MATIYU 8
8
1Tɔ; ka Yisa ŋɔn daa yi zoori zugu n‑sigri na, niriba pam daa dɔli u. 2Di saha ka kɔnsɔ daa bɛ ni, ka u kyɛ Yisa saani na n‑sɔmni u tooni n‑yɛli u, “N daana, i yi da sakki, i naa kyɛ ka n kɔmni wa naai ka n kpɛ n‑taabi ni.” 3Ka Yisa daa teaai u nuu n‑siisi u, ka yɛli, “N sakkiya, di naama!” ka di saha maa ka u kɔmni maa daa basi u ka u daa niŋi kasi. 4Ka Yisa daa yɛli u, ni, “Di yɛli sɔ zaa. Kur dɔli Musa ŋɔn daa zaali piiniseesi zaŋŋi n‑kyaŋŋi tippu ni maa n‑kyaŋŋi n‑wulisi i maŋŋa n‑ti maalimaanna la, ka di nin kyɛ ka ba baŋŋi, ni, i siri nya tippu.”
5Sahanseaa Yisa ŋɔn daa kyɛnni la Kapirinyum tiŋŋa, ka soogyadima toondaansɔ daa tuusi u soori ni n‑susiri u 6n‑yɛtti, ni, “N daabri n beera; u dɔ la yiri ni n‑kɔŋŋi doaari, ka di mugsi u pam.” 7Ka Yisa daa yɛli u, “Tɔ! N nin kyɛ i yiri maa ni na n‑tibi u.” 8Ka doo maa daa labsi n‑yɛli u, ni, “Ay, n Daana! Man poora ni i kyɛ n yiri ni na; nyin kur yɛlima yɛliseesi nyin ya yɛli la, ka n baara maa kpaŋŋi.” 9Ni, dama ŋɔn gba nyɛ la ban su ninvugsɔ, ka u mun gba su soogyaseeba fukumsi ka nin toaai n‑yɛli ba yinni, ni, u kyɛm luginseaa ka u kyaŋŋi, bee n‑yɛli sɔ, ni, u kyɛm na ka u kyɛ na, ka nin toaai n‑yɛli u daabri, ni, u tumma nŋɔ ka u tum di. 10Tɔ; ka Yisa ŋɔn daa wum toondaana maa ŋɔn daa yɛli seem maa ka di daa gyɛri u pam, ka u yɛli ban daa dɔli u maa, ni, “Yɛlimaŋni ka n ya yɛli ya, halli Izraɛli dima ni gba n na zi n‑nya sɔsɔ ŋɔn niŋi yɛdda hoo doo wa ŋɔn niŋi seem!” 11Ni, “N yɛtti ya wa, niriba nin ti yi wuntampusiri n‑kyɛ na, ni wuntanluri gba, nti la'am ni Ibrahim, ni Yisahaaku, ni Yaakubu m‑paasi, n‑zinni ba ziziisi ni, Arizana naam kyuu diibu maa saha. 12Halli ka seeba ban nyɛ naam zuliya dima maa, ba nin yiisi ba m‑basi, ni ba ti paai wa'aligu ya'aseelli ban ŋɔn bɛ zibsim ni n‑kumna ka ŋɔbri ba nyina.” 13Di saha ka Yisa daa yɛli toondaana maa, ni, “Kulim yiri ni; nyin niŋi yɛdda seem maa, lala ka i nin nya!” Ka u daabri maa daa nya tippu lala saha maa deede.
14Tɔ: Yisa daa kyaŋŋi nti kpɛ Saimoon yiri, ka daa nya Saimoon deemma ka waari daa mari u, ka u dɔya n‑gyigra. 15Ka u daa zaŋŋi u nuu n‑siisi pɔ'a maa n‑suŋŋi u ka u doaai n‑zaani. Ka u dooru daa basi u, ka u daa yi na n‑tum n‑ti ba. 16Di daari zaanɔyuŋŋu, ba daa mari niriba pam ka arizimbeeri bɛ ba zugri ni, n‑kyɛ u saani na; ka u daa yɛli u yɛligu kɔkɔa, ka di katti arizimbeeri maa m‑basira, ka tibri baaridima zaasa. 17U daa niŋi dinŋɔ ni u kyɛ ka anabi Aizaaya yɛligu maa ti niŋi yɛlimaŋni, ni#:-
“U mammaŋŋa daa deaai ti yaa kɔŋŋsim,
Ka daa zaŋŋi ti dooribeeri maa
N‑ziili u maŋŋa.”
18Tɔ: ka sahanseaa Yisa ŋɔn daa nya daadam ban zoaai n‑gyiligi u maa, u daa yɛli u nyaandɔliba maa, ni, ba lɔŋŋma mɔ'ari maa ya'ari sa. 19Ka zaaligu karimbasɔ daa kyɛ u saani na nti yɛli u, “N daana, n nin dɔli i n‑kyɛnni luginseelli kam zaa.” 20Ka Yisa yɛli u, “Yɔbaasi la mari la vɔya n‑kpeera, ka niinsi mun mari teeri n‑tɔmna, amaa man Ninsaala Biiya ka luginseaa man nin zaŋŋi n zugu n‑dooli gba.” 21U nyaandɔlisɔ mun daa yɛliya, ni, “Kur kyɛ ka n kuli ka m ba yi ti kpi ka n sɔ'ai u pɔi ka naayi kyɛ na n dɔli i.” 22Amaa ka Yisa daa yɛli u, “Kyɛ ka kpiimma sɔ'ari ba kpiintaaba, nyin muna - dɔli ma!”
23Tɔ; ka di saha maa ka u daa kpɛ nyariŋŋu puuni, ka u nyaandɔliba daa dɔli u n‑kpɛa. 24Ka pɛsititoo daa doaai mɔ'ari ni n yi zeeri ni, halli ka koom ti kpeeri nyariŋŋu maa puuni. Yisa mun daa gbisiri ni. 25Di saha ka ba daa kyɛ Yisa saani na n‑neaai u goom ni n‑yɛli u, ni, “Tuligma ti, ti Dugma! - ka ti zaa kpiiri ni pɛsigu wa zugu!” 26Amaa ŋɔn mun daa yɛli ba, ni, “Ya yɛdda kɔŋŋniba wa! Wula ka ya mari dabeem lala?” Ka u daa doaai n‑tasi pɛsigu maa, ni mɔ'ari la, ka di lu n‑fɔ surimm! 27Ka di daa gyɛri ba pam, ka ba yi tɔ'asiri n‑tiri taaba ka boosiri, ni, “Bɔ nira nŋɔa? - halli ka u mari yiiko n‑toaai n‑tasiri pɛsigu ni mɔ'ari gba ka a wumna!”
28Tɔ: Ka ba daa du mɔ'ari maa duuri m‑paai Gadara dima tingbaŋŋu maa ni. M‑paai bɛni ka dɔppa ayi daa yi gbala zii maa na nti tuusi u, ka arizimbeeri daa daamni ba halli nti yakki, ka dizugu niriba daa bu laa n‑toaai n‑dɔli lala soori maa. 29Di saha ka ba daa tasi n‑yɛtta, “I ya niŋi ti la wula, nyin Naawunni Ŋɔn Ka Kpeaa biiya? I kyɛ kpa na ni i ti namsi ti, halli ka di saha maa na bu paai, bee?” 30Tɔ, ka di saha maa kurikyuudima pam gba daa bɛ la wa'aligu n‑dira, 31ka arizimbeeri daa susi Yisa n‑yɛli, “I yi ya kari ti m‑basi, nyin kyɛ ka ti kyaŋŋi nti la'amni ni kurikyuudima wa n‑kpɛ ba ni.” 32Ka Yisa daa yɛli ba, “Tɔ, ya kyɛma!”, ka arizimbeeri maa daa yi dɔppa maa ni n‑kyaŋŋi nti kpɛ kurikyuudima maa, ka ba zaa daa vaai n‑guui halli nti lu mɔ'ari ni n‑kpi. 33Tɔ; ka ninvugseeba ban daa guri kurikyuudima maa daa zɔ n‑kyaŋŋi m‑paai timpuuni nti tisi lahabaari zaŋŋi n‑kyaŋŋi ban nya seem, ka laa n‑yɛli arizimbeeri ŋɔn daa mari ninvugseeba maa yɛla. 34Ka timpuuni niriba zaa daa yi na nti tuusi Yisa soori ni. Ka ban daa paai na n‑nya u maa, ba daa yɛli u, ni, u kyɛma n‑gaari ka kyɛ ba.
Currently Selected:
MATIYU 8: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.