YouVersion Logo
Search Icon

Psalmyn 35

35
MORNING PRAYER.
PSAL. 35.
Judica me, Domine.
1Gow my chooish ayns laue, O Hiarn, roosyn ta streeu rhym:
as jean uss caggey noi ocsyn ta caggey m’oï.
2Cur dty laue gys y scape as yn eïlley-caggee:
as shass seose dy chooney lhiam.
3Tayrn magh y shleiy, as cur chyndaa dauesyn ta jannoo tranlaase orrym:
abbyr rish m’annym, Mish dty haualtys.
4Bee ad er nyn gastey, as er nyn goyrt gys nearey, ta shelg lurg m’annym:
ver ad cooyl, as bee ad er nyn goyrt mow, ta kiarail olk m’oï.
5Bee ad myr y joan roish y gheay:
as Ainle y Chiarn dyn skeaylley ad.
6Bee’n raad oc dorraghey as sliawin:
as nee Ainle y Chiarn ad y imman.
7Son ren ad dy-follit soiaghey nyn ribbeh dy my stroie gyn oyr:
dy-jarroo fegooish oyr ren ad ooig son m’annym.
8Hig toyrt-mow doaltattym ersyn gyn-yss, as nee’n ribbeh t’eh er hoiaghey dy-follit eh hene y hayrtyn:
dy vod eh tuittym ayns yn olkys echey hene.
9As m’annym, bee gerjoilagh ayns y Chiarn:
nee eh boggey ’ghoaill ayns e haualtys.
10Nee ooilley my chraueyn gra, Hiarn, quoi ta casley rhyts, ta livrey yn boght veihsyn ta ro hrean da:
dy-jarroo yn boght, as eshyn ta ayns treihys, veihsyn ta dy spooilley eh?
11Dirree feanishyn foalsey seose:
hug ad reddyn gys my lieh nagh row mee kyndagh jeu.
12Deeck ad dooys olk son mie:
gys mee-gherjagh mooar m’annym.
13Ny-yeih, tra v’adsyn ching, hug mee orrym aanrit-sack, as ren mee m’annym y injillaghey lesh trostey:
as chyndaa-ee my phadjer ayns m’oghrish hene.
14Ren mee gymmyrkey mee hene myr gys my charrey, ny my vraar:
hie mee dy-trimshagh, myr fer ta dobberan son e voir.
15Agh ayns my arkys ghow ad boggey, as chaggyl ad cooidjagh:
dy-jarroo, haink ny eer ghonnanyn cooidjagh m’oï nagh bione dou, jannoo craid jee’m, as cha scuirr ad.
16Marish ny brynnyree va grindeyryn connyssagh:
ren snaggeraght orrym lesh nyn veeacklyn.
17Hiarn, caid yeeaghys oo er shoh:
O livrey m’annym veih ny seaghyn t’ad cur lhieu orrym, as m’annym veih ny lionyn.
18Myr shen ver-yms booise dhyt ayns y chaglym mooar dy ’leih:
nee’m dty voylley mastey mooarane pobble.
19O ny lhig dauesyn ta my noidyn boggyssagh harrym dy-aggairagh:
cha-moo lhig daue meekey lesh nyn sooillyn ta dwoaie oc orrym gyn oyr.
20As cre’n-oyr? cha vel y ghlare oc son shee:
agh t’ad soit er goan scammyltagh noi ocsyn ta sheeoil ayns y cheer.
21Doshil ad nyn meeall orrym, as dooyrt ad:
Gow nearey, gow nearey, honnick shin eh lesh nyn sooillyn.
22Shoh t’ow er vakin, O Hiarn:
ny bee dty-host eisht, ny gow foddey voym, O Hiarn.
23Dooisht, as shass seose dy vriwnys my phlaynt:
jean cairys ayns my chooish, my Yee, as my Hiarn.
24Jean mish y vriwnys, O Hiarn my Yee, cordail rish dty chairys:
as ny lhig daue boggyssagh harrym.
25Ny lhig daue gra ayns nyn greeaghyn, Shen, shen, shoh myr baïllin eh:
cha-moo lhig daue gra, Ta shin er choyrt mow eh.
26Bee ad er nyn ghoyrt bun-ry-skyn as gys nearey cooidjagh ta goaill boggey jeh my heaghyn:
bee ad er nyn goodaghey lesh oghsan as mee-ooashley ta boggyssagh m’oï.
27Lhig dauesyn ve gennal as goaill boggey ta er cheu my ghellal yeeragh:
dy-jarroo lhig daue dy-kinjagh gra, Bannit dy row yn Chiarn, ta goaill taitnys ayns maynrys e harvaant.
28As er son my hengey’s, bee eh loayrt jeh dty chairys:
as jeh dty voylley fey-ny-laa.

Currently Selected:

Psalmyn 35: PS1765

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy