Kod 49
49
Yakuba be duba kɛ a dencɛw ye
1Yakuba ye cii sama a dencɛw ma k'u ka na. U nana tuma min na, a ko u ka lajɛn a kɔrɔ. Koo min bena kɛ u la sini, ale b'o fɔ u ye.
2A ko: «Yakuba deenw, aw ye gwɛrɛ ka mɛnni kɛ.
Aw k'aw tulo malɔ aw faa Isirayɛli ka kuma na.
3Urubɛn, i ye ne deen fɔlɔ ye,
ne kɔnna ka min sɔrɔ ne ka kanbelenya waati la.
Fanga b'i la kosɔbɛ,
see fana b'i ye kosɔbɛ.
4I be i n'a fɔ jii, min be bugubugu,
i tena to ɲafɛ tugu,
bari i lara n'i faa ka muso dɔ ye.
I ye ne ɲagami.
5Simiŋɔn ni Levi ye dɔgɔ ni kɔrɔ ye,
olu be jɛn ka koo farimanw kɛ.#49.5 Yan yɔrɔ be se ka yɛlɛma fana ko: «...olu ka murujanjanw ye cɛnnikɛ ta ye.»
6U b'u yɛrɛ dogo ka ɲɔgɔn ye koo minw na,
ne t'a fɛ ka n seen don o la.
Ne t'a fɛ ka taga u ka ɲɔgɔnyeyɔrɔ la.
Bari u dimina, ka mɔgɔw faga.
U ye turaw kɔfɛsen fasaw tigɛ
u yɛrɛ sago la.
7U ka dimi kosɔn,
u danganin be,
bari u ka fari fɔɔ ka tɛmɛ a daan kan.
U ka dimikojugu kosɔn,
u danganin be,
bari u te hinɛ.
Ne bena u ka mɔgɔw yɛrɛkɛ Yakuba kɔmɔgɔw cɛma,
ne bena u jɛnsɛn Isirayɛlidenw cɛma.
8Zuda, i fadenw bena i tanu.
I bena i bolo la i juguw tɔngɔrɔ la.
I fadenw bena u kunbiri gwan i kɔrɔ.
9 #
Kok 24.9; Yir 5.5 Zuda, i be i ko jaraden.
Ne deen, i bɔtɔ filɛ i ka sogo minɛyɔrɔ la.
E be ɲɔngiri, ka la i ko jara.
I be i ko jaramuso,
jɔn be se ka fanga l'a kan k'a wili?
10Masaya tena bɔ Zuda ka somɔgɔw bolo,
masabere tena bɔ u bolo,
fɔɔ ni a tigi yɛrɛ yɛrɛ nana,
siyaw ka kan ka sɔn ale min ta ma.
11A ben'a ka fali siri *ɛrɛzɛnsun la,
a ben'a ka faliden siri ɛrɛzɛnsunɲuman la.
A ben'a ka faniw ko ɛrɛzɛnji la,
a ben'a ka foroca ko ɛrɛzɛnji wuleman la.
12A ɲakisɛ bena wulen ka tɛmɛ duvɛn kan,
a ɲiin bena gwɛ ka tɛmɛ nɔnɔ kan.#49.12 Yan yɔrɔ be se ka yɛlɛma fana ko: «Duvɛn ben'a ɲaa wulen, nɔnɔ ben'a ɲiin gwɛya.»
13Zabulɔn ka sigiyɔrɔ bena kɛ kɔgɔjida la.
Kurunw bena lɔ yen.
A ka mara danyɔrɔ bena se fɔɔ Sidɔn dugu faan fɛ.
14Isakari ye fali barikaman ye,
min lanin be begɛnso ɲanaman kɔnɔ.
15A y'a ye ko a ka lafiɲɛyɔrɔ ka ɲi,
ko a ka mara ka di.
A sɔnna ka doni ta,
a y'a yɛrɛ bila jɔnyabaara la.
16Dan ben'a ka mɔgɔw mara ni hɔrɔnya ye,
a bena jati a fadenw kɔmɔgɔw cɛma.
17Dan bena kɛ i n'a fɔ saa, sira kan,
a bena kɛ fɔnfɔnni ye siradennin kan,
min be soo cin a senju la
fɔɔ ka sotigi ben a kɔɔ kan.
18Masaba, ne be i ka kisili makɔnɔ.
19Kɛlɛdenw bena girin Gadi kan,
nga ale bena u kunbɛn k'u gwɛn.
20Dumunifɛn caaman bena sɔrɔ Asɛri ka mara la,
dumunifɛnɲuman bena sɔrɔ a ka mara kɔnɔ,
min ka kan ni masacɛ ye.
21Nɛfutali ye mankalanin labilanin ye,
mankalanin lo, min be deen cɛɲumanw wolo.
22Yusufu ye tura kɛɲɛnin ye,
tura kɛɲɛnin lo, jii bɔyɔrɔ daa la.
A be kogo sago dumunikɛyɔrɔ la.#49.22 Yan yɔrɔ be se ka yɛlɛma fana ko: «Yusufu ye yiri ye min be den. Yirisun lo jii bɔyɔrɔ daa la, n'a bolow be tɛmɛ kogo kan.»
23Kalabonbagaw y'a sɛgɛn kosɔbɛ.
U y'a bon n'u ka biɲɛw ye, k'a tɔɔrɔ.
24O bɛɛ n'a ta,
a y'a ka kala minɛ ka ɲa,
a bolo barikamanw ma ja
Yakuba ka Ala, Setigi barika la.
Ale lo be Isirayɛlidenw mara
i ko sagadɛndɛbaga
b'a ka sagaw mara cogo min na.
Isirayɛlidenw jigi lanin b'a kan
bari a be i ko kabakuru.
25I bolo barikamanw ma ja
i faa ka Ala barika la, min b'i dɛmɛ,
Setigi Ala barika la,
min be koɲuman kɛ i ye.
A bena sanji d'i ma ka bɔ sankolo la.
A bena jii d'i ma ka bɔ dugukolo kɔnɔ.
A bena deen caaman,
ni begɛn caaman d'i ma.
26Hɛrɛ min be bɔ fɔlɔfɔlɔ kuluw kunna,
fɛnɲuman minw be sɔrɔ tintinkɔrɔw kan,
denfa ka duba be tɛmɛ o kan,
ne be min kɛra i ye.
Ala ka duba nunu bɛɛ minɛ Yusufu ye,
ale min be a fadenw kunna.
27Bɛnzamɛn ye warajugu ye.
Sɔgɔma, a b'a ka sogo dumu.
Wulafɛ, a ye fɛɛn min sɔrɔ,
a b'o tilantilan.»
28Isirayɛli ka deen tan ni fila n'u kɔmɔgɔw lo ye o u ye. U faa ye duba minw kɛ u ye, o le ye nunu ye. A ye duba nunu kɛ k'a kɛɲɛ u kelen kelen bɛɛ ma.
Yakuba ka sayako
29O kɔ, Yakuba y'a fɔ a deenw ye ko: «Ne bena taga n faaw fɛ. Ni ne sara, aw ka ne suu don n faaw gɛrɛfɛ, iticɛ Efurɔn ka foro kuluwo kɔnɔ, 30#Kod 23.3-20 Makipela foro kɔnɔ Manbure gɛrɛfɛ, Kanaan jamana na. Ibrayima tun ye min san iticɛ Efurɔn fɛ k'a kɛ sudonyɔrɔ ye. 31#Kod 25.9-10; 35.29 Ibrayima n'a muso Sara suuw donna o yɔrɔ la, Isiyaka n'a muso Erebɛka suuw fana donna yen, ne ye Leya fana suu don yen. 32Ibrayima ye foro ni kuluwo nin san itiw fɛ.»
33 #
Kɛw 7.15
Yakuba tilara o fɔli la a dencɛw ye tuma min na, a lar'a ka dilan kan, a nii bɔra, a tagar'a faaw fɛ.
Currently Selected:
Kod 49: AKKDC08
Highlight
Share
Copy
Want to have your highlights saved across all your devices? Sign up or sign in
La Bible en Jula © Alliance Biblique du Burkina Faso, 2007.