Psalmyn 41
41
EVENING PRAYER.
PSAL. 41.
Beatus qui intelligit.
1Bannit t’eshyn ta smooinaghtyn er y voght as yn ymmyrchagh:
nee’n Chiarn eshyn y livrey ayns traa e heaghyn.
2Dy jean y Chiarn eshyn y choadey as y reayll bio, dy vod eh ve bannit er y thalloo:
as ny livrey uss eh gys aigney e noidyn.
3Dy jean y Chiarn eh y gherjaghey tra t’eh ny lhie dy-ching er e lhiabbee:
jean uss ooilley e lhiabbee ayns e hingys.
4Dooyrt mee, Hiarn, bee myghinagh dou:
slaanee m’annym, son ta mee er n’yannoo peccah dt’oï.
5Ta my noidyn loayrt dy-olk jee’m:
Cooinn yiow eh baase, as cooinn nee e ennym cherraghtyn?
6As my t’eh cheet dy my yeeaghyn, t’eh loayrt dy-foalsey:
as ta e chree giennaghtyn molteyrys cheu-sthie jeh; as tra t’eh goll roish t’eh d’insh eh.
7Ta ooilley my noidyn sonsheraght cooidjagh m’oï:
dy-jarroo m’oï t’ad smooinaghtyn er yn olk shoh.
8Lhig da’n vriwnys ta cair da fer-kyndagh goll magh n’oï:
as nish dy vel eh ny lhie, ny lhig da girree seose arragh.
9Dy-jarroo, my charrey ainjyssagh hene, er hug mee my hreisht:
eshyn ren neesht gee jeh m’arran, t’eh dy-mooar farkiaght dy-follit er my hon.
10Agh bee uss myghinagh dou, O Hiarn:
jean uss m'y hroggal seose reesht, as nee’m ad y chooilleeney.
11Liorish shoh ta fys aym dy vel oo foayroil dou:
nagh vel my noid geddyn barriaght m’oï.
12As tra ta mee ec my lhaynt, t’ow dy my chummal seose:
as nee oo m'y hoiaghey kiongoyrt rish dt’eddin er son dy-bragh.
13Bannit dy row yn Chiarn Jee d’Israel:
seihll gyn jerrey. Amen.
Currently Selected:
Psalmyn 41: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society