MATIYU 9
9
1Di saha ka Yisa daa laa n‑kpɛ nyariŋŋu maa ni n‑labi n‑kuli u toori tiŋŋa.
2Di saha ka ninvugseeba daa mari ba baarisɔ ŋɔn daa gbarigi n‑dɔ bundoaa ni, n‑taasi Yisa saani na. Yisa ŋɔn daa nya ka ba niŋi yɛdda pam maa, u daa yɛli baara maa, ni, “M biiya, kur mari sufukpeemni! n kyɛ i taalli m‑pɛŋŋi i.” 3Ka karimbaseeba daa boosiri ba sufu ni teesa, ni, “U zaŋŋi u maŋŋa n‑zaantiri Naawunni zaaziiya!” 4Ka Yisa daa baŋŋi ban teesiri seem, ka daa yɛli ba, ni, “Wula ka ya teesiri teesibeeri? 5Yɛla ayi wa sunsukkuni, kani m bu tɔa - i yi yɛli sɔa, ni, u nya u taalli kyɛ-m‑pɛŋŋi, bee i yi yɛli sɔa, ni, u doaama n‑kyaŋŋi?” 6Ni, “Amaa m boori la ni ya baŋŋi, ni, ba pun ti man Ninsaala Biiya soori ni n kyɛri niriba taalli m‑pɛŋŋni ba, duniya wa puuni.” Di saha maa ka u ŋmaligi n‑yɛli baara maa, “N yɛtti i ni, ni, i doaama ka kpikki i bundoaa wa n‑kuli!” 7Ka doo maa siri daa doaai ka vaai n‑kuli. 8Ka niriba maa ŋɔn daa nya lala, dabeem daa gbaai ba, ka ba daa pɛ'ai Naawunni ŋɔn zaŋŋi yiiko lala taabu n‑ti ninsaalidima.
9U daa yi bɛni n‑gatta, ka naayi nya karikyisɔ, ka u yuuri boonni Matiyu, ka u daa zi ba lampoo tuma ziiya n‑tumna. Ka Yisa yɛli u, “Doaama n‑dɔli ma!” Ka u daa doaai n‑dɔli u. 10Ka ba daa kyaŋŋi nti kpɛ yiri maa ni, ka Yisa nyaandɔliba daa paasi ba zugu. Di saha ka lampodeaariba ni ala'akyi dima pam gba daa dɔli ba n‑kpɛa. Ba daa la'am nti di bundirigu. 11Ka baseeba ban daa dɔli Farisidima soori la daa nya lala, ka ba daa boosi u nyaandɔliba maa, ni, “Wula ka ya karimba ni ninvugbanŋɔ taabu la'amni n‑dira?” 12Ka ŋɔn daa wum ban tɔ'asiri seem maa ka yɛli, “Ninvugseeba ban mari alaafɛ bu boori tiimaraana, na'ala ban beeri m boori u. 13Ya kyɛma nti baŋŋi dinŋɔ gbinni, ni, ‘Sufubaalim ka n boora, pa bunkɔbri sara maaligu.’ Pa tunsuma dima ka n kyɛ na ni m booli, amaa tumbeeri dima ka m boonna.”
14Tɔ. Di saha maa ka Gyɔni Kɔsuura nyaandɔliseeba daa kyɛ Yisa saani na, m‑boosi u, ni, “Bɔ n niŋi ka tirima ni Farisidima maa loori noori ka nyin nyaandɔliba mun bu loora?” 15Ka Yisa labsi n‑yɛli ba, ni, “Dɔsɔ yi ti di pɔ'apaalli ka ba mari la deema di zugu; ammi, pɔ'apaalli maa sira yi ti bɛ u saamma sunsukkuni, ba sufu nin sa'am di saha maa, bee? Ay! Amaa sahanseaa kyɛnni na ka ba nin ti yiisi amriya doo maa ba saani - di dabsa maa puuni ba nin ti lɔa.”
16Ni, “Sɔ na zi n‑zaŋŋi kyinkyimpaalli tanni n‑ligi bunyeerikurigu. Dama tampaalli maa nin yiisi kan ligi seela maa ka kyeaai bunyeerigu la, ka ka maali n‑sa'am m‑paasi. 17Bee, ya teesim daam yɛla: ba mun ku laa n‑sakki n‑zaŋŋi dapaalli n‑lɛ daga'akura ni. Ba yi niŋi lala, ga'akura maa nin ŋma, ka daam maa yuuli m‑basi, ka ga'a maa gba sa'am. Ay! Ga'apaala ka ba zaŋŋni n leeri dapaalli n‑niŋni a ni, lala ka abayi maa zaa nin kpalim suŋŋa.”
18Yisa ŋɔn daa kur yɛtti ba dinŋɔ maa, kpeensɔ daa kyɛ u saani na n‑gbaani u tooni ka yɛli u, “M bipumbila kpiya ni.” ni, “Amaa kyɛm na n‑zaŋŋi i nuusi m‑pa u zugu, ka u nin ti nya u nyɔvuri.” 19Ka Yisa daa yisigi n‑dɔli u, ŋɔn ni u nyaandɔliba maa. 20Ka pɔ'asɔ daa kyɛnni n‑dɔli Yisa nyaaŋŋa, pɔ'asɔ ŋɔn daa soori halli yuuma pii ni ayi ka ziim bu goaara. Ka pɔ'a wa daa tabli na n‑kpaŋŋi u maŋŋa n‑siisi Yisa bunyeerigu, 21dama u daa yɛtti u sufu ni, ni, “N yi kur siisi u bunyeerigu maa n nin nya alaafɛa.” 22Ka Yisa daa ŋmaligi n‑nya u ka yɛli, “M biiya, kur mari sufukpeemni! I niŋi la yɛdda ka dizugu i nya tippu.” Ka di saha maa zaŋŋi n‑kyɛnna ka pɔ'a maa daa nya alaafɛa. 23Ka Yisa daa kyaŋŋi nti paai kpeema maa yiri na. Ŋɔn daa ti paai, u daa gɔsi n‑nya, ka ba daa ŋmeeri kuyiri bunŋmeera ka di kur nyɛ la basaa ni. Ka dizugu u daa yɛli, 24“Ya sɔkam zaa yima! Bipuŋŋa wa bu kpi, amaa u gbisiri ni.” U daa tɔ'asi lala ka di ku ba la laari. 25Amaa ŋɔn daa kari daadam n‑yiisi kpaŋŋa maa, u daa kpɛ bipumbila maa ŋɔn daa dɔ seelli maa ka daa gbaai u nuu, ka bii maa di doaai. 26Di saha ka di lahabaari maa daa mooli n‑gyili tingbaŋŋu maa zaa.
27Ka Yisa ŋɔn daa kyɛ bɛni maa, ka daa kyɛnni soori zugu, zoomma ayi daa dɔli u nyaaŋŋa. Ba daa kur tasiri n‑yɛtti, “Nyin NaaDauda bii wa, zɔm ti namboo!” 28Ka Yisa ŋɔn daa kpɛ yiri ni la, zoomma wa daa kyɛ u saani na; ka Yisa daa boosi ba, ni, “Ya niŋi yɛdda, ni, n nin toaai n‑tibi ya?” Ka ba daa labsi n‑yɛli u, ni, “Ii!” 29Di saha ka Yisa daa siisi ba nini maa ka yɛli, “Kyɛ ka di niŋi hoo yan niŋi yɛdda seem maa!” 30Ka ba nini maa daa neaai di saha maa. Ka Yisa daa kpaam ba, ni, ba di kyɛ ka sɔsɔ baŋŋi. 31Amaa ba daa yi na ka daa moonni u yɛla n‑gyinni tingbaŋŋu maa zaa.
32Ka dɔppa wa ŋɔn daa bakki n‑kyaŋŋi maa, ninvugseeba daa mari dɔsɔ ŋɔn nyɛ mukka n‑kpɛ Yisa saani na. Arizimbeoo daa bɛ doo maa ni, ka dizugu u daa kɔŋŋi yɛttɔ'a. 33Ka Yisa ŋɔn daa kari arizinni maa n‑yiisi mukka maa ni maa, doo maa daa piili n‑tɔ'asira. Ka di daa niŋi sɔkam alahazibu. Zama maa daa yɛtti, ni, “Ti na zi n‑nya nŋɔ taabu Izraɛli tingbaŋŋu wa ni!” 34Amaa Farisidima maa daa yɛli, “Arizimbeeri Naaba ti u soori ni u katti arizimbeeri maa.”
35Ka Yisa daa gyiligi tinsi maa zaa, ni tinkpansi maa gba, n‑wulisiri ba la'aŋŋu duri puuni, ka moonni lahabasuŋŋu zaŋŋi n‑kyaŋŋi Naawunni naam yɛla, ka tibri ban daa beera ka dooru balimbalim m mari ba, bee, ban kɔŋŋni yaa ni alaafɛ zaa. 36Ka ŋɔn daa ti nya daadam maa, u sufu daa zɔ ba namboo, dama ba daa ŋmani la peesi ban ka ŋɔn guri ba, ka di mugsi ba ka sa'am ba sufu. 37Dizugu u daa yɛli n‑ti u nyaandɔliba maa, ni, “Ya kyi ŋmaabu tuma wa zoaaya pam, amaa ka ya tuntumniba maa mun bu zoaai; 38dizugu ya susim ti Dugma ŋɔn nyɛ puu daana wa, ka u tum niriba na m‑paasi ka ba ŋmaara.”
Currently Selected:
MATIYU 9: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.