Psalmyn 60
60
PSAL. 60.
Deus, repulisti nos.
1O Yee, t’ow er hilgey shin magh, as er skeayley shin dy-lhean:
t’ow myrgeddin er ve jymmoosagh rooin; O chyndaa hooinyn reesht.
2T’ow er ghleashaght y cheer, as er scarrey eh:
slaanee ny chingyn echey, son te craa.
3T’ow er yeeaghyn da dty phobble reddyn trimshagh:
t’ow er choyrt dooin jough feeyn baasoil.
4T’ow er choyrt cowrey da nyn lheid as ta goaill aggle royd:
dy vod ad boggyssagh er coontey yn irriney.
5Shen-y-fa va’n vooinjer bynney lhiat er nyn livrey:
cooin lhiam lesh dty laue yesh, as clasht rhym.
6Ta Jee er loayrt ayns e chasherickys, Nee’m boggey ’ghoaill as rheynn-ym Sichem:
as towse-ym magh coan Succoth.
7Ta Gilead lhiam’s, as lhiam’s Manasses:
ta Ephraim myrgeddin niart my chione; she Juda ta coyrt my leigh.
8Moab my haagh-nieeaghyn, harrish Edom ceau-ym magh my vraag:
Philistia, gow uss boggey jee’m.
9Quoi nee m'y leeideil ayns yn ard-valley lajer:
quoi ver lesh mee stiagh gys Edom?
10Nagh vel uss er hilgey magh shin, O Yee:
Nagh jean uss, O Yee, goll magh marish ny sheshaghtyn-caggee ain?
11O bee uss nyn gooney ayns seaghyn:
son s’fardalagh ta cooney dooinney.
12Trooid Jee nee mayd obbraghyn mooarey:
son she eshyn stampys sheese nyn noidyn.
Currently Selected:
Psalmyn 60: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society