Psalmyn 118
118
PSAL. 118.
Confitemini Domino.
1O cur-jee booise da’n Chiarn, son t’eh graysoil:
son ta e vyghin farraghtyn son dy-bragh.
2Lhig da Israel nish goaill-rish dy vel eh graysoil:
as dy vel e vyghin farraghtyn son dy-bragh.
3Lhig da thie Aaron nish goaill-rish:
dy vel e vyghin farraghtyn son dy-bragh.
4Dy-jarroo, lhig dauesyn ta nish aggle orroo roish y Chiarn, goaill-rish:
dy vel e vyghin farraghtyn son dy-bragh.
5Deïe mee er y Chiarn ayns my heaghyn:
as hug y Chiarn slane clashtyn dou.
6Ta’n Chiarn er my lheh’s:
cha bee aggle orrym jeh ny oddys dooinney y yannoo rhym.
7Ta’n Chiarn goaill my phaart mâroosyn ta cooney lhiam:
shen-y-fa hee-ym my yeearree er my noidyn.
8Te ny share dy hreishteil ayns y Chiarn:
na dy chur barrant erbee gys dooinney.
9Te ny share dy hreishteil ayns y Chiarn:
na dy chur treishteil erbee ayns prinsyn.
10Ren dy-chooilley ashoon cheet mygeayrt-y-moo'm:
agh ayns Ennym y Chiarn nee’m ad y stroie.
11Ren ad m'y hionney er dy-chooilley cheu, haink ad chione orrym, ta mee gra, er dy-chooilley cheu:
agh ayns Ennym y Chiarn stroie-ym ad.
12Haink ad mygeayrt-y-moo'm myr shellanyn, as t’ad er ny vooghey myr aile mastey drineyn:
son ayns Ennym y Chiarn nee’m ad y stroie.
13T’ow er lhie dy-trome orrym dy my lhieggal:
agh va’n Chiarn my chooney.
14Ta’n Chiarn my niart as my arrane:
as t’eh er jeet dy ve my haualtys.
15Ta coraa boggey as slaynt ayns cummallyn y vooinjer chairagh:
ta laue yesh y Chiarn coyrt lesh reddyn yindyssagh gys kione.
16Ta laue yesh y Chiarn er-skyn ooilley:
ta laue yesh y Chiarn cur lesh reddyn yindyssagh mygeayrt.
17Cha voym baase, agh bee’m er my reayll bio:
dy hoilshaghey magh obbraghyn y Chiarn.
18Ta’n Chiarn er my smaghtaghey as er my cherraghey:
agh cha vel eh er my livrey harrish gys baase.
19Foshil-jee dooys giattyn y chairys:
dy voddym goll stiagh orroo, as booise y choyrt da’n Chiarn.
20Shoh giatt y Chiarn:
hed y vooinjer chrauee stiagh ayn.
21Ver-yms booise dhyt, son t’ow er my chlashtyn:
as er jeet dy ve my haualtys.
22Yn chlagh cheddin ren ny masoonee y vee-lowal:
ta er jeet dy ve yn ard chlagh chorneilagh.
23Shoh jannoo yn Chiarn:
as te yindyssagh ayns ny sooillyn ain.
24Shoh’n laa ta’n Chiarn er n’oardaghey:
gow-ee mayd boggey as bee mayd gennal ayn.
25Cooin lhiam nish, O Hiarn:
O Hiarn, cur dooin nish maynrys.
26Bannit t’eshyn ta cheet ayns Ennym y Chiarn:
ta shin er vannaghey diuish ta jeh thie’n Chiarn.
27Jee yn Chiarn t’er chur dooin soilshey:
kaingle-jee yn oural lesh coyrdyn, gys eer eayrkyn yn altar.
28She uss my Yee, as ver-ym booise dhyt:
uss my Yee, as ver-ym moylley dhyt.
29O cur-jee booise da’n Chiarn, son t’eh graysoil:
as ta e vyghin farraghtyn son dy-bragh.
Currently Selected:
Psalmyn 118: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society