YouVersion Logo
Search Icon

Ko fɔlɔfɔlɛ 1

1
Dunuya fɔlɛ
1A fɔlɔfɔlɛ la, Ala ka saŋɛ nun duge da.
2Duge bele ɲiɲaren nun, a be a tɛsɛŋɛ le la nun. Dibe le be ji banba mabutinden nun. Kɔnɔ Ala be a la fɔɲɔ balunɛŋɛ latagamanna je kunma nun. 3Wo tɛmuɛ le, Ala ka a fɔ, a ko: «Kɛnɛ ni bɔɔ!» Kɛnɛ bɔɔta kisanna. 4Ala ka a yen wo kɛnɛ kaɲin. Ala ka kɛnɛ nun dibe lafatan. 5Ala ka kɛnɛ tɔgɔ sa «tele», a ka dibe tɔgɔ sa «sue». Sue donta, ɲɔ kɛnɛta, lɔgɔ fɔlɛ le wo la.
6Ala ka a fɔ, a ko: «Naaniŋɛ ni to jenu tɛma anu fatan koe la.» 7Ala ka wo naaniŋɛ da, a ka a to duge tɔ je, anun saŋɛ tɔ je tɛma. A mata ɲɔgɔnna le. 8Ala ka kɛ naaniŋɛ tɔgɔ sa «saŋɛ». Sue donta, ɲɔ kɛnɛta, lɔgɔ filaɲɔgɛ le mu wo la.
9Ala ka a fɔ, a ko: «Duge tɔ je ni madɛn kan dɔndɔ, kan bala ni sɔtɔ.» A mata ɲɔgɔnna le. 10Ala ka wo kan bala tɔgɔ sa «dugu bala». A ka wo duge tɔ je tɔgɔ sa «ba». Ala ka a yen wo bɛ kaɲin. 11Wo kɔma Ala ka a fɔ, a ko: «Kifeŋɛnu ni fɛtɛn duge kunma. Kifeŋɛnu ni fɛtɛn a kole be a butɔ a bɛ nun a bɔnsɔ. Lɔgɔ wolonɛŋɛ minnu wole kole be a tɔ, anu ni fɛtɛn a bɛ nun a bɔnsɔ.» A mata ɲɔgɔnna le. 12Kifeŋɛnu fɛtɛnta duge kunma, kifeŋɛnu fɛtɛnta anu kole be a tɔ, a bɛ nun a bɔnsɔ. Lɔgɔ wolonɛŋɛ minnu wole kole be a tɔ, anu fɛtɛnta a bɛ nun a bɔnsɔ. Ala ka a yen a kaɲin. 13Sue donta, ɲɔ kɛnɛta, lɔgɔ sabaɲɔgɛ le mu wo la.
14Ala mɛn ka a fɔ, a ko: «Malanfeŋɛnu ni to saŋɛ tɔ, tele nun sue fatan koe la. Wagate bɛ ni lɔn malanfeŋɛnu sabu la. Telenu anun saŋɛnu ni lɔn malanfeŋɛnu sabu la. 15Malanfeŋɛnu ni to saŋɛ tɔ duge lakɛnɛ koe la.» A mata ɲɔgɔnna le. 16Ala ka malanfen belebele fila da: min kolo, wo ni tele tɔ yamɔre ma, min dɔgɔ, wo ni sue yamɔre ma. A ka loolenu tugun da. 17Ala ka malanfeŋɛnu to saŋɛ tɔ, alako anu ni duge lakɛnɛ. 18Anu ni tele nun sue yamɔre ma, anu ni dibe nun kɛnɛ lafatan. Ala ka a yen a kaɲin. 19Sue donta, ɲɔ kɛnɛta, lɔgɔ naaniɲɔgɛ le mu wo la.
20Ala mɛn ka a fɔ, a ko: «Fondo nilamanu ni madɛn je tɔ, anu ni siya koola. Kondeŋɛnu ni yilɛ kantɔ, saŋɛ nun duge tɛma.» 21Ala ka ji tɔ fen banbanu da, anun nilamanu minnu bɛ be je kɔtɔ, anu ni siya a bɛ nun a bɔnsɔ. A ka kondeŋɛnu tugun da, a bɛ nun a bɔnsɔ. Ala ka a yen a kaɲin. 22Ala ka barikɛ sa anu la ko tɔ, a ko: «Wo ni deŋɛnu sɔtɔ, wo ni siya ba je dula bɛ tɔ. Kondeŋɛnu tugun ni siya duge kunma.» 23Sue donta, ɲɔ kɛnɛta, lɔgɔ looluɲɔgɛ le mu wo la.
24Ala mɛn ka a fɔ, a ko: «Nilamanu ni to duge tɔ, a bɛ nun a bɔnsɔ: kolofeŋɛnu, bubufeŋɛnu, burun butɔ subenu, a bɛ ni to a nun a bɔnsɔ.» A mata ɲɔgɔnna le. 25Ala ka burun butɔ subenu da, a bɛ nun a bɔnsɔ. A ka kolofeŋɛnu da, a bɛ nun a bɔnsɔ. A ka bubufeŋɛnu tugun da, a bɛ nun a bɔnsɔ. Ala ka a yen a kaɲin.
26A tɔɛ la, Ala ka a fɔ, a ko: «Mɔ ni Adama da mɔ yɛtɛ misale la, min mulunta mɔ la. A ni fisamanteya sɔtɔ yɛgɛnu kunma ba tɔ, kondeŋɛnu kunma kantɔ, anun kolofeŋɛnu kunma duge bɛ tɔ, anun bubufeŋɛnu bɛ minnu be buubula duge kunma.»
27Ala ka Adama da a misale la:
a ka a da a yɛtɛ misale le la,
a ka anu da le kayi nun musu.
28Ala ka barikɛ sa anu la ko tɔ, a ko anu ma: «Wo ni jiidi, wo ni siya, alako duge ni lafa. Wo ni sɛnbɛ sɔtɔ duge kunma, wo ni fisamanteya sɔtɔ duge kunma, yɛgɛnu kunma ba tɔ, kondeŋɛnu kunma kantɔ, anun bubufeŋɛ min bɛ be duge kunma.» 29Ala mɛn ko: «N bata kifeŋɛ anun a kole bɛ dii wo ma, min bɛ be duge kunma, anun lɔgɔ wolonɛŋɛnu minnu wole kole be a tɔ, anu ni ma wo ye dɔmɛ la. 30N bata ɲagama kutaŋɛ bɛ dii subenu ma minnu be duge kunma, anun kondeŋɛ bɛ minnu be kantɔ, anun bubufeŋɛ bɛ ma. Ɲagama bata ma nilama bɛ la dɔmɛ la.» A mata ɲɔgɔnna le. 31Wo butɔ, Ala ka a yen, a ka min bɛ da, a ka a fɛlɛ a bɛ kaɲin han a tanbita a tɔ. Sue donta, ɲɔ kɛnɛta, lɔgɔ wɔrɔɲɔgɛ le mu wo la.

Currently Selected:

Ko fɔlɔfɔlɛ 1: MOG

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy