Psalmyn 66
66
PSAL. 66.
Jubilate Deo.
1O bee-jee gerjoil ayns Jee, ooilley shiuish cheeraghyn:
gow-jee arraneyn-moyllee gys onnor e Ennym; cur-jee er e voylley dy ve gloyroil.
2Abbyr-jee rish Jee, O cre cha yindyssagh as t’ow ayns dt’obbraghyn:
trooid mooads dty phooar vees dty noidyn er nyn gheddyn nyn mreageryn ayns dt’enish.
3Son nee ooilley yn seihll ooashley ’chur dhyt:
goaill arrane jeed, as moylley dt’Ennym.
4O tar-jee ayns shoh, as cur-jee tastey da obbraghyn Yee:
cre cha yindyssagh as t’eh ayns e yannoo gys cloan gheiney!
5Hyndaa eh yn faarkey gys thalloo chirrym:
myr shen dy jagh ad trooid yn ushtey rish nyn gosh;
ayns shen ghow shin boggey jeh.
6T’eh reill lesh e phooar son dy-bragh; ta e hooillyn cur tastey da’n pobble:
as ny lheid as nagh jean credjal, cha bee abyl ad hene y hoiaghey seose.
7O cur-jee moylley da’n Jee ain, shiuish phobble:
as cur-jee er coraa e voylley dy ve er ny chlashtyn;
8Ta freayll yn annym ain ayns bioys:
as nagh vel lhiggey da nyn gassyn dy skyrraghtyn,
9Son t’ow uss, O Yee, er phrowal shin:
t’ow myrgeddin er hrial shin, myr ta argid er ny hrial.
10Hug oo lhiat shin ayns y ribbeh:
as hug oo seaghyn er nyn meeaghyn.
11Lhig oo da deiney dy varkiagh harrish nyn ghing:
hie shin trooid aile as ushtey, as hug oo lhiat shin magh gys ynnyd berchagh.
12Hem stiagh gys dty hie lesh chebballyn-losht:
as eeck-ym dhyt my vreearaghyn, yiall mee lesh my veillyn, as loayr mee lesh my veeall, tra va mee ayns seaghyn.
13Chebb-yms dhyt ourallyn-losht roauyrey, marish oural millish reaghyn:
chebb-ym dew as goair.
14O tar-jee ayns shoh, as eaisht-jee, ooilley shiuish ta goaill aggle roish Jee:
as insh-ym diu cre t’eh er n’yannoo son m’annym.
15Deïe mee er lesh my veeall:
as hug mee moylley da lesh my hengey.
16My ta my chree goaill taitnys ayns mee-chairys:
cha jean y Chiarn m'y chlashtyn.
17Agh ta Jee er my chlashtyn:
as er choyrt tastey da coraa my phadjer.
18Moylley dy row gys Jee, nagh vel er hoiaghey beg jeh my phadjer:
ny er hyndaa e vyghin voym.
Currently Selected:
Psalmyn 66: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society