Psalmyn 18
18
EVENING PRAYER.
PSAL. 18.
Diligam te, Domine.
1Ver-yms graih dhyt, O Hiarn, my niart; she’n Chiarn my chregg lajer, as m’endeilys:
my Haualtagh, my Yee, as my hroshid, huggey ver-ym barrant; my eïlley-caggee, ynnyd-lajer myrgeddin my hauchys, as my chemmyrk.
2Nee’ms geamagh er y Chiarn, ta feeu dy ve er ny voylley:
myr shen bee’m sauchey veih my noidyn.
3Haink angaishyn y vaaish mygeayrt-y-moom:
as ren ny thooillaghyn dy vee-chraueeaght m'y agglaghey.
4Haink pianyn niurin mygeayrt-y-moom:
ren ribbaghyn y vaaish berraghtyn orrym.
5Ayns my heaghyn nee’m geamagh er y Chiarn:
as jannoo accan gys my Yee.
6Myr shen clynnee eh my choraa veih e hiamble chasherick:
as hig my phlaynt kiongoyrt rish, hed eh stiagh dy-jarroo gys e chleayshyn.
7Va’n thalloo er ny ghleashagh, as ren eh craa:
va eer undinyn ny sleïtyn neesht er-creau, as v’ad er ny scughey, ec e yymmoose.
8Hie jaagh veih e enish:
as aile va cur mow ass e veeal, myr shen dy row smarageyn er nyn voadey lesh.
9Chromm eh ny niaughyn neesht, as haink eh neose:
as ve dorraghey fo e chassyn.
10Varkee eh er ny Cherubimyn, as ren eh getlagh:
haink eh getlagh er skainyn ny geayee.
11Ren eh dorraghys e ynnyd follit:
e chabbane-reeoil mygeayrt-y-mysh lesh ushtey dorraghey, as bodjallyn chiu dy choodaghey eh.
12Ec sollyssid e enish ren e vodjallyn scughey:
claghyn-sniaghtee, as smarageyn d’aile.
13Hug y Chiarn neesht taarnagh veih niau, as ren y Fer-syrjey coyrt e haarnagh:
claghyn-sniaghtee, as smarageyn d’aile.
14Lhig eh magh e hideyn, as skeayll eh ad:
hug eh magh e hendeilyn, as ren eh ad [y] stroie.
15Va ny farraneyn ushtey er nyn vakin, as haink undinyn y theihll rish, lesh dty oghsan, O Hiarn:
ec sheidey ennal dty yymmoose.
16Ver eh fyss veih’n yrjid dy my hauail:
as nee eh m'y ghoaill ass ymmodee ushtaghyn.
17Nee eh m'y livrey veih my noidyn stroshey, as vowesyn ta dwoaie oc orrym:
son t’ad ro lajer er my hon.
18Haink ad orrym gyn-yss ayns my heaghyn:
agh y Chiarn ren m'y chummal seose.
19Hug eh lesh mee magh neesht gys boayl dy reamys:
hug eh lesh mee magh, dy-jarroo son dy row foayr echey dou.
20Nee’n Chiarn m'y chooilleeney lurg my ghellal cairagh:
cordail rish glennid my laueyn nee eh lhiasaghey dou;
21Er son dy vel mee er vreayll raaidyn y Chiarn:
as nagh vel mee er hreigeil my Yee, myr ta ny mee-chrauee dy yannoo.
22Son ta sooill aym gys ooilley e leighyn:
as cha dilg-ym e annaghyn voym.
23Va mish kinjagh gyn loght kiongoyrt rishyn:
as hug mee cooyl rish m’olkys hene.
24Shen-y-fa nee’n Chiarn m'y chooilleeney lurg my ghellal cairagh:
as cordail rish glennid my laueyn ayns shilley e hooillyn.
25Da’n dooinney casherick nee oo soilshaghey oo hene dy ve (dty Yee) casherick:
as da’n dooinney ynrick vees oo ynrick.
26Dasyn ta glen nee oo soilshaghey oo hene glen:
as noi’n roonagh soilshee oo dty roon.
27Nee oo sauail y sleih ta ayns seaghyn:
as ver oo sheese shillaghyn ard ny mooaralee.
28Nee oo myrgeddin my chainle y oaddey:
ver y Chiarn my Yee er my ghorraghys dy ve soilshey.
29Son liorts ver-ym fo-chosh sheshaght-caggee dy gheiney:
as lesh cooney my Yee lheim-ym harrish y voall.
30Ta raad Yee raad rea:
ta goo yn Chiarn neesht er ny phrowal ’syn aile; eh yn fendeilagh ocsyn ooilley ta coyrt nyn dreishteil aynsyn.
31Son quoi ta Jee, agh y Chiarn!
ny quoi echey ta niart erbee, agh ec y Jee ain?
32She Jee ta dy my eïllaghey lesh niart caggee:
as ta jannoo my raad jeeragh.
33T’eh jannoo my chassyn myr cassyn feeaïh:
as soiaghey mee seose dy-ard.
34T’eh gynsaghey my laueyn dy chaggey:
nee my roihaghyn brishey eer bow steïllyn.
35T’ow er choyrt dooys fendeilys dy haualtys:
nee dty laue yesh neesht m'y chummal seose, as nee dty smaght graihagh mish y yannoo mooar.
36Nee oo raad liane dy-liooar foym dy immeeaght:
nagh skyrr my chesmadyn.
37Eiyr-ym er my noidyn as berr-ym orroo:
cha-moo nee’m chyndaa reesht derrey vee’m er stroie ad.
38Bwoail-ym ad, derrey nagh vod ad shassoo:
agh tuittym fo my chassyn.
39T’ow er my chomm'rey lesh niart son y chaggey:
nee uss my noidyn y lhieggal sheese foym.
40T’ow er choyrt er my noidyn neesht dy chur cooyl rhym:
as nee’ms adsyn y stroie ta dwoaie oc orrym.
41Nee ad geamagh, agh cha bee unnane dy chooney lhieu:
dy-jarroo gys y Chiarn, nee ad geamagh, agh cha der eh clashtyn daue.
42Bwoail-yms ad cha meen as y joan roish y gheay:
as tilg-ym ad magh myr y laagh ayns ny straaidyn.
43Nee uss m'y livrey veih anvea yn pobble:
as ver oo orrym dy ve kione ny ashoonyn.
44Pobble nagh nione dooys:
nee m'y hirveish.
45Cha leah as chlynnys ad jee’m, ver ad biallys dou:
agh nee’n chloan yoarree foalsaght rhym.
46Nee’n chloan yoarree failleil:
as bee ad agglagh ayns ny ynnydyn follit oc.
47Ta’n Chiarn bio, as bannit dy row m’er-coonee niartal:
as moylley dy row gys Jee my haualtys;
48Yn Jee hene ta fakin dy goym cooilleeney:
as ta coyrt yn pobble fo my smaght.
49Eshyn eh ta dy my livrey veih my noidyn dewil, as ta dy my hoiaghey seose er nyn skyn ocsyn ta shassoo m’oï:
nee oo m'y livrey veih’n dooinney olkyssagh.
50Son yn oyr shoh ver-yms booise dhyt, O Hiarn, mastey ny Ashoonyn:
as goym arraneyn-moyllee gys dt’Ennym.
51Barriaght vooar t’eh coyrt da e Ree:
as soilshaghey kenjallys-ghraihagh da David e Er-ooïllit, as gys e lhuight er son dy-bragh.
Currently Selected:
Psalmyn 18: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society