Psalmyn 107
107
MORNING PRAYER.
PSAL. 107.
Confitemini Domino.
1O cur-jee booise da’n Chiarn, son t’eh graysoil:
as ta e vyghin farraghtyn son dy-bragh.
2Lhig dauesyn booise y choyrt ta’n Chiarn er nyn veaysley:
as er nyn livrey veih laue yn noid;
3As er nyn jaglym ass ny cheeraghyn, veih’n niar, as veih’n neear:
veih’n tooaie, as veih’n jiass.
4Hie ad er-shaghryn ayns yn aasagh ass y raad:
as cha dooar ad ard-valley erbee dy chummal ayn;
5Accryssagh as pa-agh:
hug yn annym oc naardey ayndoo.
6Eisht deïe ad er y Chiarn ayns nyn seaghyn:
as livrey eh ad ass nyn jennid.
7Leeid eh ad magh er y raad cair:
dy voddagh ad goll gys ard-valley dy ooraghey ad hene.
8O dy jinnagh deiney er-y-fa shen yn Chiarn y voylley son e vieys:
as fockley magh ny yindyssyn t’eh dy yannoo son cloan gheiney!
9Son t’eh jannoo magh yn annym follym:
as lhieeney yn annym accryssagh lesh mieys;
10Lheid as ta ny hoie ayns dorraghys, as ayns scadoo yn vaaish:
kainlt dy-shickyr ayns geulaghyn yiarn.
11Er-yn-oyr dy row ad mee-viallagh gys goan y Chiarn:
as ren ad beg y hoiaghey jeh coyrle yn Er syrjey;
12Ren eh neesht ny creeaghyn oc y injillaghey trooid seaghyn:
huitt ad sheese, as cha row unnane erbee dy chooney lhieu.
13Myr shen tra deïe ad gys y Chiarn ayns nyn seaghyn:
livrey eh ad ass nyn jennid.
14Hug eh lesh ad magh ass dorraghys, as scadoo yn vaaish:
as vrish eh ny kianglaghyn oc veih my-chielley.
15O dy jinnagh deiney er-y-fa shen yn Chiarn y voylley son e vieys:
as fockley magh ny yindyssyn t’eh dy yannoo son cloan gheiney!
16Son t’eh er vrishey ny giattyn-prash:
as er yiarey ny barryn yiarn veih my-chielley.
17Ta deiney ommijagh er nyn gherraghey son nyn ghrogh-yannoo:
as kyndagh rish nyn olkys.
18Va dwoaie ec yn annym oc er dy-chooilley cheint dy veaghey:
as v’ad dy-jarroo faggys ec dorrys y vaaish.
19Myr shen tra deïe ad gys y Chiarn ayns nyn seaghyn:
livrey eh ad ass nyn jennid.
20Chur eh magh e ockle, as ren eh ad y lheihys:
as v’ad er ny sauail veih nyn doyrt-mow.
21O dy jinnagh deiney er-y-fa shen yn Chiarn y voylley son e vieys:
as fockley magh ny yindyssyn t’eh dy yannoo son cloan gheiney!
22Dy jebbagh ad da oural dy hoyrt-booise:
as ny obbraghyn echey y ockley magh lesh gennallys.
23Adsyn ta goll er yn aarkey ayns lhongyn:
as ta dellal ayns ny hushtaghyn mooarey,
24Ad shoh ta fakin obbraghyn y Chiarn:
as e yindyssyn ayns y diunid.
25Son ec e ockle ta’n gheay stermagh girree:
ta troggal seose ny tonnyn echey.
26T’ad er nyn ymmyrkey seose ’syn aer, as sheese reesht gys y diunid:
ta’n annym oc lheïe ersooyl er coontey nyn seaghyn.
27T’ad criht noon as noall, as leaystey myr dooinney meshtal:
as t’ad ec kione nyn geïlley.
28Myr shen tra t’ad geamagh gys y Chiarn ayns nyn seaghyn:
t’eh dy livrey ad ass nyn jennid.
29T’eh cur er y sterrym dy ve kuine:
myr shen dy vel ny tonnyn goaill fea.
30Eisht t’ad gennal, er-yn-oyr dy vel ad ec fea:
as myr shen t’eh dy chur lesh ad gys y phurt baïlliu ’ve ayn.
31O dy jinnagh deiney er-y-fa shen yn Chiarn y voylley son e vieys:
as fockley magh ny yindyssyn t’eh dy yannoo son cloan gheiney!
32Dy jinnagh ad eshyn neesht y ghloyraghey ayns sheshaght y pobble:
as eh y voylley ayns stoyl y chanstyr!
33Ta chyndaa ny thooillaghyn gys faasagh:
as chyrmaghey seose ny farraneyn-ushtey.
34Cheer messoil t’eh dy yannoo faase:
er coontey’n drogh-yannoo ocsyn ta vaghey ayn.
35Reesht t’eh jannoo yn aasagh ny loghan ushtey:
as geillyn jeh thalloo chirrym.
36As ayns shen t’eh soiaghey ny accryssee:
dy vod ad ard-valley y hroggal daue hene dy chummal ayn;
37Dy vod ad nyn dhalloo y chuirr, as garaghyn-feeyney y hoiaghey:
dy ymmyrkey magh daue ny messyn dy vishaghey.
38T’eh dy nyn mannaghey ad, dy vel ad bishaghey er-skyn towse:
as cha vel eh surranse da’n maase oc dy ve ny sloo ayns earroo.
39Reesht, tra t’ad er nyn leodaghey as er nyn injillaghey:
liorish tranlaase, trooid arkys ny seaghyn erbee;
40Ga dy vel eh surranse ad dy gheddyn drogh ghellal veih reilltee tranlaasagh:
as lhiggey daue goll er-shaghryn jeh’n raad ayns yn aasagh;
41Ny-yeih t’eh cooney lesh y voght ass e heaghyn:
as bishaghey’n lught-thie echey myr shioltane keyrragh.
42Smooinee yn vooinjer chairagh er shoh, as gow-ee ad boggey:
as bee beeall dy-chooilley olkys er ny yeigh.
43Quoi-erbee ta creeney nee ad goaill ny reddyn shoh gys nyn gree:
as toigg-ee ad kenjallys-ghraihagh y Chiarn.
Currently Selected:
Psalmyn 107: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society