrtyssyn orrin.
20Eshyn y Jee ain, dy-jarroo yn Jee veih ta cheet nyn saualtys:
Jee yn Chiarn, liorishyn ta shin shiaghney baase.
21Nee Jee broo kione e noidyn:
as claigin renaigagh lheid y fer as ta goll kinjagh er e hoshiaght ayns e vee-chraueeaght.
22Ta’n Chiarn er ghra, Ver-yms lhiam my phobble reesht, myr ren mee veih Basan:
my vooinjer hene ver-ym lhiam reesht myr ren mee keayrt dy-row veih diunid ny marrey;
23Dy vod dty chass ve er ny hummey ayns fuill dty noidyn:
as dy vod chengey dty voddee ve jiarg lesh yn uill cheddin.
24Smie te ry akin, O Yee, kys t’ow uss gimmeeaght:
kys t’ow uss, my Yee as Ree, gimmeeaght ayns yn ynnyd casherick.
25T’adsyn ta goaill arraneyn shooyll hoshiaght, adsyn ta jannoo bingys er greïnyn-kiaull cheet nyn-yeï:
ayns y vean ta ny mraane-aegey cloie er ny timbrelyn.
26Cur booise, O Israel, da Jee yn Chiarn ayns y chaglym cooidjagh:
veih grunt y chree.
27Ayns shen ta Benjamin beg nyn er-reill, as prinsyn Yuda nyn fir-choyrlee:
prinsyn Zabulon, as prinsyn Nephthali.
28Ta dty Yee er choyrt magh niart er dty hon’s:
jean y red y hickyraghey, O Yee, t’ow er n’obbraghey aynin.
29Son graih dty hiamble ec Jerusalem:
myr shen ver reeaghyn lhieu giootyn hoods.
30Tra vees sheshaght ny deiney-shleiy, as earrooyn ny deiney niartal er nyn skeayley dy-lhean (mastey feïeys y pobble,) myr shen dy vel ad dy-imlee cur lhieu peeshyn dy argid:
as tra t’eh er skeayley yn pobble ta goaill taitnys ayns caggey;
31Eisht hig ny prinsyn magh ass Egypt:
nee cheer ny Morianee dy-leah ny laueyn eck y heeyney magh gys Jee.
32Gow-jee arrane gys Jee, O shiuish reeriaghtyn yn ooir:
O gow-jee arraneyn-moyllee gys y Chiarn,
33Ta ny hoie ayns ny niaughyn er-skyn ooilley er dyn toshiaght:
cur-my-ner, t’eh cur magh e choraa, dy-jarroo, as shen coraa niartal.
34Gow-jee rish dy nee ec Jee ta’n phooar harrish Israel:
ta e ooashley as e niart ayns ny bodjallyn.
35O Yee, yindyssagh t’ow uss ayns dt’ynnydyn casherick:
dy-jarroo yn Jee dy Israel; ver eshyn niart as pooar da e phobble; bannit dy row Jee.
Currently Selected:
Psalmyn 68: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society