YouVersion Logo
Search Icon

Psalmyn 64

64
PSAL. 64.
Exaudi, Deus.
1Clasht rish my choraa, O Yee, ayns my phadjer:
freill my vioys veih aggle y noid.
2Follee mee veih chaglym cooidjagh ny mee-viallee:
as veih irree-magh ny drogh-yantee;
3T’er shlieeu nyn jengey myr cliwe:
as ta lhiggey nyn sideyn, dy-jarroo goan sharroo;
4Dy vod ad dy-follit lhiggey ersyn ta firrinagh:
t’ad dy woalley eh doaltattym, as cha vel aggle orroo.
5T’ad jannoo ad hene daaney ayns olkys:
as cur nyn goyrle dy-cheïley, kys oddys ad ribbaghyn y hoiaghey; as gra, nagh vaik dooinney erbee ad.
6T’ad smooinaghtyn dy-dowin er olkys, as dy chliaghtey eh:
shen t’ad dy reayll follit eddyr ad hene, dy-chooilley ghooinney ayns diunid e chree.
7Agh nee Jee lhiggey doaltattym orroo lesh side leah:
dy bee ad lhottit.
8Dy-feer, ver nyn jengaghyn hene orroo tuittym:
ayns wheesh as dy jean adsyn ta fakin ad, garaghtee as craid y yannoo jeu.
9As jirr dy-chooilley ghooinney hee eh, She Jee t’er n’yannoo shoh:
son ver ad tastey dy nee eh yn obbyr echeysyn.
10Gow-ee yn dooinney cairagh boggey ayns y Chiarn, as ver eh e hreishteil ayn:
as nee adsyn ooilley ta firrinagh ayns cree, boggey ’ghoaill.

Currently Selected:

Psalmyn 64: PS1765

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy