Psalmyn 105
105
MORNING PRAYER.
PSAL. 105.
Confitemini Domino.
1O cur-jee booise da’n Chiarn, as eïe-jee er yn Ennym echey:
insh-jee da’n pobble cre ny reddyn t’eh er n’yannoo.
2O lhig da ny arraneyn eu ’ve jehsyn, as moylley-jee eh:
as lhig da’n taggloo eu ’ve mychione ooilley e obbraghyn yindyssagh.
3Gow-jee boggey ayns yn Ennym casherick echey:
lhig da’n cree ocsyn ’ve gennal ta shirrey lurg y Chiarn.
4Shirr-jee yn Chiarn as e niart:
shirr-jee e eddin er son dy-bragh.
5Cooinee-jee er ny obbraghyn yindyssagh t’eh er n’yannoo:
e virrillyn, as briwnyssyn e veeall;
6O shiuish sluight Abraham e harvaant:
shiuish chloan Yacob t’eh er reih.
7Eshyn y Chiarn y Jee ain:
ta e vriwnyssyn ayns ooilley’n seihll.
8T’eh er ny ve kinjagh cooinaghtagh jeh e chonaant as e yialdinyn:
ren eh da thousane dy heelogheyn;
9Yn eer conaant ren eh rish Abraham:
as y breearrey loo eh da Isaac;
10As shen doardee eh da Jacob son leigh:
as da Israel son conaant dy-bragh farraghtyn;
11Gra, Dhyts ver-ym thalloo Canaan:
cronney nyn eiraght.
12Tra nagh row ad foast agh beggan jeu:
as adsyn nyn yoarreeyn ayns y cheer;
13Tra v’ad scughey veih ashoon gys ashoon:
veih un reeriaght gys pobble elley;
14Cha lhig eh da dooinney erbee aggair ’yannoo daue:
agh hug eh oghsan da eer reeaghyn er y ghraih oc.
15Ny benn-jee rish my Er-ooïllit:
as ny jean-jee veg y skielley da my adeyryn.
16Marish shen, doardee eh genney er y cheer:
as stroie eh yn slane beaghey dy arran.
17Agh hug eshyn dooinney rhymboo:
dy-jarroo Joseph, va er ny chreck son sharvaant ayns bondiaght;
18E chassyn ren ad y lhottey lesh geulaghyn:
hie gooin y yiarn stiagh gys e chree;
19Derrey haink y traa dy row e chooish er ny hoilshaghey:
ren goo yn Chiarn eshyn y phrowal.
20Hug y ree chaghter dy eaysley eh:
hug prince y phobble e reamys da.
21Ren eh eh ny hiarn myrgeddin harrish e hie:
as kiannoort harrish ooilley e ream;
22Dy oardrail e phrinsyn lurg e aigney:
as creenaght y ynsaghey da e ir-choyrlee.
23Haink Israel myrgeddin gys Egypt:
as va Jacob ny yoarree ayns cheer Ham.
24As vishee eh yn pobble echey dy-yindyssagh:
as ren eh ad ny s’troshey na nyn noidyn;
25Ny creeaghyn ocsyn va myr shen er ny hyndaa, dy row dwoaie oc er e phobble:
as hug ad drogh ghellal da e harvaantyn.
26Eisht hug eshyn Moses e harvaant:
as Aaron, v’eh er ny reih;
27As hoilshee ad shoh e chowraghyn ny mast’ oc:
as yindyssyn ayns cheer Ham.
28Doardee eh dorraghys, as ve dorraghey:
agh cha row ad arrymagh da e ghoo.
29Hyndaa eh ny hushtaghyn oc gys fuill:
as stroie eh yn eeast oc.
30Ren y cheer oc gymmyrkey magh froggyn:
ayns eer shamyryn nyn reeaghyn.
31Loayr eh yn fockle, as haink dy-chooilley cheint dy veishteigyn:
as meeylyn ayns ooilley ny ardjyn oc.
32Hug eh daue claghyn-sniaghtee ayns ynnyd fliaghey:
as lossaghyn aile ayns y cheer oc.
33Woaill eh neesht ny biljyn-feeyney as ny biljyn-figgagh oc:
as hug eh naardey ny biljyn v’ayns ny ardjyn oc.
34Loayr eh yn fockle, as haink ny locustyn, as praddagyn er-skyn-earroo:
as die ad seose ooilley yn faiyr v’ayns y cheer oc, as stroie ad messyn y thallooin.
35Varr eh ooilley yn chied er ny ruggey ayns nyn jeer:
dy-jarroo toshiaght ooilley nyn niart.
36Hug eh lesh ad magh myrgeddin lesh argid as airh:
cha row un phersoon annoon mastey ny kynneeyn oc.
37Va Egypt laane dy voggey tra jimmee ad rhymboo:
son v’ad ayns aggle roue.
38Skeayll eh magh bodjal dy choodaghey ad:
as aile dy chur soilshey daue ’syn oie.
39Ec nyn yeearree hug eh lesh quaylyn:
as lhieen eh ad lesh arran veih niau.
40Doshil eh yn chreg chloaie, as haink yn ushtey magh myr thooilley:
myr shen dy roih awinyn ayns ynnydyn chyrmey.
41Son cre’n-oyr? chooinee eh er e yialdyn casherick:
as er Abraham e harvaant.
42As hug eh lesh magh e phobble lesh boggey:
as e chloan reiht lesh gennallys;
43As hug eh daue thalloo ny ashoonyn:
as ghow ad laboraght y phobble son eiraght;
44Dy voddagh ad freayll e ’lattyssyn:
as geill y choyrt da e leighyn.
Currently Selected:
Psalmyn 105: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society