Psalmyn 48
48
PSAL. 48.
Magnus Dominus.
1Mooar ta’n Chiarn, as dy-ard dy v’er ny voylley:
ayns ard-valley yn Jee ain, dy-jarroo er e chronk chasherick.
2Ta cronk Sion ynnyd aalin, as boggey yn seihll ooilley:
er y cheu tooai ta ard-valley yn Ree mooar;
te ry akin dy vel Jee ayns ny plaasyn ec myr kemmyrk shickyr.
3Son cur-my-ner, ta reeaghyn y thallooin:
er nyn jaglym, as er n’gholl shiaghey cooidjagh.
4Ghow ad yindys dy akin lheid ny reddyn:
v’ad lhieent lesh atchim, as ayns y tullogh chaill ad nyn gree.
5Haink aggle orroo, as trimshey:
myr er ben er-troailt.
6Nee uss brishey lhongyn ny marrey:
lesh y gheay nharr.
7Myr ta shin er chlashtyn, myr shen ta shin er vakin ayns ard-valley yn Chiarn dy heshaght-chaggee flaunys, ayns ard-valley yn Jee ain:
ta Jee dy chummal eh seose son dy-bragh.
8Ta shin farkiaght er dty chenjallys-ghraihagh, O Yee:
ayns mean dty hiamble.
9O Yee, myr ta dt’Ennym, myr shen ta dty voylley gys king y theihll:
ta dty laue yesh laane dy chairys.
10Lhig da’n cronk Sion goaill boggey, as inneen Yudah ve gennal:
er coontey dty vriwnyssyn.
11Shooill mygeayrt Sion, as immee mygeayrt-y-mooee:
as gow-jee coontey ny tooryn eck.
12Gow tastey vie jeh ny voallaghyn lajer ec, soie-jee seose ny thieyn ec:
dy vod oo ginsh dauesyn hig nyn yeï.
13Son she’n Jee shoh yn Jee ain son dy-bragh as dy-bragh:
eshyn vees y leeideilagh ain gys laa nyn maaish.
Currently Selected:
Psalmyn 48: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society