Psalmyn 44
44
MORNING PRAYER.
PSAL. 44.
Deus, auribus.
1Ta shin er chlashtyn lesh nyn gleayshyn, O Yee, ta nyn ayraghyn er n’insh dooin:
cre ny obbraghyn ren uss ayns y traa ocsyn ’sy chenn earish;
2Kys t’ow er eiyrt magh ny ashoonyn-quaagh lesh dty laue, as er hoiaghey adsyn stiagh ’syn ynnyd oc:
kys t’ow er stroie ny ashoonyn, as er n’eebyrt ad ersooyl.
3Son cha dooar ad y cheer ayns nyn gummal liorish y chliwe oc hene:
cha-moo she’n roih oc hene ren cooney lhieu.
4Agh dty laue yesh, as dty roih, as soilshey dt’eddin:
son dy row aigney mie ayd daue.
5Uss my Ree, O Yee:
cur cooney gys Jacob.
6Dty hrooid’s ver mayd nyn noidyn fo-chosh:
as ayns dt’Ennym nee mayd stampey sheese adsyn ta girree seose nyn ’oï.
7Son cha der-ym my varrant gys my vhow:
cha nee my chliwe chooinys lhiam.
8Agh uss eh ta sauail shin veih nyn noidyn:
as ta cur adsyn bun-ry-skyn ta dwoaie oc orrin.
9Ta shin jannoo nyn moggys ayns Jee fey-ny-laa:
as ver mayd moylley da dt’Ennym son dy-bragh.
10Agh nish t’ow foddey jeh, as coyrt shin gys nearey:
as cha vel oo goll magh marish nyn sheshaghtyn-caggee.
11T’ow coyrt orrin chyndaa nyn gooyl er nyn noidyn:
myr shen dy vel adsyn ta dwoaie oc orrin spooilley nyn gooid.
12T’ow lhiggey dooin v’er nyn ee seose myr kirree:
as er skeayley shin fud ny ashoonyn.
13T’ow creck dty phobble son veg:
as cha vel oo goaill veg yn argid er nyn son.
14T’ow coyrt orrin ve er nyn naaraghey liorish nyn noidyn:
as dy v’er nyn gharey orrin gys craid, as ayns faghid lioroosyn ta mygeayrt-y-mooin.
15T’ow coyrt orrin dy ve an-ghoo mastey ny ashoonyn:
as dy vel y pobble craa nyn ghing orrin.
16Ta my stayd hreih gagh-laa kiongoyrt rhym:
as ta nearey m’eddin er my choodaghey.
17Kyndagh rish goan yn fer-lunagh as y mollaghtagh:
kyndagh rish y noid as yn eulyssagh.
18As ga dy vel ooilley shoh er jeet orrin, ny-yeih cha vel shin dy dty yarrood:
ny gymmyrkey shin hene dy-frourtagh ayns dty chonaant.
19Cha vel nyn gree er choyrt cooyl rhyt:
cha-moo ta ny kesmadyn ain er gholl ass dty raad;
20Cha vel, ga dy vel oo er woalley shin ayns ynnyd ny dragonyn:
as er choodaghey shin lesh scadoo yn vaaish.
21My ta shin er yarrood Ennym y Jee ain, as er chummal seose nyn laueyn gys Jee erbee joarree:
nagh jean Jee eh y ronsaghey magh? son ta fys echey er eer folliaghtyn y chree.
22Er y ghraih ayds neesht ta shin er nyn gerraghey fey-ny-laa:
as coontit myr kirree ta pointit dy v’er nyn stroie.
23Seose, Hiarn, cre’n-fa t’ow cadley:
dooisht, as ny fuirree voïn er son dy-bragh.
24Cre’n-oyr t’ow follaghey dt’eddin:
as jarrood nyn dreihys as seaghyn?
25Son ta’n annym ain er ny chur lesh dy-inshil, dy-jarroo gys y joan:
ta’n bolg ain lhiantyn gys y thalloo.
26Irree as cooin lhien:
as livrey shin er graih dty vyghinyn.
Currently Selected:
Psalmyn 44: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society