MATIYU 27
27
1Ka beoo ŋɔn daa ti kaai, gyeeŋŋu toondaandima ni tinkpamma maa zaa daa la'asi n‑gbaai gbaari zaŋŋi n‑kyaŋŋi ban nin ku Yisa seem. 2Ka ba daa ba Yisa bansi n‑zaŋŋi u n‑kyaŋŋi n‑niŋi Gɔmna Pailiti nuu ni.
3Gyuudasi muna, sɔ ŋɔn daa yi Yisa nyaaŋŋa la, ŋɔn daa ti wum, ni, Yisa galinsi maa sum la ni kuubu, u sufu daa sa'amiya; ka u daa ya lugi anzulifa pisita la ni u ti ti Gyeeŋŋu Toondaandima ni kpambaya la. 4Nti yɛli ba, ni, “Man galimiya! Dɔsɔ ŋɔn bu tum taalli ka n zaŋŋi n‑figsi n‑ti ya, ka ba ti yɛ n‑ku u.” Ka ba daa labsi n‑yɛli u, “Ka ti ba'a bɔ m bɛ ni? Ay - nyin yɛttɔ'a maa n kur nyɛ di.” 5Di saha ka Gyuudasi daa zaŋŋi anzulifa ligri maa n‑lɔbi m‑basi Gyeeŋŋu Yiri puuni, ka daa bakki. Ka di nyaaŋŋa u daa kyaŋŋi nti yuli u maŋŋa n‑kpi. 6Ka gyeeŋŋu toondaandima maa daa zaŋŋi ligri maa ka yɛli, “Ligri zaŋŋi n‑kyaŋŋi sɔ kum yɛla nŋɔa: ti mun kaya nin ta'ai, ni, di bu sumsi ni ziim ligri wa taabu ti paasi ti Gyeeŋŋu Yiri wa ligri ni.” 7Ka ba zaa daa la'asi n‑gbaai gbaari, ni, ba zaŋŋma ligri maa n‑da paaluseaa dugmeeriba la ŋɔn daa su la, ni ba ti mari n‑sɔ'ari tinzundima bɛni. 8Lala zugu daa kyɛ ka ba boonni bɛni, ni, ‘Ziim Paalu’, halli ni zuna. 9Di saha di siri daa niŋi hoo Anabi Gyɛrimaaya ŋɔn daa tɔ'asi anabitiri yɛliseelli la, ni#:-
“Ba nin zaŋŋi anzulifa pisita la,
Izraɛli dima maa ŋɔn daa sakki ni ba yɔ seesi la,
Ni, ba baŋŋi, ni, u ligri ŋɔn nyɛ seem nla.”
10Ni#:-
“Ba zaŋŋi a n‑da dugmeeriba paalu.
Ti Dugma ŋɔn daa yɛli ma seem la nla.”
11Tɔ: ka Yisa daa zaani Gɔmna maa tooni, ka u daa boosi u, ni, “Nyini n nyɛ Izraɛli dima Naaba la?”, ka Yisa daa yɛli u, “Nyin ŋɔn yɛli seem maa n nyɛ di.” 12Ka gyeeŋŋu toondaandima ni kpambaya maa ŋɔn daa galimni u la, u daa bu yɛli seelli. 13Di saha ka Pailiti daa yɛli u, ni, “I bu wumni ban galimni i seem wa?” 14Ka Yisa daa bu gyɛrigi, halli yɛlli yinni gba, ka di daa gyɛri Gɔmna maa pam.
15Tɔ, ka Kyuu saha kaari soori n daa nyɛ di, ni, niriba daa yi wulisi dansarika niriba ninvugsɔ ban boora, ka Gɔmna maa ti yiisi di daama n‑kyɛ u ka u kyaŋŋi. 16Tɔ: lala saha maa ka dɔsɔ n daa bɛ sarika maa ni, ka u yuuri boonni Barabasi, ka sɔkam zaa daa mi u yɛla. 17Ka daadam ŋɔn daa ti la'am na, Pailiti daa boosi ba, ni, “Ya boori ni n zaŋŋi Barabasi m‑basi ya, bee, Yisa ban boonni sɔ Masiiya, Naaba, la?” 18- dama u daa mi halli, ni, nyuuri zugu ka ba daa zaŋŋi Yisa n‑ti u la.
19Tɔ: ka Pailiti daa na kur zi la sariya karibu zɔŋŋu maa ni, ka u pɔ'a daa tum u saani na nti ti u lahabaari, ni, “Di niŋi yɛlimaŋni daana wa seelli! Dama n zaasa puuni, yuŋŋu la, ka n sa namsiya pam u yɛttɔ'a zugu.”
20Di saha ka Gyeeŋŋu Toondaandima ni kpamma maa daa kur tɔ'asiri n‑tiri zama maa n‑kpaasiri ba zugri, ka naayi kyɛ ka ba sakki ni ba ti susi Gɔmna maa, ni, u yiisima Barabasi n‑ti ba na, ka kyɛ ka Yisa baasi yɔri. 21Dizugu Gɔmna maa ŋɔn daa boosi ba, ni, “Niriba ayi wa puuni, ya yiisima yan boori sɔa!”, ba daa labsi n‑yɛli u, ni, “Barabasi ka ti boora!” 22Ka Pailiti daa laa n‑yɛli ba, ni, “Ka Yisa, ban boonni sɔ Masiiya Naaba la, muna? - Ya boori ni n niŋi u la wula?” Ka ba zaa yɛli, “Kyɛ ka ba kpaasi u n‑tabli dɔpulli zugu!” 23Ŋɔn mun daa boosi ba, ni, “Ka taalli bɔ ka u daa tum?” Ka ba daa maali n‑tasi pam n‑yɛtti, ni, “Ba kpaasim u!” 24Ka Pailiti ŋɔn daa ti nya, ni, u yɛttɔ'a sɛseelli ku toaai m‑maali yɛlli maa, halli u tuma maa zaa yɔri ka niriba maa maali n‑vuuri nti yakki, u daa zaŋŋi koom m‑peaai u nuusi daadam maa tooni. Ni, “Man nuu ka doo wa kuubu ni! Ya tuma nla.” 25Di saha ka zama maa zaa daa la'am n‑yɛli, “Tɔ! Kyɛ ka u ziim taalli kpalim n‑nyɛ tirima dinni, ni ti biisi la dinni gba!” 26Di saha ka u daa yiisi Barabasi m‑basi n‑ti ba, ka daa feebi Yisa muna, ka zaŋŋi u n‑tisi ni ba kpaasi u n‑tabli dɔpulli zugu.
27Gɔmna soogyadima maa daa zaŋŋi Yisa n‑kpɛ Baarikyi maa ni, ka booli ba taaba ni ba la'am na. 28Ba daa yeaai u neema maa ka daa zaŋŋi naam kparizeoo n‑yeeli u. 29Ka daa zaŋŋi goosi m‑paam m‑pili u zugu hoo naam zupiliga, ka zaŋŋi kika'ari n‑gbibli u nudirigu hoo naam damni; ka daa gbaantiri u tooni m‑maanni u ansarisi, ni, “Ndana, m Ba Izraɛli Naaba!” 30Ba daa laa n‑tusi nantoori n‑niŋi u, ka zaŋŋi u kika'ari la n‑kpaasiri u zugu ni. 31Ban daa deem u lala n‑naai ba daa yeaai ba kparigu maa ka labsi u maŋtoori neema n‑yeeli u. Ka daa mari u n‑yi ni ba kyaŋŋi nti kpaasi u.
32Ka ban daa ti kyɛnni maa, ba daa nya Sairiini tingbaŋŋu dɔsɔ, ka u yuuri boonni Saimoon. Ŋɔna ka ba daa gbaai n‑kyɛ ka u zaŋŋi Yisa dɔpulli daari maa n‑ziiri n‑dɔli Yisa nyaaŋŋa. 33Tɔ; ka ban daa ti paai luginseaa kan yuuri boonni ‘Gɔligɔtta’, ka di gbinni nyɛ la “Zuguŋmaaŋŋu Zii la”, 34ba daa zaŋŋi daam bun gyɛri ni titoori, ni, u nyuuma! Amaa ŋɔn daa lam bu, u daa bu sakki n‑nyu bu. 35Ka ba daa kpaasi u n‑tabli dɔpulli zugu, ka zaŋŋi ka n‑sa. Di saha ka ba daa puri u sutura n‑tɔri taaba, n‑toori tɛtɛ ni ba ti nya a puribu soori. 36Di nyaaŋŋa ba daa zinni bɛni ka gɔsiri u ni. 37Ka ba daa sɔbi bunni n‑galimni u, ka zaŋŋi ka n‑tabli dɔpulli maa saazugu, ni, “Yisa, Yɛhudiyadima Naaba la, nŋɔa.” 38Di saha maa ka ba daa kpaasi na'ayigsi ayi gba: ka daa sa ba yinni u nudirigu ya'ari, ni ŋɔnla u nuzaa ya'ari. 39Niriba ban daa gatti daa lɔbri ba zugu ka tuuri Yisa, 40ni, “Ɔhɔ! Nyini n daa yɛnni, ni, i nin daai Gyeeŋŋu Yiri la n‑lusi, ka laa n‑zaŋŋi daba ata m‑mɛ ka la yaasa! Tɔ, ka pampaŋŋɔ, i yi siri nyɛ la Naawunni biiya, nyin sigma dɔpulli maa zugu na n‑fa i maŋŋa m‑basi!” 41Lala ka gyeeŋŋu kpamma, ni karimbadima ni tinkpamma maa gba, daa laari Yisa ka yɛtti taaba, 42ni, “U daa faari la niriba m‑basira, amaa ka bu toaai n‑fa u maŋŋa m‑basi! Ni, Izraɛli Naaba n nyɛ u, fa! - tɔ, kyɛ ka u yi dɔpulli maa zugu n‑sigi na ka ti niŋi u yɛdda!” 43Ka ba daa laa n‑yɛtti, ni, “U niŋi la Naawunni yɛdda, ka yɛli, ni, u nyɛ la Naawunni biiya: tɔ, ka dinŋɔna ŋɔn Naawunni yi siri boori u, ŋɔn faam u m‑basi ka ti nya!” 44Ka na'ayigsi ayi seeba ban daa kpaasi n‑sa Yisa ya'a ayi maa gba daa tuuri u.
45Ka agbaa saha zaŋŋi n‑kyɛnna, tingbaŋŋu maa zaa daa sɔbgi zimm, ka zibsim daa ligi ya'ari kam zaa n‑yuui m‑paai zaanoori hoo kurigu ata saha. 46Di saha maa Yisa daa kaasiya pam, ni, “iIlayi, Ilayi, lima sabakyitani?” - di gbinni n nyɛ ‘N Naawunni, n Naawunni, wula ka i kyɛ ma m‑basi?’ 47Niriba ban daa zɛ bɛni maa seeba daa ti wum u yɛttɔ'a maa ka yɛli, ni, “Ya wumma! U boonni la Ilaygya!” 48Di saha ka ba ninvugyinni daa kyaŋŋi nti bɔ sɔ'asu n‑zaŋŋi n‑niŋi damiisiri ni, ka mari na n‑zaŋŋi n‑kusi kika'ari zugu n‑duusi m‑paai Yisa ni u ti nyu. 49Ka banla daa yɛli, ni, “Kyɛla! Kyɛ ka ti nya Ilaygya nin kyɛ na n‑fa u m‑basi, bee?” 50Ka Yisa daa laa n‑tasi pampam ka naayi ti ka ni. 51Ka pateesa kan daa ya'ai Gyeeŋŋu Yiri Dutitaari puuni maa daa toaai buyi, ka saazugu zaŋŋi n‑sigri tiŋŋa ni; ka tingbaŋŋu maa daa damni ka tampiisi bɔkki. 52Ka gbala daa yaamna, ka Naawunni niriba kpiimma pam daa doaai na. 53Ka Yisa ŋɔn daa yisigi kum ni n‑naai, lala kpiimma pam daa yi gbala la ni na n‑kpɛ Naawunni tiŋŋa la timpuuni, ka niriba pam daa nya ba. 54Soogyadima toondaana maa ni u niriba daa guri Yisa; ka ban daa nya tingbaŋŋu ŋɔn daa damni seem maa, dabeem daa gbaai ba pam, ka ba daa yɛli, ni, “Doo wa siri daa nyɛ la Wumbiiya.” 55Ka pɔ'aseeba daa bɛ kpaŋŋa ka gɔsiri na - pɔ'aseeba ban daa dɔli u n‑yi Galilii na ni ba ti suŋŋni u la n daa nyɛ ba. 56Mariama ŋɔn daa yi Magdala na n‑daa la, ni Mariama sɔ ŋɔn daa nyɛ Gyeemsi bila ni Gyoosɛfi ma, ni Zɛbidii pɔ'a gba.
57-58Tɔ. Bundaansɔ n daa bɛ ni ŋɔn yuuri daa boonni la Gyoosɛfi: Arimatiiya tiŋŋa nira n daa nyɛ u, ka u daa dɔli la Yisa. Di saha, zaanoori ŋɔn daa ti maai, ŋɔn Gyoosɛfi daa kyaŋŋi m‑paai Gɔmna Pailiti na nti susi u soori ni u kyɛ ka u zaŋŋi Yisa ningbiŋŋu nti sɔ'ai. Ka Pailiti daa yɛli, ni, tɔ, ba zaŋŋma n‑ti u. 59Ka Gyoosɛfi daa deaai ningbiŋŋu maa ka zaŋŋi kasinveelli n‑vili. 60Ka zaŋŋi u n‑niŋi gbalipaali ban kyiibi seaa tampii ni, ka daa bilim kugtitaari n‑ligi ka noori ka naayi bakki. 61Mariama, Magdala tiŋŋa pɔ'a la, ni u tɔ'ama, daa zintiri n‑tuusiri tampifeoo gballi la dunoori ni.
62N‑neaai beoo - Vuusim Dabsiri daari maa n‑daa la - ka Gyeeŋŋu Toondaandima daa la'am Gɔmna Pailiti saani na, ban ni Farisidima maa m‑paasi. 63Nti yɛli u, ni, “Ti wumiya, ziridaana wa ŋɔn daa na bɛ ni maa, ni, u yɛtti, ni, u nin niŋi dabsa ata pɔi ka naayi doaai. 64Tɔ; ka dinŋɔna kyɛ ka soogyadima kyaŋŋi nti guri u tampifeoo gballi maa n‑niŋi dabsa ata la. Dama di pa seem u nyaandɔliba nin zu u n‑yiisi na, ka yɛli niriba, ni, u doaai la kum ni. Di yi bɛ lala, di naari nin niŋi yɔmsigu n‑gaari daŋŋni dinni ŋɔn daa bɛ seem la.” 65Ka Pailiti daa yɛli ba, “Ya mari la ya maŋtoori tɔbbiisi; tɔ - kur kyɛma n‑niŋi yan nin nyaŋŋi seem n‑guri ka suŋŋasuŋŋa.” 66Ka ba daa kyaŋŋi nti guri gballi maa, ka daa zaŋŋi bunni n‑tabli kugbiliŋŋu maa, ka laa n‑zaali tɔbbiisi ni ba gura.
Currently Selected:
MATIYU 27: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.