YouVersion Logo
Search Icon

MATIYU 26

26
1Yisa ŋɔn daa ti wulisi yɛla wa zaa n‑naai, u daa yɛli u nyaandɔliba maa, 2ni, “Ya mi halli, ni, di kpalim la dabsa ayi ni Yakki-n‑Gaari Kyuu.” (kyuseaa ni ban diri bundiripaala - seesi an ka dabinni la) “Di saha ka ba nin zaŋŋi man Ninsaala Bii maa n‑tisi ni ba kpaasi u n‑tabli dɔpulli zugu.” 3Dinsaha ka gyeeŋŋu toondaandima ni Izraɛli kpamma maa daa la'am Kayafasi yiri - sɔ ŋɔn daa di gyeeŋŋu suulinsi la. 4Ba daa ŋmeeri taaba saawara m‑boori sɔseaa ban nin zaŋŋi n‑sɔ'ai n‑gbaai Yisa n‑ku u. 5Ni, “Ti di niŋi lala kyuu maa zama sunsukkuni, mira ka niriba maa nin zabi di zugu.”
6Yisa mun daa bɛ la Bɛtani tinkpaŋŋa; u daa kpɛ la Saimoon yiri, ŋɔn daa nyɛ kunkɔŋŋa la. 7Ka ban daa ti dira, pɔ'asɔ daa mari turaali kɔlɔba n‑kpɛ na, turaali kpaam din mari nyunya'asiri ka di ligri zoaai pam n‑daa la, m‑paai na nti kpaai kpaam maa n‑saari Yisa zugu. 8Ka u nyaandɔliba maa sufu daa yisigi, ka ba tɔ'asiri n‑tiri taaba, ni, “Bɔzugu ka u sa'am buna lala? 9Ba yi da zaŋŋi bu n‑koosi, ligri pam naa n‑yi na ka lala ligri naa n‑toaai m‑puri n‑tɔri n‑ti faradima!” 10Ka Yisa yɛli ba, “Ya kyɛl u! Wula ka ya daamni pɔ'a maa? U tum la din veela n‑ti ma. 11Ya kur nin mari faradima ya saani sahakam. Amaa ya ku mari mani sahakam. 12Ŋɔn niŋi seem maa nyɛ la#:- ni, u kpaai bunnyuuma maa n‑saari n ningbiŋŋu, ka di gbinni nyɛ la n kum sɔ'abu siri maaligu. 13Yɛlimaŋni ka n yɛtti ya, ni, ba yi ti mooli lahabasuŋŋu wa, duniya maa ya'aseelli zaa, ba nin teaai u yɛla n‑tɔ'asi n‑wulisi ŋɔn niŋi seem wa.”
14Ka Gyuudasi Isikariyɔti, ŋɔn daa nyɛ Yisa nyaandɔliba pii ni ayi maa yinni la, daa bakki n‑kyaŋŋi gyeeŋŋu kpambaya maa saani, 15ka yɛli ba, ni, “N yi zaŋŋi Yisa n‑figsi n‑ti ya, bɔ ka ya yɛ ti ma?” Ka ba daa kaali anzulifa ligri pisita n‑zaŋŋi n‑ti u. 16Dizugu Gyuudasi daa piili m‑boori sɔsunseaa ŋɔn nin niŋi n‑zaŋŋi Yisa n‑ti ba.
17Kyuu maa dahinyinni, Yisa nyaandɔliba daa kyɛ u saani na m‑boosi u, ni, “Yɛni ka i boori ni ti kyaŋŋi n‑sɛ'asi i kyuu diibu siri n‑ti i?” 18Ka u daa yɛli ba, ni, ba kpeema timpuuni m‑paai za'ala saani nti yɛli u, ni, “Ti Karimba maa yɛli yaa! - ‘N saha maa pɔtti na; man ni n nyaandɔliba maa ya di Kyuu maa i yiri.’ ” 19Ka ba daa niŋi hoo ŋɔn pun yɛli ba seem maa, ka daa sɛ'asi kyuu maa siri. 20Zaanoori ŋɔn daa paai, Yisa ni u nyaandɔliba pii ni ayi maa daa la'am n‑zini. 21Ka ban daa ti dira, u daa yɛliya, “Yɛlimaŋni ka n yɛtti ya wa, ya yinni nin figsi ma n‑ti n dindaandima maa.” 22Ba sufu daa sa'am pam, ka ba daa yɛtti yinni yinni, “N dugma, ka mani bee?” 23Ka u daa labsi n‑yɛli ba, ni, “Di nyɛ la man ni sɔ ŋɔn la'amni n‑sugri diibu laa yinni ni - ŋɔna n nyɛ n figsira. 24Ninsaala Bii maa nin bakki hoo din pun sɔbi n‑zaali u zugu seem la. Amaa ŋɔn mun figsi Ninsaala Bii maa n‑kyɛ ka ba gbaai u - di ku veeli u zugu. Ba yi daa kyɛ di daama dɔ'am, di naa n‑sɔa.” 25Di saha ka Gyuudasi, sɔ ŋɔn ya figsi u la, daa tɔ'asi n‑yɛli u, ni, “N Karimba, ka mani, bee?” Ka Yisa daa yɛli u, ni, “Nyin yɛli!”
26Tɔ; ka ban daa ti diri maa, Yisa daa zaŋŋi diseebu m‑puusi Naawunni pɛ'abu ka ŋmaai n‑zaŋŋi n‑tisi u nyaandɔliba, ka yɛli, “Ya deaama n‑ŋɔbi; n ningbina nla.” 27Ka laa n‑zaŋŋi kɔbeaa m‑puusi Naawunni ka zaŋŋi n‑ti ba, ni, “Ya zaa nyuum ka puuni. 28N ziim nla. N ziim wa nin ti yi na, ka di yiibu na nin suŋŋi niriba pam ka kyɛ ka nangbanyinni zaalipaalli ti zaani n‑tiri ba, tumbeeri taalli kyɛ-m‑pɛŋŋi zugu. 29Dama n yɛtti ya, n ku laa n‑nyu tiwala daam wa taabu yaasa, halli ni dindahinseaa man ni yan ŋɔn ti ya nyu di bumpaalli, m Ba naam beesigu ni.”
30Ka ba daa yuum yuuma m‑pɛ'ari Naawunni. Ban daa yuum n‑naai ba daa yi bɛni n‑kyaŋŋi nti paai Ɔlivii Zoori lugri ni.
31Ka Yisa daa yɛli ba, “Zuna yuŋŋu wa ya zaa nin wurim ka kyɛ ma, vi zugu. Di bu sɔbi n‑dooli lala? - ni, ‘N nin ŋmɛ pɛgura maa ka u peesi maa wurim.’ 32Man mun yi ti doaai kum ni, n nin daŋŋi ya tooni n‑kyaŋŋi Galilii tingbaŋŋu ni.” 33Ka Piita daa labsi n‑yɛli u, “Ba zaa yi ti wurim ka kyɛ i, vi zugu, man ku kyɛ i saha kam!” 34Ka Yisa yɛli u, “Yɛlimaŋni ka n yɛtti i wa, zuna yuŋŋu wa ka nyin mammaŋŋa nin kyiisi, ni, i zi ma, m‑maali n‑yɛli lala napɔŋŋu buta pɔi, ka nɔroo naayi kum.” 35Ka Piita labsi n‑yɛli ni nimmoaa, ni, “Halli di yi zaan kum ni, n ku kyiisi i.” Ka u nyaandɔlitaaba zaa gba daa yɛli lala.
36Ka Yisa daa kyaŋŋi, ŋɔn ni u nyaandɔliba maa, nti paai ya'aseelli ban boonni Gyɛtisamanni. Ka Yisa yɛli u nyaandɔliba maa, “Ya zinma kpa ka man kyaŋŋi sa n‑susi wunsusigu ka kyɛ na.” 37U daa zaŋŋi la Piita ni Gyeemsi ni Gyɔni ka ba dɔli u, ka sufusa'aŋŋu ni beerim daa gbaai u ka di daa wum u pam. 38Ka u daa yɛli ba, “Beerim din bɛ n sufu ni wa zoaaya pam, n‑ŋmanni din ya ku ma. Ya kpalimma kpa ka man ni yarim ti guusira.” 39U daa kyaŋŋi tooni beela m‑paasi nti zaŋŋi u maŋŋa n‑gbaani tiŋŋa ka susi, ni, “M Ba, di yi ti nyaŋŋi n‑niŋi, n susiri i, ni, nyin kyɛ ka namsigu kɔbeaa wa gaari ka kyɛ ma: di kyɛ ka n nyu di! Amaa di pa la man ŋɔn boori seem la amaa nyin ŋɔn boori seem, di niŋma.” 40U daa labi nyaandɔliba la saani na ka nya, ka babata maa zaa daa gbisiri ni; ka u booli Piita, ni, “Saimoon, ni wula? I naa n‑ku toaai n‑gali goom halli hawa yinni n‑ti ma?” 41Ka laa n‑yɛli ba zaa, ni, “Ya guusima ka susi Naawunni ka lala nin kyɛ ka ba di zamsi ya halli ka ya ti lu. Ya sufu boori sakkri amaa ya ningbina ka yaa ka za'asiri ni.” 42Ka u daa laa m‑bakki yaasa n‑kyaŋŋi ka laa n‑susiri, ni, “M Ba, soori yi ka ni ka namsigu kɔbeaa wa nin gaari ka kyɛ ma see ka n nyu di, tɔ! di pa la man ŋɔn boori seem la amaa nyin ŋɔn boori seem, di niŋma.” 43Ka u daa laa n‑labi m‑paai na ka ba gbisiri ni, dama ba nini daa mumsiri ni. 44Ka Yisa daa laa n‑kyaŋŋi ka kyɛ ba, din daa paasiri buta. U daa laa n‑susiri n‑yɛtti lala. 45Ka u daa labi u nyaandɔliba maa saani na n‑yɛli ba, “Ya na kpalim n‑gbisiri ni ka vuusira?”. Ni, “Saha maa paaya. Ya nyama, ba pun yi n nyaaŋŋa ka figsi man Ninsaala Biiya n‑niŋi ala'akyi dima nuu ni. 46Ya doaama ka ti kyaŋŋi! Minaafikka maa n kyɛnni na wa.”
47Ŋɔn daa na kur tɔ'asiri maa, nnya Gyuudasi ŋɔn paari na, sɔ ŋɔn daa nyɛ u nyaandɔliba pii ni ayi la ni yinni. Niriba pam daa dɔli u: ba daa yi la gyeeŋŋu kpambaya ni Izraɛli kpamma saani na, ka ba daa mari ba takoobidima ni dɔya na. 48Minaafikka maa daa pun wulisi u nyaaŋŋa ŋɔn ya n‑niŋi seem n‑kyɛ ka ba baŋŋi Yisa, ni, “N yi ti puusi sɔ suŋŋasuŋŋa, ŋɔna nŋɔa. Yan gbaam u!” 49Ka dizugu Gyuudasi daa kyaŋŋi yooma m‑paai Yisa saani, ka yɛli u, “N Karimba, aniŋwula!” ka daa puusi u suŋŋasuŋŋa. 50Ka Yisa daa yɛli u, “N zɔa, niŋma nyin ya niŋi seem la!” Tɔ, ka ba daa paai na n‑gbaai Yisa ba nuusi m‑bibgi u kirikiri. 51Ka ban daa dɔli Yisa maa sɔ daa foaai u takoobi n‑kyɛ kpambaya maa bisɔ n‑fikki u tubri m‑basi. 52Ka Yisa daa yɛli u, ni, u zaŋŋma u takoobi maa n‑labsi n‑su ka teoo la ni, ni, “Bankam zaa zaŋŋi takoobi n‑zabra, ban ka ba nin zaŋŋi takoobi n‑zabi n‑ku ba. 53Ammi, ya bu mi, ni, n da naa n‑toaai m‑booli n‑susi m Ba ka u suŋŋi ma, ka u daa naa n‑ti ma malaakadima suŋŋsim yoomyooma? - halli malaaka tɔbbiisi tusa ayoobu napɔŋŋu pii ni ayi gba, u naa n‑ti ma na. 54Amaa di yi niŋi lala, Sɔppu la ya niŋi la wula n‑niŋi yɛlimaŋni - ban daa sɔbi, ni, lala n sumsi ni di niŋi la?” 55Di saha ka Yisa daa boosi ba, ni, “Ammi, n nyɛ la ban zabra ka faari neema ninvugsɔ, bee wula? - ka ya mari takoobidima ni dɔya n‑yi na ni ya gbaai ma dizugu? Beoo kam ka n daa yi zi Gyeeŋŋu Yiri maa n‑wulisiri niriba, ka ya daa bu gbaai ma. 56Amaa anŋɔ zaa niŋiya, ni di siri niŋi hoo Naawunni anabidima maa sɔppu Litaafi ŋɔn daa yɛli seem maa.” Ka u nyaandɔliba zaa daa zɔ ka kyɛ u.
57Tɔ. Ba daa gbaai Yisa m‑mari n‑kyaŋŋi Kayafasi, Gyeeŋŋu Toondaana la, yiri; bɛni ka karimbadima maa ni kpamma maa zaa daa pun la'am na. 58Ka Piita daa sɔ'ai n‑dɔli Yisa nyaaŋŋa sa, halli n‑kpɛ Toondaana maa dundɔŋŋu ni. U daa zi bɛni, m‑bɛ soogyadima maa sunsukkuni, ni u ti nya di naari ŋɔn ya nyɛ seem. 59Kpamma maa, ni la'aŋŋu dima zaa, daa moori la ni ba nya ziri sɛhara n‑galim Yisa ka ku u. 60Amaa ba daa bu nya lala sɛhara, halli ni niriba pam daa yi na ni ba ma'ai ziri n‑galim u. Ka niriba ayi daa naayi doaai n‑zaani na, 61ni, “Doo wa yɛliya, ni, u nin sa'am Naawunni Gyeeŋŋu Duu ka zaŋŋi daba ata m‑mɛ seaa.” 62Di saha ka Gyeeŋŋu Toondaana maa daa doaai m‑boosi u, ni, “I ka labsigu? Bumbɔ nŋɔ ka ba yɛtti yɛttɔ'aseesi m‑paasiri i wa?” 63Ka Yisa ŋɔn daa sina, Toondaana maa daa laa m‑boosi u n‑yɛli, “Naawunni Nyɔvuri Daana zugu n nin zaŋŋi i n‑niŋi nangbampɔri ni - yɛlima ti#:- nyin nyɛ Masiiya ŋɔn ya fa ti m‑basi ka leebi naaba? Nyini n nyɛ Naawunni bii la?” 64Ka Yisa daa labsi n‑ti u, ni, “I yɛliya; amaa n yɛtti ya, ni, zuna zaŋŋi n‑kyɛnna#:-
‘Ya nin nya Ninsaala Bii maa’
‘Ka u zi Naawunni Yaadaana maa nudirigu ya'ari’
‘Ka kyɛnni na ka saazugu sangbana gyiligi u.’ ”
65Ka Toondaana maa suuri daa yisigi, halli ka u daa toaai u maŋtoori sutura dizugu ka yɛli, “Ah! U tuuri la Naawunni! Ti bu laa m‑boori sɛharadima yaasa, bee bɔa? Ya pun wum ŋɔn tɔ'asiri yɛttɔ'aseesi an kyisira. 66Ya gbaai la wula?” Ka ba zaa daa labsi n‑yɛli, ni, “U niŋi taalli - taalli kan sumni la kuubu.” 67Baseeba daa piili n‑tusiri nantoori n‑niŋi Yisa nini, ka daa lɔbri u tampɛ'asi ka daa buuri u 68ka boosiri u, ni, “Nyin Masiiya, nyin anabi wa, bugma m‑baŋŋi ŋɔn ŋmɛ i wa!”
69Tɔ; ka Piita daa na bɛ la tiŋni dundɔŋŋu maa puuni, ka Gyeeŋŋu Toondaana yiri bipunsi sɔ daa kpɛ na nti yɛli u, ni, “Nyin gba yi bɛ la Yisa, Galilii nira wa, saani!” 70Amaa ŋɔn mun daa kyiisi ba zaa tooni, ni, “M bu baŋŋi nyin tɔ'asiri yɛttɔ'aseesi wa!” 71Ka daa yi n‑kpɛ bunzɔŋŋu ni. Ka pɔ'asarisɔ daa nya u n‑yɛtti dappa ban bɛ bɛni maa, ni, “Ŋɔnŋɔ n daa dɔli Yisa, Nazarɛti doo la!” 72Ka Piita daa kyiisi yaasa, ni, “M pɔ la noori, ni, m bu mi doo wa!” 73Din daa paasi beela, ban daa zɛ bɛni maa daa laa n‑yɛli Piita, ni, “I ku toaai n‑kyiisi, ni, i pa ba nyaandɔla, dama i gba tɔ'asiri la Galiliitiri ka ti baŋŋi i yɛla di zugu.” 74Ka Piita daa maali m‑poori n‑yɛtti yɛlikyɔ'ama, ni, “M pɔya, ni, n yɛli la yɛlimaŋni. M bu mi doo maa!” Di saha maa ka nɔroo daa kum, 75ka Piita teaai Yisa ŋɔn daa yɛli u seem, ni, “I nin kyiisi ma napɔŋŋu buta pɔi, ka nɔroo naayi kum.” Ka u daa zɔ n‑yi samanni ka kumni kunkuma.

Currently Selected:

MATIYU 26: maw

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy