MATIYU 21
21
1Ka Yisa ŋɔn daa kyɛnni m‑pɔtti Gyɛrusalɛm tiŋŋa maa, u daa paai tinkpanseaa ban boonni Bɛtfeegyi la, kan zɛ Ɔlivii zoori kpaŋŋa. Di saha ka Yisa daa daŋŋi n‑tum u nyaandɔliba ayi ni ba gaari tooni, 2ni, “Ya kyɛm ti tooni nti kpɛ tinkpanseaa kan zɛ ya tooni sa. Bɛni ya nin ti nya bunnyaaŋŋa n‑lɔ n‑zɛya, ni u bumbila u saani; ya lɔrigma ba m‑mari na. 3Ka sɔ yi ya boosi ya seelli, yan yɛlim u, ni, ya Dugma m boori ba ni, ka mun nin labsi ba na yooma.” 4Dinŋɔ daa niŋiya, ni anabi maa yɛlisim niŋi yɛlimaŋni, ni#:-
5“Ya tɔ'asima n‑ti Zayɔn tiŋŋa wa,
Hoo yan nin tɔ'asi n‑ti pɔ'asariga,
Ni, ‘Nyama, i Naaba n kyɛnni i saani na wa!
U sigsi u maŋŋa baalimm
Ka baari buŋŋa,
Halli bumbila ka u baara.’ ”
6Tɔ; ka nyaandɔliba ayi maa daa kyaŋŋi nti tum Yisa ŋɔn daa wulisi ba seem la. 7Ban daa mari buŋŋa ni u bii maa na, ba daa zaŋŋi ba kyinkyina m‑pa bunsi maa nyaaŋŋa ka Yisa daa m‑ba n‑kyaŋŋi. 8Daadam ban daa dɔli u maa seeba daa zaŋŋi ba kyinkyina n‑yɛligri soori maa ni, ka seeba mun daa kabi n‑kabi tiisi wula, n‑daa dooli n‑dooli soori maa ni. 9Ninvugseeba ban daa bɛ tooni, ni seeba gba ban daa bɛ nyaaŋŋa n‑dɔli maa daa piili n‑kpalimna n‑yɛtti, ni#:-
“Hoosana! Tiliginsim daana! NaaDauda Biiya!
Zugsuŋŋu bɛ ni n‑ti ŋɔn zaŋŋi ti Dugma yuuri na!
Tiliginsim daana gyirima bɛ la zugsaa!”
10Yisa ŋɔn daa ti kpɛ Gyɛrusalɛm timpuuni la, tiŋŋa maa zaa daa damni n‑vuura, ka ba boosiri taaba, ni, “Ŋɔni n‑lee n‑nyɛ u?” 11Ka ban daa dɔli Yisa la daa labsi n‑yɛli ba, ni, “Anabi Yisa nla: u yi la Nazarɛti na, Galilii tingbaŋŋu maa ni.”
12Ka Yisa daa paai Naawunni Gyeeŋŋu Yiri maa nti kpɛ bɛni n‑katti ban daa koosiri ka daari neema Yiri maa puuni la n‑yiisiri ba. Baseeba daa takkri ligri bɛni, ka u daa daai ba teebulidima m‑basi, ni ŋmankoosiriba kugsi m‑paasi. 13Ka yɛli ba, ni, “Di sɔbi n‑zaali, ni, ‘Ba nin booli n Yiri wa, ni, Wunsusigu Yiri.’, amaa ya zaŋŋi ka n‑labgi la ‘ta'ayigsi ŋɔn sɔ'ari seela.’ ”
14Zoomma ni kɔnsi daa kyɛ u saani na, Naawunni Gyeeŋŋu Yiri puuni, ka u daa tibi ba. 15Ka gyeeŋŋu toondaandima, ni karimbadima maa sufu daa yisigi zaŋŋi n‑kyaŋŋi alahazibu tunseesi Yisa ŋɔn daa tumni la; ni biisi ban daa bɛ Gyeeŋŋu Yiri maa ni n‑tasiri n‑yɛtta, “Hoosana! Tiliginsim daana! NaaDauda Biiya!” 16Dinŋɔ zugu ba daa boosi Yisa, ni, “I bu wum ban yɛtti seem wa?” Ka u daa labsi n‑yɛli ba, ni, “Ii, n wumiya. Ammi, ya na bu karim Sɔppu maa yɛla? - ni, ba pɛ'ari Naawunni, ni, ‘Nyin, Naawunni, bamsi la biisi - halli bileesi gba - ni ba tiri pɛ'abu.’ ” 17Dinŋɔ nyaaŋŋa ka Yisa daa kyɛ ba m‑bakki n‑yi Gyɛrusalɛm timpuuni n‑kyaŋŋi nti paai Bɛtani tinkpaŋŋa n‑gbɛa.
18Beoo ŋɔn daa neaai asusuba, ka Yisa ŋɔn daa kyɛnni n‑labri timpuuni na, kɔm daa ti mari u. 19Ka u daa gɔsi n‑nya ka kinkaŋŋa n zɛ sɔkpaŋŋa sa; ka u daa kyaŋŋi m‑paai ka ni, amaa ŋɔn daa ti paai tii maa na, u daa bu nya sɛseelli na'ala vaari kɔkɔa. Ka Yisa daa yɛli kinkaŋŋa maa, ni, “I ku laa n‑wali walli yaasa!” Ka tii maa daa gbirigi n‑kuui di saha maa. 20Ka u nyaandɔliba maa ŋɔn daa ti nya lala, di daa gyɛri ba pam. Ka ba boosiri n‑yɛtti, “Bɔ n niŋi ka tii maa gbirigi n‑kuui lala yooma?” 21Ka Yisa daa labsi n‑yɛli ba, ni, “Yɛlimaŋni ka n yɛtti ya wa, ni, ya yi mari yɛdda, ka bu birisira, ya nin toaai n‑niŋi man niŋi kinkaŋŋa wa seem. Ka pa dinŋɔ kɔkɔa, amaa halli ya yi ti yɛli zoori wa, ni, ka doaama n‑lɔbi ka maŋŋa m‑basi teeku puuni, di nin niŋi. 22Ya yi susi Naawunni bunseelli kam zaa, ka niŋi yɛdda, ya nin nya.”
23Ka Yisa daa kyaŋŋi Naawunni Gyeeŋŋu Yiri maa, ni u ti wulisiri niriba la. Ka gyeeŋŋu toondaandima daa kyɛ u saani na, ban ni tiŋŋa maa kpamma la, m‑boosi u, ni, “Ŋɔni n ti i soori ni i tum i lala tuma maa, bee, yiiko bɔ ka i mara?” 24Ka Yisa daa labsi n‑yɛli ba, ni, “N gba ya boosi ya la boosigu yinni. Ya yi yɛli ma pɔi, ka man gba nin naayi labsi ya ya boosigu wa. 25Tɔ: ŋɔni n daa ti Gyɔni soori ni u suuri niriba Naawunni koom la, bee, u yiiko yi la yani? Di daa yi la Naawunni saani, bee, ninsaalidima saani?” Ka ba daa piili n‑ŋmeeri nangbankpeemni n‑tiri taaba, ni, “Ti ya yɛli la wula? Ti yi yɛli, ni, Naawunni saani, u nin boosi ti, ni, bɔzugu ka ti daa bu niŋi Gyɔni yɛdda? 26Ka ti yi sakki n‑yɛli, ni, ninsaalidima saani...? - Ay! ti zɔri la niriba, dama sɔkam sakkiya, ni, Gyɔni Kɔsuura daa nyɛ la anabi.” 27Dizugu ba daa labsi n‑yɛli Yisa, ni, “Ti bu mi.” Ka Yisa daa yɛli ba, ni, “Dinŋɔna n gba ku yɛli ya ŋɔn ti ma soori ni n tumni anŋɔ zaa.”
28Ka Yisa daa laa n‑yɛli, ni, “Tɔ; ka ya teesiri la wula? - Dɔsɔ n daa bɛ ni m‑mari u bidibsi ayi. Ka u daa kyaŋŋi u bii yinni saani nti yɛli u, ni, ‘Kyɛma nti tum tiisi puu maa tuma zuna.’ 29Ka bii maa daa labsi n‑yɛli, ni, ‘Ay! - N ku kyaŋŋi.’, amaa di nyaaŋŋa u daa laa n‑takki u teesa ka kyaŋŋi. 30Di saha ka u daa paai u bii ŋɔnla, ka yɛli ŋɔn gba, ni, u kyɛma nti tum, ka ŋɔn mun sakki n‑yɛli, ni, ‘Tɔ, n wumiya.’, amaa u daa bu kyaŋŋi. 31Tɔ, ka babayi wa saani, ŋɔni n daa tum u ba ŋɔn boori seem?” Ka ba labsi n‑yɛli u, “Ŋɔn daŋŋi tooni la.” Ka u daa yɛli ba, “Yɛlimaŋni ka n yɛtti ya wa, ni, ban deaari lampoo ni ban goori gyɛ'amiru la nin gaari yarima tooni n‑kpɛ Arizana naam ni. 32Dama Gyɔni daa kyɛ na ni u ti wulisiri ya yɛlimaŋni soori, ka yarima daa bu niŋi u yɛdda, amaa ka lampodeaariba ni gyɛ'amirudima daa niŋi u yɛdda. Ka yarima muna, halli ni yan daa nya lala zaa, ya daa bu takki ya teesa n‑naayi niŋi u yɛdda.”
33Ka u daa gbaai yɛttɔ'a n‑yɛli ba nyɛsiseaa yaasa, ni, “Yiri daansɔ n daa bɛ ni n‑daa sa u tiwanna puu. U daa mɛ la goomni n‑gyili puu maa, n‑gbi bɔkku ba n soorigri tiwala maa seela, ka laa n‑ti sugri puu maa puuni. U daa maali di zaa ka zaŋŋi puu maa n‑niŋi ninvugseeba nuu ni ni ba tumma puu maa tuma n‑tiri u: ka u daa naayi kyaŋŋi n‑gɔa. 34Tɔ, ka tiisi maa wala saha ŋɔn daa ti pɔri, u daa tum u daaba ni ba kyaŋŋi tuntumniba maa saani nti deaai u puu maa diibu na n‑ti u. 35Amaa tuntumniba maa daa gbaai ba yinni m‑bu u, ka sɔ mun ka ba daa ku, ka daabsɔ yaasa ka ba daa lɔbi kuga. 36Ka puu maa daana daa laa n‑tum seeba, daaba pam gba n‑gaari banla, ka tuntumniba maa daa niŋi ba zaa lala. 37Ka u daa naayi tum u toori biiya ba saani, dama u daa teesiya, ni, ‘Ba nin ti m maŋtoori bii maa gyirima.’ 38Amaa tuntumniba maa ŋɔn daa nya puu maa daana bii la, ba daa yɛli n‑ti taaba, ni, ‘Ŋɔn nin di puu maa daana faari la nŋɔa. Ya kyɛ ka ti ku u, ka mari u faari maa.’ 39Ka lala zugu ba daa gbaai u n‑zaŋŋi u m‑basi puu maa kpaŋŋa n‑ku u. 40Tɔ: ka puu maa daana yi ti paai na, u nin niŋi tuntumniba wa wula?” 41Ka ba daa labsi n‑yɛli u, ni, “U nin ku tuntumniba wa zaa ka ba kum nin ti bɛ halli. Ka u nin zaŋŋi puu maa n‑ti tuntunseeba ban nin sakki n‑zaŋŋi u wala maa n‑ti u, a walibu saha yi ti paai.” 42Ka Yisa daa yɛli ba, ni, “Ammi, ya na bu karim Sɔppu la? - ni#:-
‘Kugseaa tammeeriba ŋɔn daa za'asi la
Kana daa leebi kan gbaai nyeebri maa,
N‑gbaari ka zaa ni kpeeŋŋu;
Ti Dugma tuma maa nla,
Ka di nyɛ la alahazibu n‑ti ti.’
- ya bu baŋŋi lala sɔppu maa?” 43Ni, “Dinŋɔna man yɛtti ya ni, ni, ba nin fa Naawunni naam yɛla ya saani nti zaŋŋi n‑ti tingbanseaa niriba, ban tuma sumsi ni ba deaai.” [[44Ni, “Ŋɔnkam zaa lu kugri maa zugu nin kabi m‑basi, amaa kugri maa ŋɔn lu sɔ zugu ka nin ŋmɛrigi u zaa.”]]
45Di saha ka gyeeŋŋu toondaandima ni Farisii dima maa daa wum lala ka daa baŋŋi, ni, nyɛsiri maa galimni la bana. 46Ka ba daa boori soori ni ba gbaai u; amaa ba daa zɔri la daadam la dabeem, dama zama maa daa yɛnni, ni, anabi n nyɛ u.
Currently Selected:
MATIYU 21: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.