Kod 35
35
Yakuba be kɔsegi Betɛli
1 #
Kod 28.11-17
Ala y'a fɔ Yakuba ye ko: «Wili ka taga sigi Betɛli, ka sarakabɔyɔrɔ lɔ ne Ala ye o yɔrɔ la, ne min tun ye n yɛrɛ yira i la i bolituma na i kɔrɔcɛ Ezawu ɲa.»
2O la, Yakuba y'a fɔ a ka somɔgɔw ni a ka mɔgɔw bɛɛ ye ko: «Siya wɛrɛw ka joo minw be aw fɛ, aw k'o bɛɛ fili, k'aw yɛrɛ saniya, ka fani wɛrɛw don. 3O kɔ, an ka wili ka taga Betɛli. Ne bena sarakabɔyɔrɔ lɔ Ala ye o yɔrɔ la, min ye ne ka daalili jaabi ne degunlon na, ani ka to ne fɛ ne taayɔrɔw bɛɛ la.»
4Siya wɛrɛw ka joo minw tun b'u fɛ, u ye olu bɛɛ di Yakuba ma, ani minw tun be u tulo la. Yiriba dɔ tun be Sisɛmu gɛrɛfɛ, a ye dingɛ sogi o kɔrɔ k'u don yen. 5O kɔ, u ye sira minɛ ka taga. Ala ye siranya bila u laminiduguw la kosɔbɛ, o la, olu ma tugu u kɔ.
6Yakuba n'a ka mɔgɔw sera Luzi, min ye Betɛli ye bii, Kanaan jamana na. 7A ye sarakabɔyɔrɔ lɔ yen, k'o yɔrɔ tɔgɔ la ko Betɛli ka Ala, bari Ala tun y'a yɛrɛ yira a la o yɔrɔ la tuma min na a tun be bolil'a kɔrɔcɛ ɲa.
8Erebɛka lamɔbaga Debora sara. U y'a suu don joyiri dɔ jukɔrɔ Betɛli gɛrɛfɛ, ka tɔgɔ la yiri nin kan ko Kasikan.
9Yakuba seginin kɔ ka bɔ Aramu jamana na, Ala y'a yɛrɛ yira a la tugu ka barika don a la. 10#Kod 32.28 Ala y'a fɔ a ye ko: «I tɔgɔ ko Yakuba. Nga i tena wele Yakuba tugu, i tɔgɔ bena kɛ Isirayɛli ye.» O la, a y'a tɔgɔ la ko Isirayɛli.
11 #
Kod 17.4-8
Ala y'a fɔ a ye ko: «Ne ye Setigi Ala ye. Ne bena deen caaman d'i ma, k'i kɔmɔgɔw caya. I bena kɛ siya faa ye, i yɛrɛ bena kɛ siya caaman faa ye. Masacɛw bena bɔ i kɔmɔgɔw la. 12Ne ye jamana min di Ibrayima ni Isiyaka ma, ne bena o d'i ma, k'a d'i kɔmɔgɔw ma.»
13O kɔ, Ala tagara k'a to yen o yɔrɔ la. 14#Kod 28.18-19 Ala tun kumana Yakuba fɛ yɔrɔ min na, a ye kabakuru lɔ yen, ka jii ni tulu bɔn a kan. 15Ala tun kuman'a fɛ yɔrɔ min na, a y'o yɔrɔ tɔgɔ la ko Betɛli.#35.15 Betɛli kɔrɔ ko Ala ka soo.
Arasɛli ka sayako
16U bɔra Betɛli ka taga se yɔrɔ dɔ la, o yɔrɔ ni Efarata tun ka jan dɔɔni. Arasɛli jigira o yɔrɔ la, a jigiko gwɛlɛyara. 17K'a to o gwɛlɛya kɔnɔ, muso min tun b'a dɛmɛna ka jigi, ale y'a fɔ a ye ko a kana siran, ko a ye dencɛ wɛrɛ sɔrɔ. 18A tun be ɲini ka sa tuma min na, a ye deen nin tɔgɔ la ko Bɛnoni. Nga deen faa y'a tɔgɔ la ko Bɛnzamɛn.#35.18 Bɛnoni kɔrɔ ko: «Ne ye dencɛ nin sɔrɔ tɔɔrɔ kɔnɔ.» Bɛnzamɛn kɔrɔ ko: «kinibolo deen.» 19Arasɛli sara, u y'a suu don Efarata sira daa la, dugu min be wele fana ko Bɛtilehɛmu. 20Yakuba ye kabakuru dɔ tutu a kaburu kan. A be yen halibi ka Arasɛli kaburu yɔrɔ yira.
21Isirayɛli tagara ɲafɛ k'a ka fanibugu lɔ Migidaledɛri kɔfɛ. 22#Kod 49.4 Ka Isirayɛli to o mara la, Urubɛn lara n'a facɛ ka gɛrɛfɛmuso Bila ye. Isirayɛli y'o kibaru mɛn.
Yakuba kɔmɔgɔw
Yakuba ye dencɛ tan ni fila le sɔrɔ.
23Leya ka deenw tun ye: Yakuba deen fɔlɔ Urubɛn, ni Simeyɔn ni Levi ni Zuda ni Isakari ani Zabulɔn ye. 24Arasɛli taw tun ye Yusufu ni Bɛnzamɛn ye. 25Arasɛli ka jɔnmuso Bila ka deenw tun ye Dan ni Nɛfutali ye. 26Leya ka jɔnmuso Zilipa taw tun ye Gadi ni Asɛri ye.
Olu le tun ye Yakuba ka dencɛw ye minw wolola k'a to Aramu jamana na.
Isiyaka sayako
27 #
Kod 13.18
Yakuba ser'a facɛ Isiyaka fɛ Manbure, Kiriyataraba gɛrɛfɛ, u be min wele Eburɔn bii, Ibrayima ni Isiyaka tun sigira yɔrɔ min na. 28Isiyaka sii bɛɛ lajɛnnin tun ye saan kɛmɛ ni bi seegi ye. 29A kɔrɔla kosɔbɛ ka sɔrɔ ka sa, ka ta'a faaw fɛ. A dencɛ Ezawu ni Yakuba y'a suu don.
Currently Selected:
Kod 35: AKKDC08
Highlight
Share
Copy
Want to have your highlights saved across all your devices? Sign up or sign in
La Bible en Jula © Alliance Biblique du Burkina Faso, 2007.