Psalmyn 109
109
PSAL. 109.
Deus laudum.
1Ny bee uss dty host, O Yee jeh my voylley:
son ta beeall ny mee-chrauee, dy-jarroo, ta beeall yn vooinjer volteyragh er ny osley m’oï.
2As t’ad er loayrt m’oï lesh chengaghyn foalsey:
t’ad er jeet mygeayrt-y-moo'm lesh focklyn dwoaiagh, as er chaggey m’oï gyn oyr.
3Son y ghraih v’aym orroosyn, cur-my-ner, t’ad nish shassoo m’oï:
agh ta mish dy chur mee hene seose gys padjer.
4Myr shoh t’ad er chooilleeney dou olk son mie:
as goanlys er son my aigney-mie.
5Nee dooinney mee-chrauee reill y ymmyrkey harrish:
as shassee Noid-ny-hanmey ec e laue yesh.
6Tra vees briwnys er ny choyrt er, bee eh er ny gheyrey:
as bee’n phadjer echey er ny hyndaa gys peccah.
7Bee e laghyn giare:
as gow-ee fer elley yn oik echey.
8Bee’n chloan echey gyn ayr:
as y ven echey treoghe.
9Bee’n chloan echey nyn gercheenyn, as shooyll ny dhieyn son jeirk:
shirree ad eh ayns buill fadane.
10Nee’n dooinney tranlaasagh ooilley ny t’echey y chur mow:
as nee’n joarree e laboraght y spooilley.
11Cha gow dooinney erbee chymmey jeh:
ny erreeish y hoilshaghey da e chloan gyn ayr.
12Bee’n sluight echey er ny chur naardey:
as ayns yn nah heeloghe, bee’n ennym echey dy-bollagh er ny yarrood.
13Bee olkys ny ayraghyn echey er ny reayll ayns cooinaghtyn ayns shilley’n Chiarn:
as cha bee peccah e voir er ny chieltyn.
14Bee ad dy-kinjagh kiongoyrt rish y Chiarn:
dy vod eh yn imraa jeu y astyrt dy-bollagh jeh’n ooir.
15As shoh, son nagh row e aigney dy yannoo mie:
agh ren eh tranlaase er y voght gyn cooney, dy voddagh eh eshyn y stroie va seaghnit ayns cree.
16Va e haitnys ayns gweeaghyn, as hig eh er:
cha bynney lesh bannaght, shen-y-fa bee eh foddey voish.
17Choamree eh eh hene lesh gweeaghyn myr lesh garmad:
as hed eh stiagh ayns e vynnagh myr ushtey, as myr ooïll ayns e chraueyn.
18Bee eh da myr y cloagey t’eh dy cheau:
as myr y cryss ta dy-kinjagh mysh.
19Shoh myr nee eh taghyrt da my noidyn veih’n Chiarn:
as dauesyn myrgeddin ta loayrt dy-holk noi m’annym.
20Agh dell uss rhym’s, O Hiarn my Yee, cordail rish dty Ennym:
son s’millish ta dty vyghin.
21O livrey mee, son ta mee ymmyrchagh as gyn cooney:
as ta my chree gooint cheu-sthie jee’m.
22Ta mee goll ass shoh myr y scadoo ta scughey ersooyl:
ta mee eiyrit noon as noall myr y locust.
23Ta my ghlioonyn annoon lesh trostey:
ta my eill shymlit son laccal soo.
24Haink mee myrgeddin dy ve oltooan daue:
adsyn va jeeaghyn orrym chrie ad nyn ghing.
25Cooin lhiam, O Hiarn my Yee:
O jean uss mish y hauail cordail rish dty vyghin.
26As bee fys oc dy nee shoh dty laue:
as dy nee uss, Hiarn, t’er n’yannoo eh.
27Ga dy vel adsyn gweeaghyn, ny-yeih jean uss bannaghey:
as lhig daue ve er nyn goyrt gys nearey ta girree seose m’oï; agh lhig da dty harvaant boggey ’ghoaill.
28Lhig da my noidyn ve er nyn goamrey lesh nearey:
as lhig daue ve coodit lesh nyn scammylt hene myr lesh cloagey.
29Er my hon’s, ver-ym mooarane booise da’n Chiarn lesh my veeall:
as nee’m eshyn y voylley mastey earroo yn pobble.
30Son shassee eh ec laue yesh y voght:
dy hauail e annym veih briwnyn neu-chairagh.
Currently Selected:
Psalmyn 109: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society